Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsВ ДагестанеВ РоссииИнтервьюВ миреНа КавказеГлава РДНародное СобраниеПравительствоМинистерства и ведомства Муниципалитеты In memoriamНовости спортаГод культуры безопасности Выборы - 2018ЧЕ-2018 Kaspeuro2018"Времена"ИнфоблокПолитикаИсторияКультураЛюди и время НаукаНовые книгиАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилКроссвордМасхараларТеатрЯнгы китапларЯшланы дюньясы Спорт ярышларЕдиноборства Развитие спортаСоревнованияФК «Анжи» МедиасфераО газетеО сайтеСМИФото дняНаши партнерыНаши спонсорыСотрудникиНаши авторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)
Къуруду  булакъ … Шемше басды боюндагъы ташларын…

Къуруду булакъ … Шемше басды боюндагъы ташларын…

   

Пятница, 27.04.2018г. - "ЁЛДАШ".


Бадрутдин Магьамматовну гьакъында


 

Къайгъылы хабарны эшитгенде, инанып да битмедим. Болагъан зат тюгюл! Ерден гёрюнмейген гюч булан къайнап-къайнап чыгъып турагъан булакъ бирден къуруп къалмагъа боламы?!


Бола экен… Хапарсыздан эшитилген яман хабар герти болуп чыкъды…


Ювугъум Бадрутдин булан мен 35 йыллар алда таныш болгъанман. О заманларда мен Къаягент районда комсомол, сонг да партия къурумларда ишлей эдим. Шо заман язывчуланы ва шаирлени республика союзундан   районлагъа «агитбригадалар» йиберегени совет девюрде ишлегенлени яхшы эсиндедир. Ишим булан байлавлу болуп мен районгъа гелгенлени загьмат коллективлеге, школалагъа ёлугъувлар этмеге алып айлана эдим. Шо заман байлангъан Бадрутдин булангъы бизин ювукълугъубуз дагъы уьзюлмеди. Тек нетесен, адам къысматын алышдырмагъа болмай.


Бадрутдин биз яшайгъан Гьюсемегент юртгъа гьар заман шат кюйде, иштагьлыгъы булан геле эди. Ол бизге гелсе, уллу байрамгъа йимик уьюбюзге бары да дос-къардашларым жыйылагъаны унутулмай. Тухумларыбызны арасындан эшитмегенлени бизге хатири къалагъан гезиклер де болду. Масхара-йыбав эте туруп, орта гечелерден айланып гете эди. Ондан сонг да, йыбавдан тоюп болмай, бирлери гече къалмагъа Бадрутдинни оьз­леге алып гетегенин гьюсемегентлилер биле.


Гьар эки-уьч йылны ичинде Бадрутдинни Гьюсемегент орта школаны охувчулары ва муаллимлери булан бир сама ёлугъуву бола эди. Оьзю янгыз гелип къалмай, шо ёлугъувлагъа ол дагъы да къумукъ шаирлени, язывчуланы ва алимлени алып гелеген гезиклер де болду. Олар оьзлени асарлары булан таныш эте туруп, поэзияны, къумукъ тилни тазалыгъы, сююв, Ватаныбыз, къумукъланы тарихи ва бугюнгю гьалы гьакъда хабарлайгъаны унутулмай. Юртлу охувчуларыбыз буса къумукъ шаирлени шиъруларын охуй ва йырларын йырлай эдилер. Пайдалы шо ёлугъувлар юртлуларыбызны эсинде кёп замангъа къалар деп эсиме геле.


Белгили къумукъ алимибиз Нураммат Оьлмесов айтгъанлай, «Бадрутдин къумукъ сёзню аривлюгюн, маъна якъдан теренлигин, къаттылыгъын гёрсетип къоймай, халкъны къагьруманы болуп, ону тили булан ругь дюньясын гётере, юреги булан ону къыйынлы ва шат гюнюне табыла. Къоркъач шаир игит асар яратмагъа бажармай».


«Мени сёзюм намусумну артында,

Отда бишип сугъарылгъан нал йимик.

