Эсде къалажакъ агьвалат

          Бабаюрт район оьзю де бугюн кёп миллетли районланы бириси санала. Районну къайсы юртуна гёз къаратсанг да, оларда къан-сют болуп яшайгъан кёп миллетлени эслемеге бола. Оьзюню халкъыны санаву 5 мингге де етишмейген Адил Янгыюрт бугюн 15-ден де артыкъ миллетни ортакъ уью, гиччи ватаны болуп токътагъан. Чинкдеси, оьзюню эки асрудан оьтген тарихинде юртда миллиара масъалалар болгъан деп айтып эшитген де ёкъ. Эсгерилген фестиваль Адил Янгыюртда оьтгерилгенине себеп шо болмагъа да ярай.

       – Фестивальны гьакъында айта туруп, районну бары да юртларындан гелген охувчу яшлар кёп миллетли Дагъыстанда тиллери башгъа-башгъа буса да, олар да­гъыстанлылар экенни ва бизде тилге тюгюл, инг башлап адамлыкъгъа тергев берилегенни яшдан тутуп билсин учун этилеген чара, – дей фестивальны къурумчуларыны бириси, Бабаюрт район администрацияны яшёрюмлени ишлерине къарайгъан бёлюгюню ёлбашчысы И.Абдуразакъов. – Фестивальда яшлар «Дослукъ» ва «Парахатлыкъ» деген темалагъа композициялар гёрсетежеклер, ана тилинде йырлар йырлажакълар ва милли бийивлени бийижеклер.

           Фестивальны барышында белгили болгъаны йимик, яшлар оьзлени алдына салынгъан талапланы уьстюнлю кюйде кютдюлер. Яшланы гьар чыгъышын зал толгъан халкъ уллу харс урувлар булан къаршылай эди. Чинкдеси, сагьнада кёп миллетли Дагъыстанны тиллеринде нечесе йырлар йырланды, милли бийивлер бийилди. Къумукъ, ногъай, авар, дарги, мычыгъыш тиллерде йырланагъан йырлар къаравчуланы дамагъын гелтирди. Йырлар булан бирге яшланы юреклерине дагъыстанлыланы маданияты да, инчесанияты да гьаман да янаша оьсежекге ва тюрленежекге инаныв бергенге шеклик этегенлер де болмады.

                Фестиваль оьтгерилген 4 сагьат нечик гетгенни къаравчулар эс де этмедилер. Шо сагьатлар, гертилей де, къаравчулар учун да, фестивальны ортакъчылары учун да мюгьлет йимик оьтдю. Фестивальны ахырында буса сёз жюриге берилди.

       – Яшырмагъа негер тарыкъ, бизге бугюн лап да яхшыланы арасындан яхшыланы сайламагъа тюшдю, – дей, фестивальны жамын чыгъара туруп, Бабаюрт районда яшланы яратывчулукъ уьюню директору А.Болатаева. – Буса да, оьзлени чыгъышлары булан къаравчуланы тергевюн тартгъан, къонгуравлу тавушу булан юреклени исиндирмеге болгъан ва къурч бийивлери булан хошландыргъан чебер коллективлени бизге айырмагъа тюшдю. Мени эсиме гелеген кюйде, бугюнгю фестиваль лап да оьр даражада оьтдю. Шогъар гьар коллектив фестивальгъа этген аслам къошуму да себепли. Шо саялы да мен барыгъызгъа да баракалла билдирмеге сюемен ва гьар номинациядан алдынлы ерлени алгъанланы гьакъ юрекден къутлайман.

Жюрини гьисабына гёре, «Дослукъ» ва «Парахатлыкъ» деген композициядан 1-нчи ер Герменчик школаны, «Ана тилде дослукъну гьакъында йыр» деген номинацияда Бабаюртдагъы 2 номерли школаны, «Милли бийив» деген номинацияда буса алдынлыкъны Гьасанай школаны ортакъчылары алмагъа болдулар.

Мени эсиме гелеген кюйде, иш янгыз биринчи ерде тюгюл. Фестиваль яшланы пагьмусун ачыкъдан гёрсетди. Ону ортакъчылары сагьнада оьзлени ойларын, пагьмусун ва бийивге гьюнерин къаравчулагъа етишдирмеге болдулар. Фестиваль ону ортакъчыларыны эсинде узакъ замангъа къалажакъгъа шеклик ёкъ.



Герейхан Гьажиев,


хас мухбирибиз.

Суратда: фестивальны бир мюгьлети.

Авторизация
*
*
Регистрация
*
*
*
Согласны с условиями сайта?
Генерация пароля