Дагъыстанны бары да районларыны ва шагьарларыны арасында оьтгерилеген гьаракатларда Къарабудагъгент районлу яшлар алдынлы ерлеге чыкъмагъа бажаргъан. Оьзлени ишине тийишли кюйде янашагъан, эринмей-талмай ишлейген къуллукъчуларындан Къарабудагъгент юрт администрацияны китапханасыны къуллукъчулары Азинат Пашаеваны, Дина Ильясованы атларын айрыча эсгерме тюше. Оланы сиптечилиги булан гьар айгъа гёре къурулгъан планына гёре иш юрюле. Артдагъы гюнлерде Къарабудагъгент юрт китапханасында белгили шаир Михаил Лермонтовну 200 йыллыгъына багъышлангъан бирдагъы агьамиятлы чара оьтгерилди.
Къарабудагъгент юрт китапханасыны къуллукъчулары гимназияны охувчулары булан бирче «Лермонтов ва Кавказ» деген къужурлу яратывчулукъ ахшам оьтгердилер. Охувчулар шаирни яшав ёлу, ону къыйынлы къысматы булан теренден таныш болдулар. Гёрмекли язывчуну гьакъында гьазирленген суратлар, китаплар булангъы стенд, пагьмулу кюйде онгарылгъан видеофильм яшланы айрыча тергевюн тартды.
Гимназияны охувчулары Патиматзагьра Зайнивова ва Жамиля Сунгурова Михаил Лермонтовну шиъруларын уста кюйде гёнгюнден охудулар. Оьзгелери буса адабият дарсларда гьазирлеген рефератларын, илму-ахтарыв ишлерин арагъа чыгъарды.
Шу къайдада гьазирленеген ва оьтгерилеген чаралар оьсюп гелеген яш наслуну китапгъа, адабиятгъа ювукъ ва ругь дюньясын бай этегени шеклик тувдурмай. Маданият ожакълары да, охув ожакълары да бир болуп, шо тармакъда къайратлы иш гёрмеге герек экени де мекенли.
Ругьаният МУСАЕВА.
Автор чыгъаргъан суратлар .
