Асрулардан къалгъан бизге асил сёз

Бир къысгъа сигьрулу калималарда нечесе девюрню гьакъылтёбелери –етти бабаларыбызны яшав сынавларыны, къаравларыны натижасы, кёп теренге гетген оьр даражалы гьакъылы, тюгенмес байлыгъы топлангъан. Шонда халкъны къыйыны да бар, къуванчы да бар, тынчы да, савлай оьмюрю де бар. Гьасили, сыйлы маъна береген сёзлерде биз кимлер экенибиз де, не булан машгъул болгъаныбыз да, оьзге миллетлер булангъы аралыкъларыбыз да ачыкъ кюйде суратлана.

Етти атабыздан, наслудан-наслугъа бериле къалгъан айтывлагъа, аталар сёзлеге сыйлы варислик деп айтагъаныбыз да негьакъ тюгюл чю. Мен чи олагъа багьасы ёкъ асил калималар деп айтажакъ эдим.

Оьзюгюз ойлашыгъыз, багьасы боламы дагъы, эгер олар бугюнде де, энниден сонг да гючюн тас этмежек философия ою булан бизге яшав-туруш да гечеги юлдуз йимик ёл гёрсете  буса.  Мен айтывланы гьакъында не учун лакъыр юрютегенимни маънасын англагъан бусагъыз да ярай.

Гьюрметли охувчулар, сиз де шагьат болгъан кюйде, газетде тюрк халкъланы айтывларын  ана тилибизге таржума этип, берип турдум. Шо айтывлар бирдагъылай бизин тюрк халкъланы  тарихи, маданият, къылыкъ, адат тюп кюрчюлери бир экенни исбатлай.

Ашайгъан ашыбыз, гиеген опурагъыбыз, яшав шартларыбыз, турагъан элибиз башгъа буса да, амма бары да тюрк миллетлени халкъ авуз яратывчулугъуну, айтывларыны маънасы– бир.  Ата-анагъа, уллулагъа, элине, халкъына сююв, гьюрмет этив, уьй-ожакъ къурув, яшлар оьсдюрюв, савлугъубузну гьайын этив, яшавну, оьлюню гьакъында ойлашыв.

Айтывланы тюп тамурларын ахтара туруп, лап да белгилилери бары да  тюрк миллетлерде эркин къолланагъанын гьис этдим. Мисал учун, «Башынг бар буса, бёрк табылар», шу къайдада къумукълар да, ногъайлар да, уьзбеклер де, къыргъызлар да, оьзгелер де айта. Сонг: «Айтылгъан сёз – атылгъан окъ». Булай маънада къумукълар, ногъайлар, къазахлар, азербайжанлылар къоллай. Булай кёп мисалланы мен узатмагъа болар эдим.

Бирдагъы затны эсгерме сюемен. Мен гьар тюрк миллетни намусгъа, Ватангъа, адат-къылыкъгъа багъышлангъан айтывларын Интернетге салгъан эдим. Онда уьзбек къардашыбыз бетлев этип, мени халкъымны айтывун къыргъызлагъа къошгъансыз деп сесленген эди. Огъар олай айтыв янгыз сизде тюгюл, оьзге къардаш къавумларыбызда да бар деп жавапландым. Мисал учун, «Сабур тюбю сари алтын» кимникидир дагъы деп сорадым? О да бизин айтывубуз деп чыкъды. Бу айтыв буса бары да миллетлерде  ёлугъа. Къарагъанда, гьали буссагьатда да кёплер биз бир тамурлу миллетлер экенни англап битмей тура. Меники-сеники деп тарт-соз этмейли, халкъ авуз яратывчулугъубузну жан ва къан къардаш халкъларыбызны айтывлары булан толумлашдырсакъ, нече де асувлу иш болур эди.

Авторизация
*
*
Регистрация
*
*
*
Согласны с условиями сайта?
Генерация пароля