Оьр пагьмулу актрисабыз унутулмай


   Январ айны 16-сында къумукъ халкъны сююмлю артисткасы Барият Солтанмежитовна Муратова тувгъанлы 105 йыл битди. Ол Буйнакск районну Тёбен Жюнгютей юртунда, къумукъ миллетге маданиятны ва инчесаниятны тармагъында белгили, пагьмулу адамлар савгъат этген Муратовланы агьлюсюнде тувгъан. Барият гиччи чагъындан берли сагьнагъа чыкъгъан ва ахырынчы гюнлерине ерли, оьзюню сексен йыллыкъ оьмюрюню боюнда инчесаниятны тармагъында, сагьнада чалышгъан.



Барият Муратова къайсы рольну ойнай буса да, оьзюню оьр пагьмусу булан къаравчуланы тамашагъа къалдырып ойнай эди. Ол «Молла Насрутдинде» Жумайсатны кюлкюлю келпетин де, Шекспирде Жюльеттаны да, Гь. Рустамовну «Терек тюпде» деген спектаклинде Шакирханны да, Ч. Айтматовну «Ана топурагъында» уланын тас этип къайгъы басгъан, тек чыдамлы юрекли ана Толгъанайны, «Айгъазиде» Гюлкъызны да ва кёп-кёп келпетлени уста кюйде яратып, къаравчуланы сюювюн, абур-сыйын, уллу разилигин алма бажаргъан. Сагьнагъа Жумайсатны ролюнда Барият да, Тажутдин Гьажиев де чыкъгъандокъ, къаравчулар оланы гючлю харс урувлар булан къаршылай эди.



Оьзюню бажарывлугъу ва пагьмусу булан ол сагьнада биринден-бири къужурлу, биринден-бири къайгъылы эки юзден де кёп келпетлер яратма болгъан. Огъар 1936-нчы йыл республикада биринчилей Дагъыстанны халкъ артисткасы деген ат берилген. Шолай да, Да­гъыстанда биринчи болуп ол СССР-ни халкъ артисткасы деген атны да алгъан.



С. Станиславскийни савгъатыны лауреаты, кёп орденлер ва медаллар булан савгъатлангъан Барият Солтанмежитовна оьзюню бар-барлыгъын, пагьмусун, гьюнерин анадаш халкъына багъышлап, яшавуну ахырынчы гюнлерине ерли оьзю кёп ушатып танглагъан касбусуна амин болуп юрюдю. Шону учун ону халкъ да сюе эди. Ол даим де инчесаният тармагъында бизин миллетни ярыкъ юлдузу гьисапда халкъны эсинде къалажакъ.



Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля