Али Жабрайылов:

Ерлерде къаршылашагъан четимликлени гьисапгъа алып дегенлей, 2014-нчю йылны июль айыны 21-нде къабул этилинген 255 номерли «Россия Федерацияны яшавлукъ Кодексине алмашынывланы ва  алдагъы бир нече закон актлар гючюн тас этгени гьакъдагъы» федерал закон булан кёп адамлар яшайгъан уьйлеге къуллукъ этеген управлениелени далапчылыкъ булан машгъул болувуна лицензия берилегенлик ишге салына.

Демек, шолайлыкъда, кёп адамлар яшайгъан уьйлеге къуллукъ этеген управлениелер иш юрютюв къурумланы шагьатнамаларына кюрчюленип чалышажакъ. Шагьатнамалар буса яшавлукъ масъалалагъа гёз къаратыв булан машгъул болагъан къурумланы янындан РФ-ни субъектлериндеги ерли лицензия комиссияланы къарарына гёре берилежек.

Дагъыстанда артда болгъан гьисап алывлагъа гёре 93 иш юрютюв компания бар. Шоланы 89-у айрыча иш гёреген компаниялар санала ва оланы чалышывуна гёз къаратагъан Дагъыстандагъы пачалыкъ инспекцияны башчысы Али Жабра­йылов «Ёлдашны» мухбирине шагьатнама нечик ва не учун пайдаландырылагъанына байлавлу болуп тёбенде баянлыкъ бере.

– Али Магьамматович, кёп адам яшайгъан уьйлеге къуллукъ этеген управлениелени гьалиги чалышыву не йимик далиллеге гёре кюрчюленип юрюле?

 

– Яшавлукъ уьйлени ярашдырмакъ учун оьтгерилеген чараланы оьлчевлерин токъташдырып, ремонт ишлер дыгъар къурулуп оьтгерилмеге герек. Шолай дыгъарны аслу шарты, озокъда, управлениени пачалыкъ яшавлукъ гёз къаратыв къурумуну янындан тасдыкъ этилген шагьатнамасы  болма тарыкъ.

 

– Шагьатнама нечакъы болжалгъа бериле?

 

– Ону болжаллары токъташдырылмай. Тек шону башгъа тайпалагъа пайдаландырма берив гери урула.

 

– Закон булан шагьатнаманы талаплары дагъы не ёрукъда токъташдырыла?

 

– Биринчилей, шагьатнамагъа Россияны ичинде яшайгъан адам яда къурум ес болмагъа тарыкъ. Башгъа тыш пачалыкъларда гьисапгъа алынгъан тайпалар уьлкебизни субъектлеринде кёп квартирлик уьйлердеги иш юрютюв чаралагъа къуршалмай.

Экинчилей, шагьатнаманы есисини  уста бажарывлугъун ташдырагъан аттестаты болма тарыкъ. Уьчюнчюлей, шагьатнамасы булангъы адам жинаятчылыкъгъа бойсынмагъан, алда туснакъ этилмеген таза ва адилли болма тарыкъ. Дёртюнчюлей, РФ-ни яшавлукъ кодексине таби болмакъ парз ва шолай башгъа дагъы да оьзге тюрлю талаплар салына.

Шолайлыкъда, яшавлукъ къуллукъланы сан янын яхшылашдырма шартлар яратыла.

 

– Шагьатнама береген комиссия деген недир?

– Уьстде шагьатнама береген комиссия нечик ва кимлерден къурулагъаны гьакъда бир къадар англатыв берилди. Дагъыс­танны шагьатнама береген комиссиясы – кёп адамлар яшайгъан уьйлеге къуллукъ этеген управлениесини ва гёз къаратыв къурумланы чалышывун таъмин этмек муратда къурулагъан иш юрютюв къурум. Шо комиссия Дагъыстанны Гьукуматыны къарары булан тасдыкъ этиле. Шагьатнама береген комиссияны членлерини уьчден бир пайы оьз ишин оьзю юрютеген къурумланы вакиллеринден, жамият ва шолай да оьзге къурумларындан тангланма бола.

 

– Али Магьамматович, шагьатнама береген комиссияны членлерини ихтиярлары гьакъда не айтмагъа бажарыла?

 

– Биринчилей, шагьатнама бермеге ва гери урмагъа ихтиярлы. Экинчилей, уста бажарывлугъун токъташдырмакъ муратда экзамен алма бола. Уьчюнчюлей, тергевлерде ортакъчылыкъ эте. Дёртюнчюсю, шагьатнаманы гери урмакъ учун судгъа арза бермеге ихтияры бар.

 

– Бажарывлугъун (квалификационный) ташдырагъан аттестат недир ва кимлеге бериле?

 

– Лайыкълы адамлагъа берилеген хас шагьатнама. Шо шагьатнама уьстюнлю кюйде экзаменден оьтген адамлагъа тапшурулма тарыкъ.

 

– Шагьатнама нече йылгъа бериле, не заман болгъунча гючюн тас этмей пайдаландырыла?

 

– Шагьатнама лайыкълы адамлагъа 5 йыл болжалгъа ерли бериле. Шонда белгиленген талаплар йырыла буса, озокъда, болжалдан алда гери урула ва гючюн тас эте. Шону да суддан таба токъташдырма тюше.

 

– Али Магьамматович, шагьатнаманы тапшурувну ва гери урувну низамы-ёругъу нечикдир?

 

 – Чалышывуна ихтияр берегенликге байлавлу 2011-нчи йылны май айыны 4-нде къабул этилинген 99 номерли федеральный законну талаплары гьисапгъа алынып, бир айны ичинде тапшурула яда буса гери урула. Шогъар буса, белгили болгъан кюйде, яшавлукъ масъалалагъа гёз къаратыв булан машгъул болагъан къурумларда къарала.

 

– Кёп адамлар яшайгъан уьйлеге къуллукъ этеген управлениелени чалышывуна байлавлу маълуматланы тизими-реестри не ерде сакълана?

 

–  Россия Федерацияны бары да субъектлерини хас реестрлеринде сакълана. Шолай маълуматлар Россияны оьлчевюндеги реестрге де гийириле.

 

– Али Магьамматович, шагьатнамаланы тергевлер не ёрукъда оьтгериле, низамы нечик токъташдырыла?

 

– Шогъар байлавлу болуп 2008-нчи йылны декабр айыны 26-сында къабул этилинген 294 номерли  «Далапчылыкъ булан машгъул болагъан къурумланы ва онгача адамланы  пачалыкъ ва муниципал тергевлени юрютювюню ихтиярлары гьакъындагъы» федерал законну ичинде айрыча хат булан эсгериле. Уьстде эсгерилген бары да законлар Россияны оьлчевюндеги ва субъектлени реестрлери булан бирче ерлешдириле.

– Кёп адамлар яшайгъан уьйлеге къуллукъ этеген управлениени чалышывунда далапчылыкъ булан машгъул болувгъа ихтияр береген шагьатнама пачалыкъны янындан тегин берилеми? Шо саялы ЖКХ-ны тарифлери артмажакъ демеге яраймы?

 

– Кёп адамлар яшайгъан уьйлени иш юрютюв управлениесине далапчылыкъ булан машгъул болмакъ учун налог къурумланы янындан 30 минг манатны оьлчевюнде гюмрюк гьакъ салына. Шагьатнаманы болжалы битген сонг 5 минг манат тёленип алышдырыла. Болжалы битмейли тас болса, башгъасын алмакъ учун да 5 минг манат гюмрюк гьакъ тёлене. Тек шолар тарифлени артывуна болушлукъ этежек демеге бажарылмай.

 

– РФ-ни Яшавлукъ кодексинде болгъан алмашынывлагъа байлавлу  берген баянлыкъ саялы сизге баракалла.

 

– Сен де савбол. Гележекде де яшавлукъ-коммунал тармакъда болажакъ алмашынывланы, тюрленивлени гьакъында охувчуларыгъызны соравларына жавап бермеге биз гьазирбиз.

 

Баянлыкъны алгъан ва язып гьазирлеген Къ. КЪАРАЕВ.

Авторизация
*
*
Регистрация
*
*
*
Согласны с условиями сайта?
Генерация пароля