Дагъыстан бюлбюлюн абурлады


    


Бурлият Ибрагьимованы юбилей ахшамы



Оьтген жумагюн, 13-нчю октябрде, тахшагьарыбызны М.Горькийни атындагъы Рус театрында Россияны ва Дагъыстанны халкъ артисткасы Бурлият Ибрагьимованы юбилей ахшамы оьтгерилди. Театрны уллу залы районлардан, шагьарлардан, юртлардан гелген бизин миллетни ва оьзге миллетлени вакиллеринден, Бурлиятны пагьмусуна гьашыкълардан толгъан. Тенги ёкъ йыравубузгъа шулай абур ва сый, озокъда, тийишли экени гёрюнюп тура.



Юбилей ахшамны юрютеген Дагъыстанны ат къазангъан артисткасы Зугьра Аселдерова юбилярны сагьнагъа чакъыра. Дагъыстанны маданият министри Зарема Бутаева республиканы яратывчулукъ коллективлерини атындан Бурлиятны къутлай.



«Биз кёп сюеген Бурлият Акашимовна, бугюн ва гьар заманда да сиз бизин республиканы лап да уллу сагьнасыны бийкесисиз. Оьзюгюзню пагьмугъуз булан кёп-кёп наслуланы юреклерине тезден ва даимге ёл тапгъансыз. Россияда ва тыш пачалыкъларда Дагъыстанны маданиятыны вакили гьисапда минглер булангъы тынглавчуланы сюювюн ва гьюрметин къазангъансыз. Сизге савлукъ, яратывчулукъ ёлугъузда илгьам ва арты битмес гьаракат ёрайман», – деди З. Бутаева


Сонг ол Дагъыстанны Гьукуматыны Председатели Абдусамат Гьамитов йиберген къутлавну охуду.


«Сиз Дагъыстанны яратывчулукъ интеллигенциясыны гёрмекли вакилисиз. Оьзюгюзню гьайран тавушугъуз ва йырларыгъыз булан Дагъыстанны маданиятына этген къошумугъуз уллу. Элли йылдан да кёп оьмюрюгюзню Дагъыстанны милли макъам инчесаниятын оьсдюрювге багъышлагъансыз. Яш наслугъа оьзюгюзню бай сынавугъуз булан кёп керенлер кёмек этгенсиз, олагъа йыр дюньясына чыкъмагъа болушлукъ яратгъансыз. «Россияны халкъ артисткасы», «Дагъыстанны халкъ артисткасы» деген гьюрметли атлар, пачалыкъ савгъатлар бизин уьлкени, республиканы гьакимиятлары сизин оьр даражада гьюрметлейгенни исбат эте. Сизге савлукъ, насип ва янгы яратывчулукъ уьстюнлюклер ёрайман»,–деп айтыла къутлавда.



Къутлавлардан, хас бёлюкден сонг кёп санавда гелген йыравлар, чебер коллективлер Бурлият Акашимовнагъа багъышлап онгаргъан концерт программа Тёбен Къазанышны «Байтерек» деген эргишилерини хоруну йыры булан башланды. Тёбен Къазанышны къатынларыны хору да Бурлият оьзю йырлайгъан «Айлана дюнья» деген йырны йырлады.



Алданокъ эсгерип къояйыкъ, сагьнада йыравларыбыз йырлагъан йырлар, юбилей ахшамны программасын онгаргъан режиссёр Скандарбек Тулпаровну гьаракаты булан Бурлият йырлагъан йырлардан топлангъан эди. Шо да бизин сююмлю йыравубузгъа этилеген гьюрметни уллу белгиси болуп токътай. Дагъыстанны халкъ артисткасы Зоя Чунаева ва йырав Руслан Загьиров да йырларын юбиляргъа багъышлады ва къаравчуланы харс урувларын къазанды.



Каспийск шагьарда ерлешген «Каспий-Лада» деген къурумну ёлбашчысы Закарья Алимурзаевге сёз берилди. Ол къутлав сёзлер айта туруп, гиччи ча­гъындан берли Бурлиятны йырларына кёп сююп тынглайгъанын айтды. Сонг да, атасы о замангъы «Рекорд» телевизордан Бурлият йырлама чыкъса, ону йырлавундан къуванып, тойларда юрюлеген бизин къумукъ адатгъа гёре телевизорну къырыйына къызыл он манат къысдыра болгъан. Гьар гезик урулагъан шо акъчаны да яш Закарья къурдашлары да булан тюкендеги татлиликлеге харжлагъан. «Гьали сизге шо борчну къайтараман»,– деп, Закарья йыравубузну къутлай туруп, савгъатлар тапшурду.



Къумукъ театрны артистлери Жалал Бекеев ва Зугьра Межитова, алышып йырладылар. Латип Шайипов буса Татам Муратов йырлагъан бырынгы къумукъ йырны йырлады.



Сагьнагъа районланы башчылары чакъырыла. Къаягент районну башчысы Магьамматэмин Гьажиев, Буйнакский районну башчысы Камил Изиев, Къарабудагъгент районну администрациясыны башчысы Агьмат Гьажиев районлуланы барыны да атындан Бурлиятны къутлады. Дагъыстанны халкъ шаири Агьмат Жачаев, шаир Багьавдин Гьажиев буса Бурлият Акашимовнагъа багъышлап язгъан шиъруларын охуду.



Наида Абдулгьамитова ёлбашчылыкъ этеген операны ва балетни хору, Татам Муратовну атындагъы дагъыстан филармонияны хору бырынгы къумукъ йырланы йырлады. Белгили йыравларыбыз Зайнап Абсаматова, Хадижат Ибрагьимова, Рукъият Гьамзатова, Албина Къазакъмурзаева, Гюлханым Гьажиева, Заира Алиева, Зайнап Махаева йырлары булан юбилярны да, къаравчуланы да разилигин алды, харс урувларын къазанды.Къаягентдеги эргишилени хору, Къоркъмаскъаланы эргишилерини хору, Бурлият Акашимовна узакъ йыллар ишлеп тургъан дагъыстан телерадиону хору къумукъ йырланы йырлап жыйылгъанланы разилигин къазанды. Шалуми Матаев ёлбашчылыкъ этеген «Насипли яшлыкъ» деген ансамбль милли бийивлени бийип жыйылгъанланы гёнгюн алды.



Сагьнагъа Бурлият Акашимовна чакъы­рыла. Юртлардан гелген хорланы бары да ортакъчылары сагьнада тизилген. Ортасына сююмлю йыравубузну да алып бирче йыр йырлай. Сонг Бурлиятгъа сёз берилди.



– Шунча йыллар къайсы сагьналарда да болгъанман, тек гьали йимик гьалеклик, тартыныв болмагъан, – дей ол. – Багъышлап къоюгъуз, аявлу тынглавчуларым. Инг де кёп гьюрмет этеген азиз халкъыма, мени абурлап, сююп юрюген тынглавчуларыма гьакъ юрекден баракалламны ва разилигимни билдиремен. Сав болу­гъуз, бар болугъуз! – деди Бурлият Ибрагьимова. Ол бугюнгю шулай шат агьвалатны оьтгерме кёмек этген маданият министерлигине, бары да къол ялгъагъанлагъа, ортакъчылыкъ этгенлеге гьакъ юрекден разилигин де билдирди.



Авторизация
*
*
Регистрация
*
*
*
Согласны с условиями сайта?
Генерация пароля