Савлай район учун бу предприятиени ишге бериливю гёрмекли агьвалат болду десек, гьакъыкъатгъа къыйышмай къалмас. О гьакъда айта туруп, Шарип Исмайылович:
– Дагъыстанны Президенти Рамазан Абдулатиповну сиптечилиги булан къурулгъан Программаларда «АПК-ны оьсдюрюв» деген проекти айрыча ерни тута, – деп узатды ол оьзюню сёзюн. – Булай къурулушлар бизин республикабызны оьзге бойларында да юрюлегени негьакъ тюгюл. Бизин республикабызда болдурулагъан юрт хозяйство продукциядан гьазирленеген малланы чыгъарагъан предприятиелени сыдыраларын толумлашдырывгъа Дагъыстанны Халкъ Жыйыныны 31-нчи сессиясында къабул этилинген «Дагъыстанны 2014-нчю ва гележекдеги 2015– 2016-нчы йылларына ерлиги бюджетде» 1 миллиард 60 миллион манатны оьлчевюнде акъча маялар гёз алгъа тутулунду.
Бизин республикабызны агропромышленный тармагъында булай предприятиелени пайдаландырывгъа берив, озокъда, гележекде юртлу загьматчыланы ишге гёнгюллю этежеги ва шону натижасында къоллавчулар учун этден ва сютден этилинеген маллар учуз болажагъы шеклик тувдурмай.
Алгъа салынгъан жаваплы ва агьамиятлы борчланы яшавгъа чыгъармакъ учун бугюнлерде пайдаландырывгъа берилген предприятиеде не йимик имканлыкълар болдурулгъан? Технолог касбучусу Роза Маметалиева булан о гьакъда гиччирек лакъыр болду.
– Борчланы кютмек учун предприятиеде не йимик онгайлыкълар болдурулгъан?
– Сютню къабул этеген хас цех, айрыча лаборатория, сютню ишлетеген линия, къутукълагъа къуягъан цех ва шолай да, уллу холодильный къураллар ясандырылгъан.
– Суткада нече тон сютню ишлетмеге имканлыкъ болажакъ?
– Суткада 30 тон сютню къабул этип ишлетмеге умут этиле.
– Сизин предприятиеде нече тюрлю акъкъатыкъ чыгъарылажакъ?
– Башлапгъы вакътиде етти тюрлю – бишлакъ, къаймакъ, ювурт ва шолай оьзге маллар чыгъарылажакъ. Озокъда, гележекде шоланы журалары къоллавчуланы талапларына гёре артып туражакъ.
– Сютню ишлетеген предприятие толу кюйде къачан ишлемеге балажакъ?
– Шо, биз гьисап этеген кюйде, 2014-нчю йылны февраль айыны башындан тутуп толу кюйде ишге тюшежек.
Белгили болгъаны йимик, сютню ишлетеген янгы предприятиени къуруп пайдаландырывгъа бермек учун 90 миллион манат харж этилинген. Шону 50 проценти маячылагъа – харжын чыгъаргъанлагъа пачалыкъ кёмек гьисапда къайтарылып берилежек.
Янгы заводну къабул этген сонг, Шарип Шарипов да айтгъанлай, гьали шулай юрт хозяйство продукцияны ишлетеген онгайлы цехлени къуруп пайдаландырывгъа бермек учун республикабызны тюзлюк боюндан таба тавтюп ва тав районларына да ёл чыкъма тарыкъ болажакъ.
Къ. Къараев
Суратда: Къазмаавулдагъы
«Танг» деген СПК-да пайдаландырывгъа берилген
предприятиеде.
