Артдагъы йылларда маданиятгъа тергев артып геле. Ерлерде маданиятны адатлы центрлары ачылып тура. Янгыз Хасавюрт районда 4-сю ачылгъан: («Водникде», Гьажимажагьатюртда, Османюртда ва Боташюртда).
Шо агьвалатгъа байлавлу болуп Боташюртгъа баргъанда ерли театрны иши гьакъда маданият уьйню директору Къазбек Зубайыров булан лакъырым болду.
–Бизин юртда драма кружок къурма сюегеник кёп бола эди, – дей ол. – Юртгъа Къумукъ театр гелсе, шону гьакъында жуманы ичинде сёйленип тура эди. Шолай да, бизин юртгъа спектакллер алып Бабаюртну ва Эндирейни халкъ театрлары геле эди. Шолай бир керен яшлар жыйылып, юртда неге театр къурмайбыз деген масъаланы арагъа салдыкъ.
Ойлашмакъ – бир. Ону къурма, сонг пьеса тапма бек къыйын болгъан экен. Нечик де, 1996-нчы йыл 3-нчю мартда «Тангчолпан» деп ат да тагъып, юртда театр-студия къурдукъ.
Шону арадан бир йыл оьтюп, Хасавюрт районну маданият управлениесинде гьисапгъа да алды. Бизге спектакль булан башгъа юртлагъа барып гёрсетмеге ихтияр да берилди.
– Биринчи не пьесаны салдыгъыз?
– Биринчи биз салгъан пьеса Къумукъ театрда ойналгъан эди. О да Магьаммат-Солтан Ягьяевни «Эки сюйген бир болса» деген пьесасы эди. О – бек къужурлу ва жагьиллени сюювю гьакъдагъы пьеса. Барыбыз да шону сайладыкъ.
Ондан сонг, Умукюрсюн Мантаеваны «Юртлу къыз» деген пьесасына гёре спектакль салдыкъ. Сёз ёругъуна айтсам, 2000-нчи йылда шо пьесаны Къаягент район администрациясыны башчысы чакъырып, онда да гёрсетдик. Биз шо эки пьесагъа гёре салынгъан спектакллер булан Бабаюрт, Буйнакск, Къарабудагъгент, Къаягент ва Гьайдакъ районланы юртларына баргъанбыз. Бары да ерде бизин исси къаршылагъан.
2005-нчи йылда коллектив Къарабудагъгентде янгы маданият къала ачылагъан гюн оьтгерилген фестивальда ортакъчылыкъ этди. Бизин диплом булан савгъатладылар.
– Артистлер тапма къыйын болмаймы?
– Нечакъы да бола. Башлап юрт сагьнада ойнама сюегенлер кёп эди, гьали аз. Тюрлю-тюрлю заманларда театрыбызны ишинде Ильяс Садуев, Али Алисолтанов, Супуй ва Сайида Черивхановалар, Элдар Жаруллаев ва Мурат Ногъаев актив кюйде ортакъчылыкъ этген.
Муна гьали де янгыдан «Эки сюйген бир болса» деген пьесагъа гёре спектакль салма сюебиз. Ойнайгъанланы тапгъанбыз, гьали, ролланы да пайлап, охума башлагъанбыз. Спектаклге Мадина Элибиева, Асият Магьамматова, Жаният Алыпкъачева, Яндархан Эшивова, Жамиля Салаватова, Загьмат Умарова, Даният Къадыров ва Ражап Азизов къуршалгъан. Янгы артистлер булан шо пьесаны янгы къайдада онгарма сюебиз.
– Не четимликлер булан къаршы боласыз?
– Сагьнада сурат гёрюнюшлер тапма къыйын бола. Маданият уьюбюзню ярашдырма тарыкъ эди. Юртну башчысы Юсуп Баймурзаевни гьаракаты булан клубубуз мукъаятлы ярашдырылды.
– Премьера къачан болажакъ?
–Йылны ахыры болгъанча салма сюебиз. Шонда башгъа халкъ театрланы ва Къумукъ театрны артистлерин ва режиссёрларын да чакъырма сюебиз. Олар да гелсе ва оьзлени ойларын айтса, бизин театр учун пайдалы болажакъ эди.
–Тутгъан муратларыгъызгъа етишме насип болсун!
– Савбол!
Г. КЪОНАКЪБИЕВ,
оьз мухбирибиз.
Суратда: репетициядан гёрюнюш.
