Къумукъ театрда – премьера

Къумукъ театр М. Лермонтовну «Бэла» деген асарына тергев этгени де негьакъ тюгюл. Бу йыл бютюн Россияны бары да регионларында орус адабиятны классиги М. Лермонтов тувгъанлы 200 йыл тамамлангъангъа байлавлу чаралар оьтгериле. Къумукъ театр да бу спектакль булан шаирни яратывчулугъуна этген тергев болду. «Бэланы» премьерасына къарама юртлардан, шагьарлардан зал толуп адамлар да жыйылгъан эди. Премьера башлангъынча, Къумукъ театрны чебер ёлбашчысы Айгум Айгумов сагьнагъа чыгъып къаравчуланы къаршылады.


Премьерагъа къарамагъа  Къарачай-Черкес Республиканы халкъ артисти, Россияда Лермонтовну комитетини председателлерини бири  Аскер Дадуев, Къабарты-Балкъар Республиканы инчесаниятыны ат къазангъан къуллукъчусу, шаир Абуталип Беппаев, РФ-ни язывчуларыны союзуну члени, театр танкъытчы Александр Пряжников ва Дагъыстанны язывчуларыны союзуну правлениесини председатели, Дагъыстанны халкъ шаири Магьаммат Агьматов, къумукъ халкъны интеллигенциясы гелген эди.

Озокъда, М. Лермонтовну «Герой нашего времени» деген асарында эсгерилеген кюйде, Кавказда, айрыча алып айтгъанда, Дагъыстанда юрюлген агьвалатланы, къумукъ къыз Бэланы, ону орус офицер булангъы аралыгъын спектаклни режиссёру оьзюню къаравларына гёре, Лермонтовну романыны маънасын оьзю сезген кюйде къаравчулагъа етишдирмекни къастын этген.

Спектакль Бий Магьамматны абзарында къызын уьйлендиреген той булан башлана. Буланы тоюна абурлу къонакълар – орус офицерлер геле, олай да мычыгъыш къардашлары геле. Бу спектакль музыкалы- драма къайдада салынгъан, гьаракатланы барышында Бий Магьаммат, Бэла, Азамат жан бере.

Къумукъ театрны артистлерини оюну да макътавгъа лайыкълы.  Къаравчуну инандырагъан кюйде ойнама бажарагъанын эсгерме герек. Алда бу спектаклни къабул этегенде кёп тюрлю кемчиликлер эсгерилген эди. Спектаклни къаравчугъа гёрсетгенче, уьстюнде ишлеп, танкъытчылар эсгерген кемчиликлени аз этме къасткъылгъаны гёрюне.

Бэланы ролюн ойнагъан Камила Гьажиева оьзюню игитини келпетин, хасиятын къаравчугъа етишдирмеге къаст этди. Къумукъ йырланы таъсирли йырлады.

Баш ролню ойнайгъан Имам Акавутдинов да, гьаман да йимик, оьзюню алдына салынгъан борчну кютюп, демек, келпетни уста кюйде яратып, таъсирли ойнады. Бу спектаклде гиччи рольну ойнайгъан гьаракатлар, гёрюнюшлер аз, шо саялы мунда ортакъчылыкъ этген гьар артистни ролю агьамиятлы деген ой тувулуна. Гертилей де, Казбични ролюн ойнагъан Тимур Умаев, Максим Максимовични ролюн ойнагъан РФ-ни ат къазангъан артисти Байсолтан Осаев, Бий Магьамматны ролюн ойнагъан ДР-ни ат къазангъан артисти Аселдер Аселдеров, шыртчыны ролюн ойнагъан ДР-ни ат къазангъан артисти Пахуртдин Ихивов,  Митяны ролюн ойнагъан Завур Алиев йимик артистлени де айрыча эсгерме сюемен.

Спектакль тамамлангъан сонг магъа Ростов шагьардан гелген театр танкъытчы Александр Пряжников булан лакъыр этме имканлыкъ болду.

Гьар тюрлю регионлардагъы милли театрланы оюну булан ювукъдан таныш театр танкъытчы Александр Пряжников, Къумукъ театрны сагьнасында салынгъан «Бэлагъа» къарагъан сонг, оьзюню пикруларын айта туруп, булай эсгерди:

– Мен милли театрны сагьнасында орус классикни бу асарына гёре салынгъан спектакль болажакъ дегенде, бираз  шеклик эте эдим. Тек спектаклни гёрген сонг, режиссёр оьзюню алдына салынгъан масъаланы чечме, ахырына чыкъмагъа бажаргъанны англады. Озокъда, мунда бираз драма яны оьрчюкдюрюлген. Игитлени келпетлерин буса тындырыкълы кюйде ачма бажарылгъан. Бу спектакль сагьнада биринчи гезик гёрсетиле. Огъар мекенли багьа бермек учун сагьнада бир нече керен  ойналма герек. Умуми кюйде алгъанда, театрны техника ясандырывлары, сеси, декорациялары барысы да бирлешип иш гёргени эс этиле.

 

Патимат БЕКЕЕВА.

 

Авторизация
*
*
Регистрация
*
*
*
Согласны с условиями сайта?
Генерация пароля