Ялгъанчыгъа авузланма тартына


Герти досгъа созула о бал йимик», – деп язгъан дёртлюгюнде Бадрутдин оьзюню хасиятын суратлай деп эсиме геле. Яшавуну ахыр гюнюнде мен табулмайгъанны сав заманында ону жаны биле болгъан бугъай:


«…Сен чи мени гёмме сама гелмединг,

Гьалал болсун къазгъанлагъа

къабурум…»,

– деп язгъан ол.


Геч, ювугъум, етишмеге болмадым. Яман хабарны мен Дагъыстандан арекде эшитдим. Гертиден де, Бадрутдин юреги авуртагъанны артгъа тартмай айта эди. Ону хасиятында яравкеликни, ялгъанны мен гьис этмедим. «Халкъ шаири» деген атгъа ес болма да,балики, хасиятлары огъар пуршавлукъ этгендир.


Ювугъум Бадрутдинден мен эшитген кюйде, «Къарабудагъгент район» деген муниципал къурулувуну администрациясы огъар шо атны беривге байлавлу эки керен таклиф этген. Тек шо таклифлер жавапсыз къалгъан.


Бадрутдин янгыз къумукъланы арасында белгили болуп къалмагъан. Ону абурун тыш пачалыкъларда да оьрге гётере эди. Темиркъазыкъ Кавказда янгыз бир Бадрутдин, Тюркияда болгъан тюрк миллетлени вакиллерини жыйынында тап-таза къумукъ тилде сёйлеп, президент Р. Эрдогъанны къолундан савгъат алгъан.


… Яз вакъти, эки айда бир сама Бадрутдин Гьюсемегент юртгъа геле эди. Оьзю гелмесе, биз чакъыра эдик. Гьамри оьзенни гьавасындан тоюп болмайгъан, ону боюнда ерлешген емиш бавларыбызны бек ошатагъан, инамлы къурдашлыкъны бек тизив юрютюп бажарагъан ювугъубуз булан ягъып арив от да, гечортадан айлангъынча йыбав эте къала эдик. Юртда болгъан масхара хабарланы къайтып-къайтып айтдыра туруп, ол оьзю булан гелген къурдашларына: «Мени Гьюсемегент юртда шаптал, алма, юзюм бавларым бар», – деп макътанагъанын нечик унутарсан?!


Бадрутдинни яхшы таныйгъан гьюсемегентлилер булан бирче «Тюзлюкню шавласы» деген Къаягент район газетни баш редакторуну заместители Магьамматзапир Темирбеков, Хасавюрт район администрациясыны къуллукъчусу Гьасан Ахавов, Къарабудагъгент   районну администрациясыны къуллукъчусу Жамалутдин Имакъов ва оланы авлетлери белгили шаирибизни эсинден тайдырмагъа болмас деп эсиме геле.


Отуз йыллар алда Бадрутдин Гьюсемегентде магъа багъышлап булай шиъру язгъан эди:


«Танып болмадым сени,

Сынадым нече керен.

Къумукъ оьзен йимиксен –

Суву кёп, тюбю терен».


Биз Бадрутдинни яхшы таныдыкъ. Ол эди къумукъ булакъ да, оьзен де, денгиз де.


Булакъ къуруду, тек ону сувуну татыву минглер булангъы къумукъланы тама­гъында даимге къалажакъ…


 

Бадрутдинни къурдашларыны атындан Яношкадар БОТАЕВ, бавчу.

Къаягент район, Гьюсемегент юрт.

Автор гонорарын газетни

редакциясыны пайдасына къоя.


 

 

Бадрутдинге багъышлайман


 

Мен анадан тувгъанман,

Къумукъну яшы болуп.

Шу дюньядан гетермен

Къумукъ атымны къоюп.


 

Аявлу агъам, Бадрутдин,

Нече керен олтурдукъ,

Радиодан сёйлетип,

Байлыгъыбыз толтурдукъ.


 

Камил Адилханов.

Буглен юрт.



Количество показов: 229
Автор: YOLDASH.news
27.04.2018 12:50

Возврат к списку









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта