Къыйматын халкъ бере буса…

Совет девюрдеги яшавлукъ-экономика масъалаланы планлашдырылгъан къайдаларын базар аралыкълар оьмюр сюреген девюрде де къоллама къарайгъанлар къаршылаша. Озокъда, бугюнлерде де борчланы яшавгъа чыгъармакъ учун планлар асувлу пайдаландырыла эди буса, шо да яман тюгюл эди.

Айтмагъа сюегеним, базар аралыкълар оьмюр сюреген девюрде аслу тергевню тогъатартывгъа (конкуренция) бакъдырма тарыкъ болагъаны да гьакъ. Пачалыкъ ва шону ерлердеги къурумлары адилли тогъатартывгъа бойсынып якъламаса ва шону учун онгайлы шартларын яратмаса, яшырмагъа негер тарыкъ, бир пландан да пайда ёкъ экени англашылмай тюгюл.

Белгили болгъаны йимик, бизин респуб­ликабызда алдагъы къайдаланы ругьунда районланы ва къурумланы арасында ярышны гьасиллерин чыгъарыв ва малим этив давамлаша. Нечик?

2013-нчю йылны сентябр айында  Дагъыс­танны Башчысы Рамазан Абдулатипов 2013-2014-нчю йылларда Дагъыстан Республиканы социал-экономика якъдан оьсдюрювню гьакъындагъы» 136 номерли къараргъа къол салгъан эди. Шону натижасында Дагъыстан Республиканы Гьукуматыны ва шолай да  ерли район, шагьар муниципал къурулувларыны янындан алгъа салынгъан борчланы яшавгъа чыгъармакъ учун дыгъарлар да байланды.

Шолайлыкъда, район ва шагьар муниципал къурулувларыны алдына планлашдырылгъан борчлар да салынды. Тюзюн айтмагъа герек, шоланы яшавгъа чыгъармакъ учун йыл боюнда ДР-ни экономика ва территория оьсювюню масъалаларына къарайгъан министерлигини сиптечилиги булан ерлерде англатыв ишлени генглешдирив де гючленмей къалмады. Гьар айда эсгерилген министерлигини таклифине гёре ерлерден  ярышны барышына байлавлу гьар тюрлю маълуматлар да жыйылмагъа башланды.

Ахырында, тав, тавтюп, тюзлюк бойдагъы районланы ва шагьарланы муниципал къурулувларындан таба жыйылгъан маълуматлагъа гёре, ДР-ни Гьукуматыны янындан гьар тюрлю гёрсетивлери-натижалар гьисапгъа алынып, алдынлы ерлеге ес болгъан район ва шагьар муниципал къурулувлары да белгиленди.

Белгили болгъаны йимик, 2014-нчю йылны июн айыны 19-нда  «2013-нчю йылда социал-экономика якъдан оьсдюрювню гьаракатында лайыкълы натижаланы къолда этген район ва шагьар администрацияланы грантлар булан савгъатлавну гьакъындагъы» къарары да чыкъды.

Демек, шагьарланы арасында Къызларгъа, районланы арасында буса биринчи ерлер Шамил, Гергебил, Сергокъала ва Къызылюрт районлагъа берилди ва грантлар тапшурулду.

Озокъда, пачалыкъны ва халкъны пайдаларын якълап юрюлеген гьаракатгъа бизге де къаршы чыкъмагъа четим. Тек бу ерде, мен ойлашагъан кюйде, халкъны ва ерли экономиканы оьсювюню даражасына янгыз гьакимият къурумлар тюгюл, тюз кюйде, халкъ оьзю де багьа бере эди буса, яман болмас эди.


К. КАРАЕВ.

Авторизация
*
*
Регистрация
*
*
*
Согласны с условиями сайта?
Генерация пароля