Фольклорну байрамы

Бабаюрт район алдан берли сакълана гелген адатлары ва мердешлери булан бек бай. Муниципал идараларда маданият якъдан чебер иш гёреген коллективлер, фольклор ансамбллер ишлей. Олар юз йыллар алдагъы мердешли маданиятны варислигин сакълагъан.

Маданиятны йылы булан байлавлу болуп оьтген гюнлерде Гьасанай юртда маданиятны ва къумукъ халкъ яратывчулугъуну фольклоруну байрамы оьтгерилгени де сёзлеримни исбатлай.

Халкъ фольклоруну байрамын ача туруп, школаны муаллими Жамиля Гьажиева байрамны  ортакъчыларын ва жыйылгъанланы исси сёзлер булан къутлады ва район  администрацияны ёлбашчысыны орунбасары  Абусалим Абсаламовгъа сёз берди.

– Къумукъланы фольклор байрамыны ортакъчылары, – деп башлады оьзюню сёйлевюн А.Абсаламов, – белгили кюйде, бизде 2014-нчю йыл Маданиятны йылы деп оьтгериле. Мен сизин барыгъызны да бугюнгю байрам булан гьакъ юрекден къутлайман. Бугюнгю байрам районну эсги юрту Гьасанайда оьтгерилегенде йимик, гьар юртда да оьтгерилсе дагъы да яхшы болажакъ. Маданият – халкъны жан азыгъы. Кёп миллетли районубуз пагьмулар булан бай. Шону учун да, бизин ругь байлыгъыбыз, жан азыгъыбыз гьисапланагъан милли маданиятыбызгъа яш наслуну тергевюн бакъдырывгъа, халкъ йырларын сакълавгъа, чебер иш гёреген коллективлени, яш пагьмуланы арагъа чыгъарывгъа районну ёлбашчыларыны янындан гючлю тергев бериле.

Сонг гелинни бийитип, алда йимик огъар 10 манатлар айшабаз ташлайлар. Шо мюгьлетде бизин эсги къумукъ уьйлерде яшагъанланы, къумукъ сарынлар ва йырлар булан оьсгенлени гёзалдына яшлыгъыбыз къайтды, бек ювукъ, аявлу, юрегибизни мююшюнде даимликге сакълангъан яш йылларыбызны эсибизге салды.

Айтгъанлай да, Умрайгьанны оьзюню ортакъчылыгъы булан уьйесилер Рупуш Магьамматова, Бийке Зулпукъарова, Азипат Магьамматова, Зулайха  Гьажиагьматова, Ирайзат Ибрагьимова ва маданият къуллукъчусу Савдат Атавова бырынгъы заманланы эсге гелтиреген гёрюнюшню ажайып арив гёрсетдилер.

Милли фольклорну байрамында халкъ музыка алатланы согъувгъа да айрыча тергев берилди. Шо гюн байрамгъа жыйылгъанлар унутула барагъан агъачкъомузну таъсирли тавушуна къулакъасып тынгладылар.

Байрамны ахырында районну маданият управлениесини ёлбашчысы Рукъуя Абукъаева жыйылгъанлагъа, гелген къонакълагъа разилик билдире туруп, маданиятыбызны аяйгъанлагъа, къол ялгъап кёмеклешегенлеге, оланы арасында «Гьасанай юрт» администрацияны башчысы Абакар Къартгишиевге, сугъарыв управлениени Гьасанай бёлюгюню ёлбашчысы Гьарун Янтыкъовгъа баракалла билдирди.

 

А.Хамавова,

Бабаюрт.

СУРАТДА: байрамдан гёрюнюш.

Авторизация
*
*
Регистрация
*
*
*
Согласны с условиями сайта?
Генерация пароля