Гюлмираны уьстюнлюгю

Къарабудагъгент гимназияда пагьмулу яшланы санаву артсын учун, олар  яшавда оьзлени даражасына гёре ер тутсун учун, «Пагьмулу яшлар» деген программа иш гёрюп тура.

    Оьзлени пагьмуларыны оьр даражасын, муаллимлер береген билимни тасдыкъ этмек учун гимназияны охувчулары район, респуб­лика, бютюнроссия олимпиадаларда, конкурсларда   ортакъчылыкъ эте.

    Кёп санавдагъы пагьмулу яшланы арасында Гюлмира Гьажиеваны атын айрыча эсгермеге сюебиз. Гюлмира Гьажиева – Къарабудагъгент гимназияны 11-нчи класыны охувчу къызы. Бу къыз 1-нчи класдан берли бир де дёрт алмай, бугюнге ерли охувну отличниги болуп охуп тургъан. Гюлмира янгыз яхшы охув булан тамамланып къалмай, кёп тюрлю предметлерден оьтгерилеген олимпиадаларда, ярышларда билимин сынай. Ондан къайры да, ол районну оьлчевюнде оьтгерилеген чараланы ортакъчысы. Мисал этип айтгъанда, район администрациясында оьтгерилеген шатлы жыйынларын Гюлмирагъа юрютмеге тапшурула.

    Бары да предметлерден бир йимик яхшы натижалар булан охуса да, гиччи класлардан берли бу пагьмулу къызны ана тилине ва адабиятгъа бакъгъан сюювю йылдан-йылгъа арта. Гюлмира гьар йыл ана тиллерден оьтгерилеген район олимпиадада уьстюнлю кюйде ортакъчылыкъ эте, биринчи ерлер къазана.

2    013–2014-нчю йылларда буса Дагъыстанны оьлчевюнде оьтгерилеген  олимпиадада эки де йыл 1-нчи ерлеге ес болгъан. Ана тиллени олимпиадасы яшланы билимин, яратывчулукъ пагьмусун сынамакъ муратда, къумукъ тилни даражасын артдырмакъ муратда оьтгерилеген бир гёрмекли чара деп айтма ярай. Неге тюгюл, мунда ортакъчылыкъ этеген яшлар янгыз къумукъ тилни грамматикасындан билимлерин гёрсетип къоймайлы, оьзлени жамият арада тувулунагъан масъалалагъа гёре оьз янашывун ташдырма, оьз ойларын къуруп, язып бажарагъанын да гёрсетмеге герек. Ондан къайры да, олимпиадада ортакъчылыкъ этген охувчу яшлар оьзлени пикруларын яшав мисаллар булан да, къумукъ адабиятдан алынгъан мисаллар булан да исбат этмеге герек.

    Шолай жаваплы сынавлардан Гюлмира Гьажиева уьс­тюнлю кюйде оьтген. Бу пагьмулу къыз ана тилинде сюзюк сув йимик таза кюйде сёйлеп де, оьзюню ойларын тизип язып да, исбатлап бажара. Артдагъы йылланы ичинде республика оьлчевде оьтгерилеген олимпиадада ортакъчылыкъ этеген охувчулары язгъан ишлерини арасында Гюлмираны гьасиллери бары да яшланы гьасиллеринден артыкъ болуп гелген.

    Оьтген йылны ахырында бу къызъяш муаллимлерин, къурдашларын ва кёп сюеген анасын бирдагъы бир гёрмекли натижасы булан сююндюрдю. Гюлмира бютюнроссия оьлчевде пагьмулу яшлагъа кёмеклешив учун оьтгерилеген конкурсда утмагъа бажарды. Конкурсда ортакъчылыкъ этеген кёп санавдагъы пагьмулу яшланы арасында Дагъыс­тандан 35 яшёрюм сайланып, савгъатлар тапшурулгъан. Шоланы арасында Гюлмира да савгъатланды.

    Бу йыл Гюлмира школада охувун тамамлажакъ. Яхшы охуву, жамият ишлерде актив ортакъчылыкъ этегени саялы, ол алтын медальгъа ес болмагъа умуту бар. Гележек  касбусун ол экономика тармакъ булан байлагъан. Тек  бу къызны къумукъ тилге, адабиятгъа, къумукъ миллетине бакъгъан якъдагъы сюювю артса тюгюл, бир заманда да кемимес ва огъар ватанына пайдалы кюйде яшав къурмагъа кёмек этежек деп айтып болабыз.

    Бары халкъгъа белгили кюйде, яшлар – девлетни гележеги ва олай да бизин гележегибиз. Бугюн оланы билимлери теренлешсе, яшавгъа тюз къаравлары токъташса, гележекде олар бу къувунлу дюньяда оьз ерин тутуп, агьлюсюне, юртуна, миллетине, халкъына пайдалы болардай яшав къурма бажаражакъ деген умутубуз бар.

    Биз Гюлмирагъа ЕГЭ-лени де яхшы къыйматлар булан берип, гёз алгъа тутгъан муратларына етмеге, насипли яшав къурмагъа гьакъ юрекден уьстюнлюклер ёрайбыз. Тюз тарбия берип бажаргъаны саялы Гюлмираны анасы Загьидатны  къызыны уьстюнлюклеринден оьктем болмагъа толу кюйде гьакъы бар.

    Шулай къызларыбыз, уланларыбыз кёп болгъан чакъы, миллетибизни даражасы артыкъ болажакъ, иншааллагь!



Ругьаният МУСАЕВА.

Авторизация
*
*
Регистрация
*
*
*
Согласны с условиями сайта?
Генерация пароля