Алтын медаль

          Арсланали тенглилерини арасында айрыча билинеген, охумагъа, билим алмагъа гьасиретлиги булан оьсген улан. Аданакъдагъы сегиз йыллыкъ школагъа тюшгендокъ, ону шо гьасиретлиги муаллимлени де тергевюн тарта. Бу школаны ол бешлер булан битдире. 11-нчи класны буса уллатасы Дадагьажи яшайгъан Дёргели юртда туруп охуй. Орта школаны алтын медальгъа тамамлай. Гиччиден тутуп ол къурувчу болма гьасирет бола. Атасы Гьажи:

        – Яхари, чанггъа-хумгъа да батып, тарыкъмы сагъа шо иш? Медицинскийге тюшюп доктор болсанг яхшы, – деп таклиф эте.

      Арсланалини атасы Гьажи Алмаев де юртда ва районда танывлу, билимли адам болгъан. Ол Дёргелидеги колхозну председатели болуп хыйлы йыллар ишлеген. Аданакъдагъы совхозда баш агроном болуп чалышгъан. Бай яшав сынаву булангъы, халкъ да сёзюне тынглайгъан абурлу адам болгъан. Буса да, гючден салгъан гёзню нюрю болмас дегенлей, уланына гюч этмеген, оьзю сюеген касбугъа охума къойгъан.

     Арсланалини уллатасы Дадагьажи де юртда белгили адам болгъан. Аданакъдагъы колхозну председатели болуп ишлеген. Бай тюшюмлер болдуруп, ВДНХ-гъа биринчилей барып загьмат уьстюнлюклерин гёрсетген адам. Оьтген асруну 30-нчу йылларында берилген ону грамоталары гьали де сакълана. Бир де загьматсыз, ишсиз турмагъан. Атлар егилген арба булан бичен, агъач гелтирегенде, тик ерде ерлешген уьйлерине етишип, атлагъа авур болмасын деп арбадан тюшюп, яяв юрюп мине болгъан. Оьзюне 96 йыл болагъанда гечинген.

Къурувчуну касбусун танглап

         Шолай, загьматны сююп, иш булан абур къазанып гелген тухумдан чыкъгъан Арсланали де къаст этип, къурувчуну касбусуна ес болмакъ учун Магьачкъаладагъы политехника институтну къурулуш факультетине охума тюше. Ону битдирип, инженер-къурувчу касбугъа ес бола. Буйнакскидеги профтехучилищени о замангъы директору Далгьат Кишиев Арсланалини онда дарс берме чакъыра. Дарс беривчю болуп ярым йыл ишлеген сонг Арсланали асгер къуллукъгъа чакъырыла. Украинаны Хмельницкий областындагъы Славута деген шагьарда асгер борчун кюте. Онда партияны сыдыраларына да гире. Билимли, анг­лавлу улан оьзюн яхшы яндан гёрсетме бажара. Командиринден ата-анасына баракалла кагъыз да йибериле.

        Асгерден къайтгъан сонг А. Алмаевни Магьачкъаладагъы сатыв-алыв министерликни о замангъы минист­ри Багьавутдин Гьажиев къурулуш участкагъа уста этип ишге ала. Мунда гьаракат гёрсетип ишлей туруп ол прораб бола. Яш касбучуну ишине рази болгъан министр 1981-нчи йылда ону къурулуш участканы начальниги этип белгилей. Шо вакъти Магьачкъала шагьарда ичкичиликге къаршы ябушув юрюле. Шагьарны гьар еринде кофе, чай, сок ичеген барлар, кафелер, столовыйлар къурулма башлай. Къурулуш ишлер де А. Алмаевни ёлбашчылыгъы булан юрюле.

       – Мен къурулуш ишлерде сынавну шо заман талаплы министр Багьавутдин Устаевични ёлбашчылыгъы булан алдым. Ол бек бажарывлу, кёпню билеген, сынаву булангъы, тюзлюкню сюеген адам эди, тек яшавдан тез гетди, – дей А. Алмаев.

