Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsВ ДагестанеВ РоссииИнтервьюВ миреНа КавказеГлава РДНародное СобраниеПравительствоМинистерства и ведомства Муниципалитеты In memoriamНовости спортаГод культуры безопасности Выборы - 2018ЧЕ-2018 Kaspeuro2018"Времена"ИнфоблокПолитикаИсторияКультураЛюди и время НаукаНовые книгиАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилКроссвордМасхараларТеатрЯнгы китапларЯшланы дюньясы Спорт ярышларЕдиноборства Развитие спортаСоревнованияФК «Анжи» МедиасфераО газетеО сайтеСМИФото дняНаши партнерыНаши спонсорыСотрудникиНаши авторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)
Бажарывлу касбучу

Бажарывлу касбучу

З. Огъурлуева 1958-нчи йыл Борагъан юртда тувгъан. Гьазирлик класдан башлап 8 класны битгенче, Борагъан орта школада охугъан. 1974-нчю йыл ону сегизинчи класын лап оьр къыйматлагъа битип, уьстюнлю кюйде экзаменлер де берип, Грозныйдагъы республика медучилищени фельдшер бёлюгюне охума тюше. Мен огъар:
– Зулай Шамшидиновна, доктор касбуну нечик сайладынг? – деймен.
– 6-нчы класда охуйгъанда, сувукъ тийип авруп, Грозныйдагъы республика азархананы яшлар учунгъу бёлюгюне тюшген эдим. Онда бизин багъагъан сюйкюмлю, яшлагъа бек тергевлю ва гьайлы янашагъан, оьзюне де, сёзюне де бизде уллу иш иманлыкъ тувдурагъан, аврувлар бары да, гьатта онда ишлейген медсестралар да оьзюн кёп сюеген Гваздёвская (атын ва атасыны атын унутгъанман) деген доктор бар эди. Ону гючлю таъсири тартды мени медицинагъа, – дей Зулай Шамшидиновна.
Охувдан да, гьар къайсы загьматдан да тоймайгъан Зулай Шамшидиновна училищеде уьс­тюнлю кюйде охуй. Гьар семестр­ден сонг дегенлей экзаменлени янгыз «бешлеге» берип, къошма стипендия алып охугъан. 1978-нчи йыл З. Ш. Огъурлуева медучилищени лап оьр къыйматлагъа битип, Гюйдюрмесдеги баш ра­йон азарханагъа геле. Азархананы баш врачы «Мычыгъыш Респуб­ликаны ат къазангъан врачы» Нина Антоновна Городинская ону оьзю ишлейген терапевт бёлюгюне медсестра этип белгилей.
– Нина Антоновнаны ёлбашчылыгъы булан ишлемек буса охув да, оьр даражадагъы тарбиялав да болду. Оьз касбусун уллу иш яхшы билегенден къайры, оьз авлетине йимик тергевлю янашыв къура, къатты низамы, оьр даражада культурасы бар адам эди, – деп эсге ала Зулай.
1980-нчи йыл Борагъанда акушеркагъа штат гёрсетилгендокъ, Нина Антоновна, янына да чакъырып, Зулай Шамшидиновнагъа: «Борагъандагъы фельдшер-акушер пунктда (ФАП) акушеркагъа ер ачылгъан, сюе бусанг, сени онда бакъдырып боламан, сюйсенг ерингде ишлеп тур», – дей.
1980-нчи йылдан бугюнге ерли Борагъан ФАП-да уллу иш къастлы ва татывлу коллективде акушерка болуп З. Ш. Огъурлуева да ишлей. Бу медпунктдагъы низам, тазалыкъ, жыйнакълыкъ, тарыкъ-герек техника къураллар булан таъмин этилгенлик къайсы азархана да сукъланардай.
Ингдеси, гелген аврувлагъа ва башгъа къуллукъгъа гелген адамлагъа уллу иш тергевлю янашыву бар. Докторланы кёмеги оланы тергевлю янашыву ва асил рагьмулу сёзюнден башланагъанны булар кёп яхшы англагъанлар. Медицина къуллукъчуланы гьарисини борчлары мекенли белгиленген. Коллективни булай къурумлу ишлевюнде, озокъда, З.Огъурлуеваны гёрмекли пайы бар. ФАП-ны заведующийи У. И. Бекмурзаевге Зулай Шамшидиновнаны гьакъында сорайман.
– З. Огъурлуева – оьзюню касбусун билеген, борчларына уллу иш къастлы ва жаваплы янашагъан, бай сынав топлагъан буса да, токътамай билимин камиллешдире ишлейген къуллукъчу. Гьар гюн ФАП-да ишлейгенден къайры, яшгъа авур къатынланы уьйлерине барып, гьар гюнлюк тергевюнде сакълай, олагъа гьар не кюйде де кёмек эте, насигьатлар бере. Оланы заманында ра­йон азарханагъа яшлар табагъан уьйге бакъдыра. Яшлары булан къайтгъан аналар да, яшлары да айлар булан муну мекенли тергевюнде яшайлар…
Ондан къайры да, ону юртлулар гечени не вакътисинде де, не тюрлю авруву булан да хозгъай. Зулай Шамшидиновна гьеч пушургъанмай биринчи кёмегин эте. Огъар гёре халкъны арасында сыйы, абуру бар.
Коллективде буса оьзю булан ишлейген яш къуллукъчулагъа насигьатчы да дюр. Оьзюню къастлы ва бажарывлу загьматы саялы З. Огъурлуева, гьар йыл йимик гьюрметлев грамоталар ва башгъа тюрлю макътав белгилер булан савгъатлана. 2004-нчю йыл буса ишде етишген уьстюнлюклери саялы З. Огъурлуева «Россияны профсоюзларыны 100 йыллыгъы» деген юбилей, 2010-нчу йыл «Загьмат къоччакълыгъы учун» деген медаллар булан савгъатлангъан... З. Огъурлуева Осман Огъурлуева булан уллу татывлукъда яшап, кёп эдепли уьч улан оьсдюргенлер, охутуп, билим ва тарбия берип, оланы жамиятгъа пайдалы адамлар этип, аякъ уьстге салгъанлар... Биз З. Огъурлуевагъа ишинде дагъы да уллу уьстюнлюклер, насип, яхшы савлукъ ёрап: «Сагъа агьлюнгден, авлетлерингден, авлетлерингни авлетлеринден сююнюп, узакъ оьмюр яшамагъа насип болсун!» – деп айтмагъа сюебиз.

Абас Мамаев.
Борагъан юрт.

Количество показов: 340
07.03.2014 12:59

Возврат к списку









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта