Аслам натижаланы байрамы

  


«Йылны адамы» деген оьр ат ва савгъатлар тапшурулду



Республикада уллу районлардан гьисапланагъан Къаягент район артдагъы йылларда юрт хозяйствону тармакъларында етишген уьстюнлюклери булан, илму, маданият, билим берив, спорт тармакъларын оьсдюрювдеги натижалары булан да белгили. Девюрню четим гьалларына да къарамайлы, гьар йыл декабрны экинчи яртысында Къаягент районну администрациясыны, депутатларыны район жыйыныны ёлбашчыларыны сиптеси ва гьаракаты булан сав йылны узагъында этилген ишлеге къыймат бериле, натижалагъа гёре алдынлылагъа «Къаягент районда «Йылны адамы» деген оьр ат ва савгъатлар тапшурула.



Яхшы мердешге айлангъан уллу чарагъа Къаягент район администрациясыны ёлбашчылары, къуллукъчулары гьар йыл тындырыкълы гьазирлене. Алдагъы йыл Магьачкъала шагьарда къумукъ театрны залында оьтгерилген эди, бу йыл байрам чара Янгыкъаягентде оьтгерилди.



Сонгугюн район центры Янгыкъаягентде администрацияны алдындагъы майданда уллу жанланыв гьис этиле башлады. Сагьат 9-гъа таба майдангъа юртлардан гелгенлер жыйылды. Узакъ заман гетмей, олагъа хоншу районлардан, республиканы тахшагьары Магьачкъаладан гелген къонакълар ва гьакимбашлар да къошулду. Гелгенлени арасында Дагъыстан Республиканы юрт хозяйство ва ашамлыкъ министрини къуллукъларын кютеген К.Абасов, физкультура ва спортгъа къарайгъан министрини къуллукъларын кютеген М. Магьамматов, милли политикагъа къарайгъан министрини къуллукъларын кютеген Т.В.Гамалей, оьзге жаваплы къуллукъчулар гёрюндю.



Бу йыл район майданны айлана бою булан районну гьар муниципал къурулувуну чатырлары, оланы ичиндеги районну авлакъларында оьсдюрюлюп гелген юрт хозяйство продукция булан толгъан столлар, умуми гёрюнюш чакъы­рылып гелген къонакъланы тамаша этди десек, янгылыш болмасбыз деп эсиме геле.



Сагьат 12-ден айлангъан сонг Янгыкъаягентдеги Россияны халкъларыны мердешленген маданият центрыны залында байрам чараны аслу бёлюгю башланды. Къаягент районда «Йылны адамы» деп токъташдырылгъанлагъа савгъатлар тапшурулду.



Шатлыкъ чараны Къаягент муниципал къурулувуну баш­чысы Магьамматэмин Гьа­жиев юрютдю. Оьзюню къысгъа сёйлевюнде районну загьматчылары, медицинаны, маданиятны къуллукъчулары, муаллимлени коллективлери, спортчулар етишген уьстюнлюклени гьакъда айтды, гелген къонакълагъа разилигин билдирди.



Сонг сагьнагъа арт артындан «Къаягент районда «Йылны адамы» деген савгъатланы ессилери, район администрацияны экономика бёлюгюню ёлбашчысы И.Агьматпашаев, финанс бёлюгюню ёлбашчысыны орунбасары А.Алиев, «Башлыгент юрт» муниципал къурулувуну башчысы М.Гьажиарсланов гётерилди.



Юрт хозяйство Къаягент районда баш тармакъ гьисаплана. «Кировский» деген пачалыкъ унитар предприятиени ёлбашчысы Бурлият Гьажиеваны, «Янгывикъри» деген СПК-ны ёлбашчысы Къурбан Жабрайыловну, «Каспий» ГУП-ну механизатору Магьамматшарип Абдуллаевни атлары охулгъанда залгъа жыйылгъанлар гючлю харс урмагъа башлады. ДР-ни юрт хозяйство министрини къуллукъларын кютеген Керимхан Абасов алдынлыланы гьарисине белгиленген савгъатлар булан бирге министерликлени Гьюрметлев грамоталарын да тапшурду, къутлады ва гележекде уьстюнлюклер ёрады.



Магьамматсадир Ибрагьимов, Ольга Горновская районда белгили адамлар. Биринчиси Папас бойдагъы Аччы кёлню ижарагъа алып, 2 йылны ичинде ону жанландырма, безендирмеге бажаргъан. Ольга Ильинична буса кёп йылланы узагъында район администрацияны билим берив бёлюгюнде чалыша, макътавгъа лайыкълы адам.



Марат Къадиевге 31 йыл битген. Ол «Байкал» деген фермер хозяйствону башчысы. Бу йыл юзюм бавларыны гьар гектарындан орта гьисапда 350 центнер юзюм къайтаргъан.



Оьзюню авурлугъунда тутушуп ябушувда Европа ярышларында къаршы чыкъгъан кочаплагъа бир бал да бермей биринчи ер къазангъан Ильяс Бекболатов савлай Россияны, Европаны, дюньяны тамашагъа къалдырды.



26 йыллыкъ гьюсемегентли улан Али Магьамматов 2017-нчи йылны ноябр айында Къазан шагьарда бешинчи керен «Дюньяны чемпиону» деген оьр атгъа ес болду. Оланы ва оьзгелерини гьакъында дагъы да кёп макътавлу сёзлер айтма бола.



Къаягент районгъа биринчи гезик гелген иш къурдашыбыз Разият Гьажиеваны, оьзге къонакъланы айтывуна гёре 3-нчю гезик оьтгерилген «Къаягент районда «Йылны адамы» деген байрам чара оьзюню маъна, чебер ягъындан жыйылгъанлагъа бек таъсир этди. Оьзлени о гьакъдагъы ойларын ДР-ни физкультура ва спорт министри М. Магьамматов ва оьзгелери де сагьнада сёйлейген вакътисинде айтдылар.



Районну жамият яшавунда айрыча ер тутгъан уллу байрам чараны къыйматлавубузну макътав калималар булан тамамлап къоймай, чараны гюнлеринде ва алда гелген ойларыбызны да айтмагъа сюебиз. Уллу байрам чарагъа гьазирлик гёрюв гертиден де тегиш оьтмеген. Байрам чараны оьзге кюйде оьтгерив ойлар, пикрулар, берилген таклифлер де болгъан. Мисал учун, савгъатлагъа гёрсетилген адамланы санаву кёп. Къаягент район юрт хозяйство район, шону учун савгъатланагъанлар кёбюсю гьалда юрт хозяйствода чалышагъанланы арасындан болмагъа тарыкъ эди.



Байрам чараны алдындагъы гюн оьтгерилген жыйында кемчиликлер гьакъда айта туруп, ра­йонну башчысы М.Гьажиев янгы 2018-нчи йыл оланы барысына да тындырыкълы къарамагъа къасты барлыгъын билдирди.

 

Авторизация
*
*
Регистрация
*
*
*
Согласны с условиями сайта?
Генерация пароля