            Арсланали шо министерликде 1990-нчы йыл болгъанча ишлей туруп, шагьарда кёп биналаны къура. Янгыртып къурувну заманы гелгенде мундагъы гьакимлер де, ишге янашыв да алышына. Бу ишден тайгъан сонг Арсланали коммерция булан машгъул болма къарай. Оьзю де айтгъанлай: «Къанда ёкъ буса, сатыв-алыв берекет бермей», – деп, ол бу къас­тын да къоя.

           1995-нчи йылда «Газпром» бирлешивню производство-техника бёлюгюню начальниги болуп ишге тюше. Тогъуз йыл бу бёлюкде ишлеген сонг «Газпромстройну» къурулуш управлениесини баш инженери болуп ишлеме башлай. Магьачкъала шагьарда халкъны къуллукъларын кютмек учун агьамиятлы объектлер къура. Къарабудагъгентде маданият къалагъа от тюшген сонг янгы бинаны къурулушун бойнуна алып, пайдаландырывгъа бере. Мунда уллу спортзал къуралар. Манасгентде янгы школаны бинасын къуруп, пайдаландырывгъа бере. Дёргелиде, Паравулда школаланы биналары ярашдырыла.

        2006-нчы йылда ол Ростовдагъы 68 номерли ОКС-гъа инспектор болуп ишге тюше. Ботлихдеги, Буйнакск шагьардагъы асгер бёлюклени къуллукъчулары учун къурулагъан яшавлукъ уьйлени къурувну ва пайдаландырывгъа беривню тергевню тюбюнде сакълай. Къурулушларда болагъан гьар тюрлю кемчиликлени алдын ала, тергевлер юрюте.

Агьамиятлы проект яшавгъа чыгъа

         2012-нчи йылдан башлап Дагъыстанда агьамиятлы инвес­тиция проектлер яшавгъа чыгъа­рылма башлай. Сынавлу касбучу гьисапда Арсланали Алмаевни «Россия–Дагъыстан–Италия» деген проект­ге ишге чакъыра. Шо проектни гьакъында Арсланали Гьажиевич булай дей:

         –«Мараби» деген ачыкъ акционер жамияты мени Тёбе посёлокну юву­гъунда къурулма герек заводну къурулушун башлама ишге чакъырды. Бу проектни мен 2012-нчи йыл оьтгерилген Да­гъыстанны экономика форумунда малим этдим. Шонда Италияны «САКМИ» деген фирмасыны башчысы Марцио Малавинтура да бар эди. Бу завод полгъа тутмакъ учун 40 сантиметрлик плиткалар да, 1 метр генги, 1 метр 20 сантиметр узуну булангъы керамогранит плиталар да чыгъара. Республиканы къурулуш объектлери учун завод чы­гъаражакъ шо плиталар бек тарыкълы. Мунда лап да алдынлы технологиялар къоллангъан. Бары да тарыкълы болагъан ясандырывлар заводгъа гелип, тийишли ерлеге ерлешдирилип, бегилип тура. Июль айгъа толу кюйде продукция чыгъарма болажакъбыз. 250 адамгъа иш ерлер де бола. Йылда 2,5 миллион квадрат метр керамогранит чы­гъаражакъ. Дагъыстанны къурулуш индустриясына мекенли къошум болуп токътай.

         Арсланали Алмаев кёп сюеген агьлюсю Илмуханым булан беш авлетни: дёрт къыз, бир уланны оьсдюрген ва тарбиялагъан. Къызлары гьариси оьзлени агьлюлери, авлетлери булан насипли яшав къургъан. Уланы Дадагьажи политехника институтну экономика факультетинде охуй. Арсланали Гьажиевич ювукъда «Дагъыстанны ат къазангъан къурувчусу» деген атгъа да ес болажакъ. Мартны 20-сында газет чы­гъагъан гюнюбюзде, Арсланалини 60 йыллыкъ юбилейи де дюр. Аданакълы бажарывлу къурувчу Арсланали Алмаевни юбилейи булан да къутлай туруп савлукъ, ишинде оьрлюк­лер, агьлюсюнде татывлукъ ёрайбыз.

Яраш БИЙДУЛЛАЕВ.

СУРАТЛАРДА: (онгда биринчиси) А.Алмаев италиялы къонакълар булан; А.Алмаев проектни малим эте.