«Залим» деген сабанчы-фермер хозяйствону еси Далгьат Магьамматов – Дагъыстан Республиканы ат къазангъан фермери, алда райондагъы фермерлени бирлешивюню ёлбашчысы болуп ишлей эди. Ол 1992-нчи йылдан берли гьайван-мал, авлакъчылыкъ булан машгъул.
Теплицаны гёрюнюшю де, ичи-тышы да адам сукъланардай онгарылгъан. Ону ачылывунда Буйнакск район администрацияны башчысы М. Маликов, ону заместителлери А. Жафаров, Гь. Ражбутдинов, районну жамият советини председатели З. Асгьабов, районну юрт хозяйство управлениесини начальниги М. Кантиев, Тёбен Къазаныш юрт администрацияны башчысы М. Къазакъов ва бир нече сабанчылар ортакъчылыкъ этди.
Гелген къонакълар бир башлап янгы теплицаны ичине гирип, къарап чыкъдылар. Буссагьат шонда хыяр оьсдюрюле. Бир-эки жумадан тюшюм къайтарылмагъа башланажакъ.
Район администрацияны башчысы М. Маликов теплицаны ачылыву булан къутлай туруп, алдынлы фермерге гележекде мол тюшюмлер алмакъны ёрады.
– Топуракъда ишлемеге сюеген адамгъа кёмек этмеге герек. Районну топуракълары сюрюлюп, чачылып ишлетилмесе ярамай. Биз гьар жыйында да, юртлагъа гелгенде де айта болабыз: юрт хозяйство тармакъда ишлемеге сюегенлер учун пачалыкъны янындан кёмеклер де этиле, хыйлы программалар да бар. Арты нечик болур экен деп ойлаша турмайлы, башлап иш гёрсетгенлеге къол ялгъай, субсидиялар бере, – деди ол.
Фермер къургъан теплица 550 квадрат метр ерни къуршагъан. Чачылгъан хыяр буссагьат чечек ачып тура. Теплицаны ичинде агротехника ишге къураллар, сувгъа деп салынгъан уллу бочке бар. Янгы технологиягъа гёре бары да шитиллер тамчылап сугъарыла. Буссагьат теплицада башгъа оьсюмлюклени де шитиллери орнатма гьазир этилип тура.
Теплицадан къайры да, ол 3 гектардан да къолай ерге бав салгъан. Емиш бавну эки янын бегитегенде юрт администрацияны да кёмеги тийген. Бажарывлу фермер терек араланы да бош къоймагъан, люцерна чачгъан. Ондан къайры, фермер хозяйствону Карантайны топуракъларында 30 гектар ерде чачывлукълары да бар.
Абдулла ЗАЛИМХАНОВ.
СУРАТДА: янгы теплицаны ичинде.
