Айтагъаным, алдагъы гюнлерде Къумукъ театрны ичинде иш гёреген янгы ачылгъан къурчакъ театрыбыз Буйнакск районну Оьр ва Тёбен Къазаныш юртларындагъы яшлар бавларында болдулар. Шо гьакъда бизге Къумукъ театрны директоруну заместители, Дагъыстанны культурасыны ат къазангъан къуллукъчусу Къагьир Магьамматович Атагьажиев булай билдирди:

–Биз язда театрны сезону ябылгъанда, яшлар да Магьачкъалагъа чыкъмайгъангъа, гьар ерлердеги къумукъ юртларыбызгъа барып, яшлар бавларында тарбияланагъан гиччипавлагъа Дагъыстанны халкъ шаири Аткъай Гьажаматовну «Акъ гёгюрчюн» деген поэмасына гёре салынгъан спектаклни гёрсетме гёз алгъа тутгъан эдик. Бу спектаклни биз гьар ерлеге алып юрюйгеник бираз заман бола. Бу гезик мен Буйнакск районну янгы ёлбашчысы Камил Абусалимович Изиевни янына гирип, районну юртларындагъы яшлар бавларында къурчакъ театрны гёрсетме сюегенибизни айтгъан эдим. Ол шоссагьат бизин таклифибизни якълап, арив гёрюп чакъырды, бизин булан дыгъар да байлап, харжын да тёлемеге оьзлени бойнуна алдылар. Огъар баракалла болсун. Биз бу гезик Оьр ва Тёбен Къазанышдагъы яшлар бавларында болдукъ. Шонда да къурчакъ театргъа яшлар шонча да бек гьайран болуп къарайгъан кюйню сиз де гёрме герек эдигиз. Къайда барсакъ да, яшлардан оьтюп, уллулар да бек арив къаршылайлар. Шо, озокъда, бизин де сююндюре, дагъыдан да бек иштагьландыра.

Тёбен Къазанышда шо гюн театр баргъан «Сказка» деген яшлар бавуну заведующийи Зийира Камиловна Дагьирова «Акъ гёгюрчюн» деген спектаклни, артистлени оюнуну гьакъында булай эсгерди:

–Тюзю, бизин юртгъа Къумукъ театр гелегени биринчи гезик тюгюл. Амма гиччипавларыбызны ругьландырмакъ муратда яшлар бавубузда къонакълыкъда бола­гъаны биринчи гезик эди. Къурчакъ театрны ачып, кёп уллу ва пайдалы иш этгенлер. Неге тюгюл, яшланы янындан да ана тилибизге тергев артар деп эсиме геле.

Сонг да, бизге Аткъай Гьажаматовну «Акъ гёгюрчюн» деген поэмасына гёре салынгъан спектаклни алып гелген эди. Шо асарны да маъна ва тарбия янындан бек агьамияты бар. Яшланы рагьмулукъгъа, яхшылыкъгъа, тазалыкъгъа уьйрете. Артистлерибиз де, айрокъда Дагъыстанны ат къазангъан артистлери Зугьра Межитова, Тимур Умаев ва оьзгелери нече де арив, яшланы гьакъылына сингдирип, уста кюйде ойнадылар. Яшлар чы нечик де, биз, уллулар да, шогъар къарап завх этдик. Яшланы сююнчлю юзлерин гёрмек де негер де тиймейми? Ондан къайры да, бизин Буйнакск районну янгы ёлбашчысы спектаклге гьагъын да тёлеп, бизге шону гьаппа-гьава­йын гёрсетдилер. Олагъа да Аллагь рази болсун. Дагъы да спектакллер гелгенни сюер эдик. Биз гьаман да къучагъыбызны яйып къаршылама гьазирбиз.

П. Гьайбуллаева.

Суратда:спектаклден гёрюнюш.