Жабля бин аль-Айхам – гьасанитлени башчысы – оьзю Ислам динни къабул этгенни гьакъында билдирген ва Умар бин Хаттабны уьстюне пачалагъа хас кюйде безенип ва оьктем кюйде гелген. Умар ону къуванчлы кюйде къаршылагъан ва абурлап къабул этген.

Бир керен Жабля бин аль-Айхам, Аллагьны Уью – Каабаны дёгерек айланагъанда ону исбайы опурагъына бану Фазар къавумдан кимесе бир бедуин аягъы булан тие. Шо мюгьлетде ол сыпатына къапас ала. Бедуин муъминлени башчысы Умар бин аль-Хаттабгъа арз эте, ол Жабляны чакъырма буюра. Халипа оьзюне хас, адилли кюйде, къатдырып, оьзюню дуванын этип: «Къыйыкъсытылгъан адамны ра­зилигин ал, яда ол сагъа да шолай къапас-юмурукъ уражакъ», – дей.

Жабля бин аль-Айхам шону хорлукъ гьисап эте ва оьктем кюйде: «Сиз пачаны да, къарахалкъны да аралыгъын эс этмеймисиз дагъы?!» – деп билдире. Шогъар Умар: «Этмеймен, сиз Ислам динни алдында тенгсиз», – деп жавап бере. Жабля, давам этип: «Шолай болгъанда мен хачпересликни къабул этежекмен», – дей. Халипа: «Буса мен сени башынгны гесежекмен», – деп къоша.

Жабля Умар бин Хаттабны къаттылыгъын, пик­русундан тайышмайгъанын гёргенде, ол халипагъа дагъы гюнге ерли болжалны узатмакъны тилей ва шо гече Византия империяны тахшагъары Константинополгъа къача ва Ираклийге къошула.

Магьаммат АБУЕВ.