Дослукъну кёпюрю салынгъан

«Ёлдаш» газетге арбагюн, ноябр айны 23-нде, эртенокъ охувчу яшлар гелип бирдагъы бизин сююндюрдю. Бу гезик «Ёлдашда» къонакълыкъда Къарабудагъгентни 2 номерли орта школасыны охувчу яшлары ва оланы муаллими Маданият Зайналова къучакъларын къутлавлардан ва савгъатлардан толтуруп гелди. Бары да ишибизни де къоюп, хош-беш де этип,  яшланы къутлав программасына баш редакторну кабинетине жыйылып къарадыкъ.



Къутлавланы башлай туруп, Маданият Зайналова «Ёлдаш» газетни къуллукъчуларын гьакъ юрекден газетни 100 йыллыгъы булан къутлады ва булай деди:


–Дагъыстанда биринчи болуп къумукъ тилде чыгъагъан бизин кёп сюеген ва абурлайгъан «Ёлдаш» газетибиз – къумукъ халкъны оьктемлиги, ону ругь байлыгъыгъыны герти белгиси. Газетни гьар номери – къумукъну уьюне гиреген бек абурлу, тезден гёзленип турагъан сыйлы къонакъ. «Ёлдаш» газет 100 йыл оьмюр сюрегени газет тюз ёлда иш гёрегенни исбат эте. Халкъыбызны сююмлю маълумат къуралы буссагьатда да къумукъ миллетни адабият, маданият инче масъа­лаларын газетни бетлеринде охувчугъа етишдире. Газет 1917-нчи йылда чыкъма башлагъан. «Ёлдашны» биринчи редактору – Жалалутдин Къоркъмасов. Ондан сонг бир нече редакторлар да болгъан. «Ёлдаш» газетни гьалиги баш редактору – Камил Алиев, философия илмуланы кандидаты. Газетде 2004-нчю йылда ишлемеге башлагъан. Гьали де ишин узата.


Къарабудагъгент юртну 2 номерли орта школасыны муаллимлери де, охувчулары да газетни яшавунда ортакъчылыкъ эте.  Артдагъы газетни номерлеринде бизин мактапдагъы охувчу яшланы шиърулары басмадан чыкъды. Биз олар булан да оьктем болабыз. Сизин гьаракатчы къуллукъчуларыгъызны бириси, бизин мактапда билим алгъан Разият Ильясова булан да тыгъыс байлавлукъ юрютебиз. Огъар да Аллагь рази болсун.


Маданият Зайналова оьзюню сёйлевюнден сонг охувчу яшлагъа сёз берди. 8-нчи класны охувчусу Сунгур Сунгуров муаллими Мадинат Дакъаевна язгъан «Ана тилим» деген шиърусун бек арив охуду. 11-нчи класны охувчу къызы буса оьзю «Ёлдаш» газетге багъышлагъан шиърусун савгъат этди. 11-нчи класны бирдагъы охувчу къызы З. Батырмурзаевни «Тангчолпан» деген шиърусун чебер кюйде охуду.


Охувчулар янгыз шиърулар булан тамамланып къалмай, биринден-бири алып, «Ёлдаш» газетни ва «Тангчолпан» журналны тарихини гьакъындан билегенин малим этди.


8-нчи, 6-нчы класланы охувчулары П. Салаватова, С. Сунгуров, А. Алиев Магьаматамин Акъмурзаевни «Не татлидир ана тил» деген шиърусундан бир гесекни гёрюнюшюн ойнап, шайлы гёнгюбюзню алды.


Дагъыстанны халкъ шаири М. Атабаевни «Урлангъан ажжал» деген поэмасындан алынгъан гесегинден гёрюнюшню гьазир этгенлер Загьидат Дайгумованы, Мадина Гьажиеваны, Гюлжанат Лопухованы оюну да бизге бек таъсир этди. Давда 3 де уланын тас этген ананы ролюн, уьч мююшлю кагъызлар уьлешеген почтальонну ролюн къызлар пагьмулу артистлер йимик ойнады, гьатта гёзьяшларыбыз да чыгъып тарландыкъ.


Газетни редакциясына гелеген яш къонакълар, гертиден де, ана тилине абур этегени, Ватанын, элин сюегени, ана тилде чыгъа­гъан газетлени, журналланы охуйгъаны аян болду. 


Охувчулар оьзлер гьазирлеген программасы тамамлангъан сонг, «Ёлдаш» газетни баш редактору Камил Алиев яшлагъа «Заман» деген ат булан ажамча язылып тургъан газетни уьлгюсюн гёрсетди. Газетни тарихинден маълумат берди. Булай ёлугъувланы маънасыны, таъсирини ва гючюню гьакъында эсгерди ва баракалла билдире туруп, оьзюню китап савгъатларын тапшурду. Газетни оьзге къуллукъчулары да охувчулагъа оьзлени ойларын ва ёравларын аян этди. Гележекде де «Ёлдаш» газетни ва охувчуларыбызны арасындагъы дос­лукъ беклешежегине инанабыз.

Авторизация
*
*
Регистрация
*
*
*
Согласны с условиями сайта?
Генерация пароля