«Таллыкъда» иш къайнай

Комбайнлар бизге ювукълашгъан сайын, тавушлар дагъы да гючлене. Оланы бирче юрюшю гюзлюк будайланы 16 метр генгине алып геле. Авлакъ ачылып къала. Комбайнлардан къайры ишге ашлыкъ ташыйгъан эки «КамАЗ» машин, тайлар къысагъан эки прес-подборщик де къуршалгъан. Техниканы ишлетегенлени, салам юклейгенлени санаву да 20-дан айлана.

Ашлыкъ къайтарывну графиги бузулмасын учун, мунда алданокъ бары да чаралар гёрюлген. Иш гюн 10-12 сагьат узатыла. Техникагъа къуллукъ этеген, салам тайланы юклейген бригадаланы ишчилери токътавсуз чалыша. Комбайнёрлагъа йимик ишчилеге де тюш аш авлакъгъа етишдириле.

– Ашлыкъ къайтарывда ортакъчылыкъ этегеним 16-нчы гезик, – дей ол, токътагъан машинден тюшюп. Ишибиз эртен сагьат алтыларда тергев ва гиччи-гирим ремонт ишлер булан башлана, ахшам сегизлеге тамамлана.

–Ишибиз де, ашыбыз да, гьатта юхубуз да авлакъда, – деп лакъырыбызгъа комбайнерлер Магьамматэмин Ражабов ва Рамазан Мирзаев да гиришелер. – Шолай ишлемесек, хозяйствону ишлери алгъа юрюмес, гьаракатыбызны да берекети артмас.

«КамАЗ» машинге комбайнны 4 бункер ашлыгъы тёшеле. Шофёрлар Мухтар Чамкуров ва Абдулнасыр Абдурагьманов авлакъчылыкъ ишдеги къурдашларындан бир де артда къалмай. Оланы аслу борчу – машинлерин бузулмайлы сакълап, юкленеген ашлыкъны чачмай-тёкмей дегенлей, инныргъа тез етишдирип къайтмакъ. Бугюнге буланы ишине сёз ёкъ.

Биз олар булан лакъыр эте туруп, авлакъгъа предприятиени директору Магьамматшакир Алибеков да гелип къалды. Хозяйствогъа ёлбашчылыкъ этегени кёп болмаса да, Магьамматшакир Нажмутдинович предприятиеде 1985-нчи йылдан берли ишлей. Хозяйствону гьалын теренден биле, ишчилени, касбучуланы тезден ва яхшы таный.

– Ишлени къыставуллу вакътиси етишди. Бичен чалыв ишлени арты булан гюзлюк будайланы къайтарыв башланды, – дей Магьамматшакир Нажмутдинович. – Бу ишлени тамамлагъан сонг, юзюм жыйыв кампания да башланажакъ. Бизге токътамагъа ва ял алмагъа чола ёкъ. Бугюнге гюзлюк будайланы чалыв, ашлыкъ къайтарыв ишлерибиз яман бармай. Орувну барышына разибиз. Къалгъан авлакъларыбызны гьар гектарындан 24-25 центнер будай къаравуллайбыз.

Бираздан директорну машини инныргъа багъып ёл алды. Гюзлюклер орулагъан авлакъларда йимик иннырда да иш къайнай. Ашлыкъны етишдирген машинлер тез чегиле, гьисапгъа алына. Жыйылгъан ашлыкъны тёбелери гётериле. Иннырдагъы ишчилер де гьаракат булан будайланы тазалай. Сонг да, мунда ашлыкъланы лап яхшыларындан бир пайы янгы чачыв учун айырыла, бир пайы ашлыкъгъа муштарлылагъа сатыла. Будайны сан яны бираз осалы буса, гьайван фермагъа ем гьисапда йибериле.

Предприятиени инныры бийик ерде ерлешген. Уьстден таба гюзлюклер чачылгъан авлакъланы кёплери къолунгну аясында йимик гёрюне. Орув битген авлакъларда биз бугюн ер сюреген К-700 тракторланы да гёрдюк. Шо буса директор айтагъан сёзлени бирдагъы гертиледи. Авлакъ ишлер мунда токътавсуз юрюйгенине шек ёкъ. Ашлыкъланы къайтарыв кампания къурулгъан графикге гёре тамамланажагъына да инамлыкъ тувулуна.

Магьамматрасул Ибрагьимов,



Къаягент район.



Суратларда: ашлыкъ къайтарывдан гёрюнюшлер.

Авторизация
*
*
Регистрация
*
*
*
Согласны с условиями сайта?
Генерация пароля