Жаваплы къуллукъгъа байланып…


Абурлу-сыйлы ва къыйын муаллимни касбусун танг­лап, огъар гьакъ юрекден берилип загьмат тёгегенлер булан биз оьктем болабыз. Гьали мен оьзюню гьакъында язма сюеген Къакъашура юртну 1 номерли орта школасыны директору Равзанат Жагьбаровна Нуритдинова – оьз касбусуна гьакъ юрекден берилген адамланы бириси. Бу асил къылыкълы къызны юртлулары яхшы таный. Ол юртдагъы инсап­лы белгили адамланы ожагъында оьсген, тарбиялангъан, яшавдагъы биринчи адилли абатларын оланы алдында алгъан.


 


Ачыкълашдырып айтгъанда, Равзанат Къарабудагъгент районну Къакъа­шура юртунда 1980-нчи йыл 29-нчу декабрде татывлу агьлюде тувгъан. Оьзюню тенглилери булан 10 класны яхшы къыйматлар булан тамамлай. Дагъыстан пачалыкъ педагогика институтну физика-математика факультетине охума тюше. Ол охувун яхшы къыйматлагъа тамамлай.



1997-нчи йылда Къакъашура юртда 1 номерли орта школада физика ва математика дарсланы юрютмеге башлай. Арадан кёп заман да гетмейли, 2002-нчи йыл охув ожакъны Равзанат директоруну охув ишлеге къарайгъан заместители этилинип белгилене. Ол школаны охувчу яшларына толу билим, тюз тарбия бермек, оланы гележекге гьазирлемек учун оьзюню бары да гючюн сала. Яш муаллимлеге методика якъдан кёмек эте. Ол янгыз школаны коллективине тюгюл, савлай ата юртуна уьлгю бола. Равзанатны уьстюнлю натижалары ва гьаракатчылыгъы аянгъа чыгъа. Шо саялы районну ёлбашчылары 2008-нчи йыл ону эсгерилген охув ожакъны директору этип белгилей.



Равзанатны атасы Жагьбар Нуритдинов да кёп йылланы узагъында ата юртунда савлай Дагъыстангъа белгили колхозда автомеханик болуп ишлеп тургъан. Халкъ арадагъы къайратлы загьматы булан юртну халкъыны абурун къазангъан. Жагьбар агьлюсю Ниярханым булан 5 яшны оьсдюрюп ва тарбиялап, оьр билимлер де берген.



Равзанат Нуритдинова ёлбашчылыкъ этеген школаны коллективи билим ва тарбия беривде районда ал сыдыраларда юрюме башлай. Ол ёлбашчылыкъ этегенли школаны охувчулары район олимпиадалардан районну школаларыны арасында алдынлы ерлерде юрюй. Яхшы ва гьаракатчы ишлери саялы Равзанат Нуритдинованы атына район, республика оьлчевлердеги гьюрметлев грамоталар ва дипломлар берилген.



Инаныгъыз, бу ёлдашны гьаракатына, бажарывлугъуна къарап, мен нече керенлер мюкюр болгъанман. Айтагъаным, школаны ичине гиргенде, мундагъы методика стендлер, фотомонтажлар къарагъанны къурчун къандыра, тарихлерде болуп гетген агьвалатланы эсге сала. Инг аслусу, тематика планларын тизивде де ол янгы, гьалиги заман талап этеген ва билим беривню оьзге янгы ёлларын табып тизе. Школада оьтгерилген байрамлар, ачыкъ дарслар, оьзге чаралар, викториналар, охув конференциялар ва байрамлар оьр даражада оьтгериле. Ол охувчу яшланы ата-аналарыны разилигин къазана.



Равзанат юртну, районну жамият ишлеринде де жагь кюйде ортакъчылыкъ эте. Гьаракатны шавласы яйылып болма ярай, гьали-гьалилерде Равзанатны яшавунда сююнчлю агьвалат болду. Ол охувчу яшлагъа уьлгюлю билим ва тюз тарбия берегени саялы «Дагъыстан Республиканы билим беривюню отличниги» деген сыйлы атны да алды. Шондан къайры, огъар республиканы билим берив ва илму министерлигини гьюрметлев грамотасы тапшурулду.



Биз, Къакъашура юртну 1 номерли орта школасыны коллективи, Равзанат Жагьбаровнаны иш ёлдашларыны арасында абур-сый, гьюрмет къазанмагъа бажарагъаны, абурлу ат берилгенлиги булан гьакъ юрекден къутлайбыз. Гележекде жаваплы ишинде дагъы да уьстюнлюклер ёрайбыз.



 

С. Жамукъов,

Дагъыстан Республиканы билим беривюню отличниги.



Авторизация
*
*
Регистрация
*
*
*
Согласны с условиями сайта?
Генерация пароля