Сабур тюбю сари алтын буса да…


Мисал этип алгъанда, оьр билимлери булангъы бюджет тармакъда ишлейгенлени арасында муаллимлер инг де аз алапа ала деп айтмагъа ярай. 
    Оьтген йылны узагъында муаллимлени алапасын артдырмагъа герек деген сёзлер Дагъыстанны оьлчевюнде сёйленип турду. 2014-нчю йылны натижаларына гёре вице-премьер Ольга Голодец билдирегенге гёре, Россияны оьлчевюнде алгъанда, Дагъыстандагъы муаллимлени алапасы инг де аз болуп токътагъан. Оьзге Темиркъазыкъ Кавказ республикалар булан тенглешдирип къарагъанда да, бизин республика – инг ахырынчы ерде:



    Шу гьалны ёрукълащдырмакъ учун, демек, муаллимлени алапаларын республикадагъы алапаланы орта къадарына етишдирмек учун, Россияны гьакимияты  бизин гьакимиятыбызгъа чаралар гёрмекни тапшургъан.
    Шогъар гёре йылны ахырындагъы 2–3 ай, муаллимлер гьар ерде гьар тюрлю буса да, алапаларына къошулуп гелген акъчалардан сююнюп тура эди.  Олар бары да гелеген йылда да шулай къошулгъан кюйде алапалар алажакъбыз деп умутлу эди.
    Тек январ айны алапасын къолуна алгъанда, умутлары уьзюлдю дегенлей, артыв ёкъ экенни, терсине, бир-бир  районларда буса алапалар кемитилип гелгенни де гёрдюлер.
    Бу масъаланы бирдагъы бир яны бар. Гьали болгъунча юрт ерлерде ишлейген муаллимлеге газ ва ярыкълар  учун берилеген енгилликлер, демек, тёлеген акъчасыны бир къадарын къайтара эди. Шо да кёп уллу къошум тюгюл буса да, бир яхшы яны эди. Гьали энни буса, шо енгилликлени (льготаланы) тайдырып, юрт муаллимлени алапасына 1 минг манат акъча къошулуп къалажакъ деген хабар етишди.
    Оьтген йылны ахырында муаллимлеге берилген акъчаланы маънасын да, янгы йылдан тутуп алапаланы артмагъанны, бир-бир районларда буса кемитилип берилгенни себебин де, юрт ерлерде ишлейген муаллимлеге енгилликлени оьлчевюн кемитгенни себеплерин де ачыкъ этип айтагъан адам ёкъ.
    Уьстевюне, дагъы да артдагъы вакътилерде Россия Федерациясыны гьакимиятыны уьст къатлавларында муаллимлени де, врачланы да пенсиягъа чыгъагъан вакътисин  артдырмагъа герек деген ойлар эшитилине.
    Гьали болгъунча муаллимлер школада 25 йыл ишлеген сонг пенсиягъа чыкъмагъа имканлыгъы бар эди. Гьали гьакимлер шо йылланы артдырмакъ учун, шо масъаланы жамият арагъа гьакълашывгъа салмагъа герек деген ойгъа гелгени ичингбушдура.
    Билим берив тармакъны агьамиятын, жамиятны гележегин къурувда тутагъан ерин бирев де инкар этип болмай. Шо саялы да алдынлы пачалыкъларда муллимлер де, врачлар да инг де мадарлы адамлар санала. Россия Федерациясы да шолай оьсювню ёлуна тюшген сонг, билим берив тармакъны якъламакъ, муаллимлени яшав гьалын артдырмакъ учун гёрмекли абатлар этилинмеге герек.
    Муаллимлени кёбюсю – оьз касбусуна берилген, яшланы алдында оьз борчун англайгъан, эринмей-талмай ишлейген адамлар. Шогъар гёре олар ишиндеги къы­йынлыкъларыны гьакъында айтагъандан эсе, охувчуларыны уьстюнлюклерини гьакъында кёп сююп айтажакъ. Оьзлени саламатлыгъы, сабурлугъу саялы муаллимлер митинглеге чыгъып, оьзлеге тийишли затны талап этмей. Тек сабур кюйде чыдай деп, булай къыйыкъсытывлар этилинсе, билим берив тармакъны гьалы нечик болур? Муаллимлени яшав-туруш гьалы бузукълашса, олар оьсюп гелеген наслугъа тийишли даражада билим де, тарбия да берип болурму?
    Бюджетни экономия этмек учун гёрюлеген чаралар биринчилей муаллимлеге тиймеге герекми эди? Соравлар кёп…

Ругьаният МУСАЕВА.


Авторизация
*
*
Регистрация
*
*
*
Согласны с условиями сайта?
Генерация пароля