«Анжи» – бугюн ва тангала

   


Пятница, 23.03.2018г. — «Ёлдаш» газет


Къышгъы уллу танапусдан сонг Россияны  футбол оюндан чемпионаты  давам этилди. Турнир таблицаны он бешинчи еринде ерлешген магьачкъалалы «Анжи», биринчи уьч оюнунда  дёрт очко къазанып, он уьчюнчю ерни есиси болуп токътады.


 


Команданы президенти Осман Къадиев, баш тренери Вадим Скрипеченко ва клубну оюнчуланы танглайгъан бёлюгю танапусгъа берилген уьч айны бош йибермегени бизин командагъа къуршалгъан янгы  футболистлени оюнуна къарагъанда гёрюне.



Сынавлу Джон Чансельор, Пауль Антон, Квадво Поку, алдын «Анжиде» ойнагъан Филипп Будковский, жагьил, йигирма йыллыкъ Уьзбекистанны жыйым командасында ойнайгъан Дос­томбек Хамдамов, Артур Калмыков ва алдын  «Анжини» яшёрюмлерини командасында ойнагъан бир нече футболист команданы аслу составын толтурду.



Ойналгъан уьч оюн аслу сос­тавгъа къуршалгъан янгы футболистлер команда гючлю этгенни гёрсетди. Биринчи оюнда оьз майданында ойналгъан къазанлы «Рубин» булангъы оюнда «Анжи» къонакълардан гючлю гёрюнсе де, оланы бир къоркъунчлу гери чапгъынын токътатма бажармаса да, оюнну лап ахырынчы минутунда ёлугъувну ничьягъа айландырма бажарды. Оюнну токъсанынчы минутда «Анжини» аргентиналы легионери Хуан Лескано Курбан Бердыевни командасына гол гийирип, айтылгъан тренерни къарсалатды. Курбан Бекиевич Магьачкъалагъа уьч очкону артындан гелгенин оюн башлангъынча бир де яшырмайлы журналистлеге айта эди.



Тыш майданда сувукъ Уфада ерли «Уфа» команда булан ойналгъан оюнда «Анжини» насиби болмады. Майданны ортасында ойнайгъан футболистлерибизни де, есилеге эки гол да гийирген чапгъынчыларыбызны осал гьаракаты да, якълавчуларыбызны янгылышлары да бизинкилеге бир очкогъа сама ес болма къоймады. Шолайлыкъда, олардан бир де къалышмай ойнагъан оюндан «Анжиге» очколарсыз Магьачкъалагъа къайтма тюшдю.



Уьчюнчю оюнда буса «Анжи» оьз майданында турнир таблицадагъы «хоншусу» Ленинград областдан гелген «Тосно» булан ёлукъду. Команданы президенти Къадиев бу оюнгъа, къаравчулагъа савгъат этип, белетлер алмайлы, стадионгъа оланы гьавайын гирме къоймакъны арив гёрдю. Стадионгъа жы­йылгъан он мингге ювукъ къаравчу янгы «Анжини» оюнуна рази болду. Командагъа гьали къуршалгъан ярым якълавчусу Пауль Антон къонакъланы къапусуна гийирген эки топ «Анжиге» уьч очко да берди, турнир таблицада эки канзиге оьрге де гётерди. Журналистлер ва футбол касбучулар бизин командабызны алышынгъанына, гючлю болгъанына мюкюрлюк этди. «Анжи» тувдургъан бары да къоркъунчлу мюгьлетлерин голгъа айландырып бажаргъан эди буса, бизин команда оюнну оьзюню пайдасына дагъы да артыкъ топлар булан тамамламагъа имканлы эди.



Чемпионат тамамланмагъа къалгъан етти оюнну «Анжи» дёртюсюн тыш майданда, уьчюсюн де оьз майданында ойнай. Гележек уьч оюнну экисин «Краснодар» ва «Зенит» булан тыш майданда, бир оюнну буса москвалы «Спартак» булан оьз майданында ойнажакъ. Бу оюнларда бизинкилеге къаршы чыгъажакъ уьч де команда – турнир таблицаны лап да башында ерлешген командалар, чемпионланы лигасына, Европаны лигасына чыкъма сююп чалышагъан, очколар къазанма тарыкъ командалар. «Анжини» мекенли гючюн шу уьч де оюн гёрсетме тарыкъ.



Авторизация
*
*
Регистрация
*
*
*
Согласны с условиями сайта?
Генерация пароля