Аз намус тюгюл

Амма тёбенжюнгютейли Сиражутдин Абдуллаев йимик оьз касбусуна берилген муаллимлер бар болгъан сонг, билим ва тарбия беривню ишинде ярты-ярым ишлеге ёл йиберилип битмес.

С. Абдуллаев 1962-нчи йыл Жюнгютейдеги школада 11-нчи класны битдирген. Дагъыстан пачалыкъ университетини 3-нчю курсунда охуп турагъанда, ону асгер къуллукъгъа чакъырып алып гете. 3 йыл болжал битген сонг ол къайтара охувун узата. 1971-нчи йыл ата юрту Жюнгютейде башлап орус тилден дарс беривню башлай. Сонггъа таба ана тилни ва дагъыстан адабият дарсланы юрютюв булан машгъул бола.

Шо гюн-бугюн ол школа булан гьалал кюйде аралыкъ юрюте, юртну жамият яшавунда актив кюйде ортакъчылыкъ этип гелген.

Гетген йыл школаны муаллимлерини умуми жыйынында иш ёлдашлары ону гьаракатын макътагъан ва багьалагъан кюй бек къыйматлы эди. Шо заман школаны директору Б. Атаев, заместители Б. Салагьбекова, ана тиллени муаллимлери Р. Набиева, У. Авлакъова ва оьзгелери ону ишге ягьлы янашагъан кююн суратлап лайыкълы сёзлер айтгъан. Ол оьзюню саламатлыгъы, тазалыгъы ва касбусуна гьалаллыгъы саялы, ругьдан тюшмей дегенлей, буссагьатда да белсенип ишлейгени учун школадагъыланы арасында чы нечик де, савлай юртну халкъыны арасында да абур ва яхшы ат къазангъан.

Оьзю охутгъанлардан Д. Абдуллаева, Б. Салагьбекова, Б. Батырханов оьз заманында школаны алтын медальгъа битдиргени булан ол оьктем бола. Бирдагъы бир агьамиятлы мисал – ону бир замангъы охувчулары Б. Атаев, Н. Атаева, Д. Абдуллаева, Н. Сайпуллаева, К. Межитова, С. Къазиева, Г. Мухтаритдинова, М. Арсланалиева, М. Чопанов ва кёп оьзгелери оьзлени учителини ёлун тутгъанлар. Ол охутгъан нечесе яшлар гьали белгили алимлер болгъан, нечесе яхшы къуллукъларда чалыша.

Ол оьз заманында нечесе белгили муаллимлерден уьйренген, пайдасы тиер йимик гьар не затны да эсге алгъан ва сонггъу ишинде къоллагъан. Ол педагогика ишге тиеген нече илму асарланы, макъалаланы жыйгъан ва ишде сынап къарагъан. Узакъ йыллар ишлеп етген уьс­тюнлюклери учун алгъан грамоталарын, белгилерин, баракаллаларын чы санай да турма­йыкъ. Ол загьматны таза чыныкъгъан гьакъ ветераны.

Бир нече керен юртда депутат да болгъан. Ана тилден ва дагъыстан адабиятдан дарс береген муаллимлени методика бирлешивюню башчысы гьисапда ол ана тилден яшланы билимлерин камиллешдирмек муратда хыйлы къыйын тёге. Ол уьйретген яшлар район ва респуб­лика оьлчевюндеги олимпиадаларда гьар йыл дегенлей савгъатлы ерлер алмай къоймайгъаны да кёп затны англата.

Гетген йыл Буйнакск районну 90 йыллыгъы белгиленеген шатлыкъ мажлисде Сиражутдин Абдуллаевге берилген «Дагъыстан Республиканы школасыны ат къазангъан муаллими» деген ат нечакъы бола буса да гьалал. Арасын бёлмей ва арымай 43 йыл бою муаллим деген атны аз сама сыйдан тюшюрмей загьмат тёкмек гиччи намус тюгюл экенни муалим болуп чалышагъанлар айрокъда яхшы билелер.

Ол абурлу агьлюню башы да дюр. Агьлюсю Солтанат Керимова (Ибрагьим Керимовну къызы) булан булар эки авлетни де тюз ёлгъа салгъан. Солтанат да – Жюнгютейдеги школада орус тилни муаллими.

Уланы Абдулла Дагъыстан пачалыкъ университетни битдирген, Дагъыстан Республиканы адвокат палатасыны адвокаты, юрист илмуланы кандидаты.

Къызы Динара да ДГПУ-ну филология факультетин битип, Жюнгютейдеги орта школада орус тилден ва адабиятдан дарс беривчю болуп уьстюнлю кюйде ишлеп тура.

З. Абдуллаев.

Суратда: «Дагъыстан Республиканы ат къазангъан муаллими» С.Аб
дуллаев

Авторизация
*
*
Регистрация
*
*
*
Согласны с условиями сайта?
Генерация пароля