Савлукъ табиатны гьалындан гьасил


Хасавюрт орманлыкъ хозяйствону ишлери гюзге таба да кемимей. Эгер де яйда аслу гьалда от тюшювню алдын алмакъ учун чаралар гёрюле буса, гюзде янгы тереклер орнатыв булан машгъул бола. Сёз ёругъуна айтсакъ, Хасавюрт орманлыкъ хозяйствону табилигинде
15004 гектар ер бар. Шолардан 7158 гектар Хасавюрт бойда, 7936 гектар
ер буса Эндирей агъачлыкъ деп юрюле.



Орманлыкъ хозяйствону ёлбашчысы Багьавдин Мамаев гьаракаты булангъы улан, ол уьлкеде ва республикада оьтгерилеген бары да дегенлей гьаракатларда ортакъчылыкъ эте. Муна гьали бираз алда да орманлыкъ хозяйствосунда экология субботник болду. Шо субботник «Яша, агъачлыкъ!» деген Бютюнроссия чараны тюбюнде оьтгерилди. Гетген йыл Хасавюртда А.Сайтиевни атындагъы гимназияны орманлыкъ кружогуну членлери оьзлеге юрютмеге деп агъачлыкъдан
2 гектар ер алгъан эдилер. Субботникни гюнюнде де гимназияны охувчулары шо бойну насдан тазалады.



– Субботник – ишибизни бир яны, – дей Б.Мамаев. – Биз субботникни оьтгерив булан бирге орманлыкълагъа гьар заман нас­ланы ташлап турса, табиатгъа нечик зарал гелтирме болагъанны гьа­къында айтабыз. Демек, шо иш булан англатыв да юрютебиз. Ёл бойдан биз жыягъан къалыкъ пакетлер ва шишалар топуракъда 100 йыллар чиримей. Шо буса агъачлыкъ къурумакълыкъгъа, яшыл от чыкъмай къалмакъгъа себеп бола. Оьзюбюз де яшлар булан янаша туруп шо субботниклерде ортакъчылыкъ этебиз. 2011-нчи йылдан берли юрюлеген шо гьаракатгъа къошулагъан адамланы санаву арта бара.



Башлапгъы йылларда агъачлыкъланы бойларына юртлардан ва шагьардан гелтирилип кёп нас тёгюле эди. Аз заман да гетгенче, шо ерни чёп тёгеген ерге айландырып къоя эдилер. Гьалны токътатмакъ учун Б.Мамаевге нечакъы чапма тюшдю, гьатта такъсырламакъ учун ич ишлени къуллукъчуларын да къуршады. Чёп тёгюлген ерлени тазаламакъ учун кёп акъча да харжланды, кёп къарсалавлар да болду. Къаравну ва тергевню гючюнден гьалны тюзлеме бажарылды. Гьали агъачлыкъ бойлар таза.



Терекни орнатмакъ – бир, огъар къарав юрютме де герек чи. Къуруп авгъан агъачланы тайдырмаса, гиччи тереклени баса, олагъа оьсме четим эте. Орманлыкъ хозяйствону ишчилери буса гьар йыл агъачлыкъланы артдырмакъны гьайын эте. Эгер де алдагъы йылларда терек салмакъ учун агъачлыкъдан 500-750 кило эмен ва башгъа терек­лени урлугъун жыя буса, гьали тонгъа ювукъну жыялар. Шо буса чачыв майданланы артдырма имканлыкъ бере.



Орманлыкъ хозяйствону къуллукъчулары тереклени янгыз агъачлыкъларда тюгюл, школаланы, савлукъ сакълав идараланы абзарларында, эсделиклени, юрт администрацияланы ва межитлени айланасына орнатма да берелер. 17-18-нчи ноябрде болгъан субботникде эсгерилген ерлер учун орнатмагъа Хасавюрт орманлыкъ хозяйство 3000 терек берди. Терек­лени орнатыв нечик юрюлегенге орманлыкъ хозяйствону инженери Рамазан Баймуратов тергев эте ва тарыкълы англатывлар да бере. Ол айтагъан кюйде, терекни биринчи сувукълар болгъанча бир ай алда орнатса яхшы бола. Арадан бир-эки йыл гетип, бугюнлерде орнатылгъан тереклер оьсежек ва къайсыбызгъа да тарыкъ таза гьава бережек. Демек, бизин савлугъубуз туврачалай агъачлыкъланы гьалындан гьасил экени айтмаса да белгили. Тюгюл буса, оьзюнг орнатып уллу болгъан терекни тюбюнде ял алып къара чы…




Авторизация
*
*
Регистрация
*
*
*
Согласны с условиями сайта?
Генерация пароля