«Авлакъны гюню»

Дагъыстанны илму-ахтарыв юрт хозяйство институту (ДНИИСХ) юрт хозяйство маллар болдурагъан хозяйстволарда ахтарыв ишлер юрюте. Олар Хасавюрт районну Кировну атындагъы сынав хозяйствосунда да шолай ахтарыв ишлер юрютегенли кёп йыллар бола. Гьар йыл эсгерилген хозяйствода илму жыйынлар, генгешлер ва форумлар оьтгере.

_____________________________________________________________



Бу йыл «Авлакъны гюню» («День поля») деп ат тагъылгъан форумгъа шо институтну кёп алимлери гелди. Институтну директору, юрт хозяйство илмуланы директору Гьасан Догиев оьзю булан форумгъа тюрлю-тюрлю тармакъланы 11 алимин де алып гелген эди. Хасавюрт райондан шо форумда «Гранит» деген СПК-ны председатели Атилла Гереев ва Чагъаротар, Османюрт МУП-ланы директорлары Абдулвагьит Темирсолтанов ва Солтансайит Исмайылов ортакъчылыкъ этдилер.


Жыйынны юрютген Гьасан Догиев йыл сайын юрт хозяйство малланы болдурувгъа илму яндан этилеген тергев артагъанын айтды.


– Биз бу хозяйствода сынавлар ва ахтарывлар юрютегенли 50 йыллар бола, – дей ол. – Толуп башлары саллангъан сынавлу будай тарлавланы оьзюгюз де гёрюп турасыз. Шу сортланы биз оьзюбюз чыгъаргъанбыз, демек, бара-бара биз ашлыкъланы урлукъларын тышгъа чыкъмай, оьзюбюз республиканы толу кюйде чачыв урлукъ булан таъмин этип болажакъбыз. Республиканы Башчысы Р. Абдулатипов да авлакъны да, илмуну да арасында уллу айрылыв барны эсгере. Тарыкълы программа къабул этилинсе, алимлер аз заманны ичинде сав республиканы оьз урлукълары булан таъмин этме болажакъ. Жыйынны ортакъчыларына шулай ёлугъувлардан пайда алмакъны, хозяйствогъа буса болдурулгъан ашлыкъны тас этивсюз къайтармакъны ёрайман. Хозяйствону башчысына бизин булан узакъ йыллар пайдалы ишлегени учун Дагъыстанны юрт хозяйствосуну ат къазангъан къуллукъчусу деген ат берилди. Шону булан да Алхузур Сойиповну гьакъ юрекден къутлама сюемен.


–Шулай жыйынлар этегенигиз учун сизге баракалла, – дей Хасавюрт район администрацияны башчысыны заместители Нурулла Муртазалиев. –Бизин районну экономикасы юрт хозяйстводан гьасил. Шону учун да авлакълардан кёп гелим алмакъ – бизин учун агьамияты бар масъала. Алимлени къасты булан ашлыкъланы гелимин артдырсакъ ва оьзюбюзню урлукъларыбыз булан таъмин этилсек, эки де якъ ута. Янгыз авлакъчылыкъ тюгюл, шолай гьайванчылыкъны гьайын этме де герек.


Жыйынны ортакъчылары алимлер чыгъаргъан «Гром» деген сортну ушатды ва гелеген йылдан тутуп, шо урлукъну аз-аз ерлеге чачып, топуракъларына къыйышагъанны тергеп къаражакъ.


Гебек КЪОНАКЪБИЕВ.


Суратда: «Авлакъны гюню» деген форумну ортакъчылары.

Авторизация
*
*
Регистрация
*
*
*
Согласны с условиями сайта?
Генерация пароля