Маданиятны коллежини юбилейи


Оьтген жума Магьачкъаладагъы Къумукъ театрны бинасында Барият Муратованы атындагъы Дагъыстанны маданият ва инчесаният коллежи оьзюню 60 йыллыкъ юбилейин оьтгерди. Коллежни коллективин къутламагъа республиканы маданиятыны белгили адамлары, студентлер, шагьарлылар жыйылгъан эди.

___________________________________________________________________


ДР-ни маданият министри Зарема Бутаева оьзюню ва министерликни атындан коллежни педагогика коллективин, студентлени къутлады.


– Дербент шагьардагъы культпросвет школадан башлап, тахшагьардагъы коллежни даражасына етишген сизин коллектив Дагъыстанны маданият тармагъы учун минглер булан касбучуланы гьазирлеген. Шо заманны ичинде коллектив бай сынав топлагъан. Коллежни студентлери ва дарс беривчюлери респуб­ликада болагъан маданият чараларда, халкъара ва бютюнроссия конкурсларда даим ортакъчылыкъ эте. Бу байрам гюнюгюзде барыгъызгъа да гьакъ юрекден пайдалы ишигиз, яратывчулукъ уьстюнлюклеригиз, касбу­гъузгъа берилгенигиз учун баракалла деп айтма сюемен. Сизге савлукъ, охувда ва яратывчулукъ ишигизде уьстюнлюк­лер ёрайман,– деди министр.


Республиканы маданиятына этген къошуму, яш наслугъа билим ва тарбия беривде етишген уьстюнлюклери учун коллежни дарс беривчюлери маданият министерликни гьюрметлев грамоталары булан савгъатланды.


Коллежни директору П. Муртазалиева айтгъан кюйде, мунда билим алып чыкъгъан уланлар ва къызлар Москваны, Санкт-Петербургну, Азербайжанны, Белоруссияны, Латвияны, Израилни, Сербияны, Германияны, Американы концерт коллективлеринде ортакъчылыкъ эте ва маданият охув ожакъларында билим ала.


Юбилей чаралар коллежни студентлери ва дарс беривчюлери онгаргъан концерт программа булан узатылды.

Бизин мухбирибиз.

 

Авторизация
*
*
Регистрация
*
*
*
Согласны с условиями сайта?
Генерация пароля