Яш суратчы Муталип


Яш суратчы Муталип Атавов Бабаюрт районну Янгы Коса юртунда яшай. Ону аты айлана якъгъа аян болмажакъ эди, эгер де мен оьзюм ону суратларын гёрмеген бусам.



Муталип оьзюню гьакъында ва суратгъа гьюнери барны гьакъында хабарлама сюймей.



Ол дёртюнчю класны охувчусу. Муталип мелте чагъындан башлап сурат этме муштарлы болуп оьсген. Гьар къайсы яш да сурат этмеге сюе деп санайман. Бирлери бу сюювню сёнме къоймай, оьр класларда да гьасиретлигин сакълай. Муталипни суратларында буса ону яшавгъа оьзтёрече къаравун сезмеге бола. Огъар илгьам ва ругь береген, озокъда, ана табиат. Бу ерде эсгерме тийишли гёремен, Муталип Атавов Каспий денгизни лап да гёзел ва гьайран бучагъында – Аграхан къолтугъунда яшай.



Яш чагъындан башлап сурат этмеге пагьмусу бар яшны ата-анасы ва муаллимлери гьис этип, огъар кёмек этген. Ону гьар суратда яшавгъа оьзтёрече къараву сезиле. Муталипни суратларына къарап, кёп заман сукъланасан ва гьайран къаласан.



Бир-бирде сурат этмек учун, Муталип пластелин ва оьзге алатланы къоллай. Мени тергевюмню тартгъан шишаны уьстюнде пластелин къоллап этген суратлар эди.



Табиатдан къайры, ону суратларыны игитлери – мультфильмлерден ва ёммакълардан. Уьй ва къыр жанланы суратларын этмеге де ол оьтесиз уста.



Муталип оьзге яшлар йимик, школагъа да бара, бош заманында къувалап топ да ойнай. Школада да ол яхшы ва лап яхшы къыйматлар алып охуй. Школаны жамият яшавунда да ортакъчылыкъ эте.



Муталип Атавовну сураты школадагъы гьюрметлев досканы да безей.



Бэлла Гьажигелдиева, РФ-ни журналистлерини союзуну члени.

Суратда: Муталип Атавов.



Авторизация
*
*
Регистрация
*
*
*
Согласны с условиями сайта?
Генерация пароля