Налогланы жыйыв яхшылаша


Гьар йыл бюджетни топлайгъанда, харж къайдан алынажакълыгъына да къарала. Гетген йыл, Дагъыстанны Башчысыны борчларын заманлыкъгъа кютмеге В.Васильев гелгенден берли, шо масъалагъа айрыча тергев берилеген болду. Гьар йыл дотациялар алынып, ерли налоглар осал жыйылагъаны гьакъда кёп керенлер айтылып турду. Тек иш мекенли кюйде юрюлмей эди. Оьтген йыл жыйылгъан масъалаланы чечмек учун Россияны Президенти Дагъыстангъа 3,2 миллиард манат берди. Шо буса айлыкъланы тёлеме ва уьзюрю ишлени ёрукълашдырма имканлыкъ берди.



Шолай, бир нече генгешлерде В.Васильев гьар муниципал къурулувну ачыкълыкъгъа чыкъмай турагъан имканлыкълары барны бир нече керен де эсгерди. Шолардан аслусу этип, экономикадагъы ачыкълыкъны гьакъында айтылып турду. Тек мекенли чаралар гёрмеген буса, шо иш де сёз кююнде къалажакъ эди. Шондан сонг ерли администрацияларда ишлер жанланып гетди.



Хасавюрт районда да къурумара (межведомственная) комиссия къурулду. Шо комиссиягъа администрацияны, ич ишлени, прокуратураны, налог инспекцияны къуллукъчулары, гьатта суд приставлар да гире. Йылны биринчи яртысында шо комиссия гьар юртгъа барып, яшыртгъын ишлейгенлени аян этме башлады.



Озокъда, ишлер башлап арив юрюлмей турду. Олагъа административ такъсырлар къоллама башлагъанда, гьал къолайлашды. Шондан сонг район администрацияда районну башчысы Ж.Салавов АЗС-лени ва банкет залланы есилери булан ёлугъув оьтгерди. Районда шоланы санаву 30-дан да артыкъ. Шолар бары да законлу кюйде ишлейми ва налогларын къайда тёлейлер? Кемчиликлени тайдырма эки ай берилген. Шондан сонг топуракъланы гьисапгъа алывгъа да тергев артды.



Шо комиссия 18-нчи июльдан башлап ишин янгыртды. Бу гезик олар адамлар налогларын тёлейген кюйню тергеме башлады. Шону учун комиссия толу гьазирлик гёре. Мисал этип айтсакъ, уллу ёлдан Муцалавул янгъа бурулагъан ерде машинлени токътата ва есилерин компьютерден таба борчу барны-ёкъну тергей. Аз заманны ичинде комиссия Боташюрт, Османюрт, Гьажимажагьатюрт, Яхсай, Новосельское, Янгы Гагатли, Бамматюрт, Ичичали, Сивух, Адилотар, Шагада ва Эндирей юртланы адамларын тергеп тура.



Хасавюрт район администрацияны экономика управлениесини начальниги Алимпаша Къазакъов айтагъан кюйде, 2180 адам тергелген, шолардан яртысына ювугъу налогларын тёлемегени ачыкъ болгъан. Оланы барысына да борчларын да язып билдирилген, буварыв кагъызлар берилген.



–Биз тергейген ерге башгъалар да гелип, оьзюню борчлары барны-ёкъну тергейгенлер де бола, – дей, иржая туруп, А.Къазакъов. – Эгер де адамлар налогларын тёлегени булан дагъы затгъа тергев бермей эди буса, гьали адамлар алышынгъан. Неге шонча кёпдюр дейгенлер де бола, бирлери налог инспекцияны къуллукъчуларына соравлар бере. Натижада, адамлар оьзлени борчларын тёлеп тайдырмакъны гьайын этелер. Айтагъа­ным, санавлар арта ва ишибиз къолайлаша. Налогланы жыйыв бары да юртларда яхшылашгъан, олай деп айтсакъ да, талаплар да артгъан, адамлар да гьакъны тёлеп къутулса яхшы экенни англай.



Далапчылыкъ юрютегенлени де тергев давам этиле Шо комиссия янгыз гетген йылда налог инспекцияда гьисапгъа алынмай ишлейген 338 адамны аян этген.



Эгер де 2017-нчи йылда районда адамланы мал-мюлкюне байлавлу 8,5 миллион манат налог жыйылгъан эди буса, бу йыл шо санав шайлы артма герек. Неге тюгюл де, комиссиялар да яхшы ишлеме башлады, адамлар да шо гьакъны тёлеме герегин англап туралар. Гьал яхшы юрюлсе, районну маясы артажакъ ва уьзюрю ишлени бирлерин этип тайдырма бажарылажакъ. Комиссияны ортакъчылары тергевлерден къайры, адамланы арасында да, маълумат къуралланы къуршап да, англатыв ишлерин юрютелер.



Базар аралыкъланы пайдаландырывну ва шолай да айрыча есликге гёчювню шартларында айлана якъдагъы бузукълашгъан гьаллардан тийишли гьасил чыгъарыв савлай пачалыкъны ва халкъны чалышывунда, налогланы жыйывда оьз натижаларын берегени гележек учун инамлыкъны тувдура.



Авторизация
*
*
Регистрация
*
*
*
Согласны с условиями сайта?
Генерация пароля