«Йыр дюньям»

 


«Дагестан» деген издательс­кий уьй шулай баш булан шаир Жават Закавовну къумукъ ва орус тилде сайламлы асарларын китап этип чыгъаргъан. Къумукъ охувчу шаирни «Ёлдаш» газетде, «Тангчолпан» журналда чыкъгъан шиъруларындан таба тезден берли таный.


 


Ону «Ай ярыкъ гечелер» деген биринчи китабы да 2006-нчы йыл чыкъды. Биринчи китабындан сонг Жават Закавов поэзияны тармагъында берекетли кюйде ишлеме башлады. Гьар тюрлю йылларда къумукъча ва орусча беш китап чыгъарды.



Янгы китапны аслам пайын къумукъча берилген шиърулар ала. Сайламлы асарларын охувчуну тергевюне бере туруп, автор алда чыкъгъан китапларындан оьзю сайлагъан шиъруланы да ерлешдирген. Китап «Аталар да аналардай аявлу» деген бёлюк булан башлана. Мунда аталагъа ва ата юрту Тёбен Къазанышгъа багъышлангъан шиърулар бар. «Ата юрт–атанг, ананг…» деген шиърусунда шаир:


Ата юрт – етти атам–


Башлап–къазыкъ къакъгъан ер!


Бав салгъан, сабан сюрген,


Тузлу тери акъгъан ер деп яза.



«Биз яшайбыз гележекге умутда», «Йыр дюньяма йырлай туруп элтермен» деп ва башгъа башлар салынгъан бёлюклер мунда етти бар. Оларда ерлешдирилген асарлар инсанлыкъ, намус, гьалал загьмат, Элге бакъгъан якъдагъы зор сююв, анадаш къумукъ халкъ, ону тарихи, бугюню, гележеги, макътавгъа лайыкълы уланлары, къызлары гьакъда чебер сёзню гючю булан охувчуну тергевюн тарта.



Орус тилге таржума этилген асарлардан топлангъан бёлюкню республикада белгили таржумачылар Юлия Зачёсова ва Надежда Тузова гёчюрген. Шо бёлюкге «Пленник любви» деп баш салынгъан. Жават Закавовну поэзиясында лирика аслу ерни тута деп айтма ярай. Элине, ата юртуна, ону табиатына, сюйгенине, агьлюге, ата-бабалардан къалгъан адатлагъа сююв шаирни шиъруларында мунаман деп гёрюне. Къумукъ ва орус охувчулар учун бу китап – къыйматлы савгъат.



Авторизация
*
*
Регистрация
*
*
*
Согласны с условиями сайта?
Генерация пароля