Налоглар тёленсе, натижалар да къолайлаша


Артдагъы йылларда Дагъыс­танда гьар тюрлю оьлчевде жыйылагъан налогланы тёлевню низамын камиллешдиривге агьамиятлы проект гьисапда айрыча тергев берилегени негьакъ тюгюл. Неге десегиз, гьалиги базар экономиканы шартларында ерлерде – шагьарларда, юртларда яшайгъан ватандашлар налогланы тёлев борчуна нечик янашагъанындан олар учун гьар тюрлю онгайлыкъланы-къуллукъланы болдурув да гьасил болагъаны оьзю заманны талаплары ачыкъ этип гёрсете.



Бизин республикабызда шону гьисапгъа алып, «Экономиканы ачыкълыгъы учун» деген агьамиятлы проект пайдаландырылма башлангъан. Шо да оьз натижаларын гёрсетмей къоймай.



Озокъда, агьамиятлы проект­де токъташдырылгъан борчланы яшавгъа чыгъармакъ учун ерлерде ахтарывлар оьтгерив булан дазуланып къалмайлы, англатыв ишлени де тийишли даражада юрютсе, талапланы яшавгъа чыгъарма рагьат болажагъы шекликни тувдурмай.



Уьстевюне, къурумлагъа да, айрыча адамлагъа да борчлар топламайлы, оьз заманында налогун тёлемеге уьйренсе, шо пачалыкъ учун да, къоллавчулар учун да хайыргъа токътажагъы белгили.



Бабаюрт бизин республикабызда лап да уллу майданлары булангъы район гьисапда танывлу. Алдан берли де эсгерилген районда топуракъланы асувлу кюйде пайдаландырывну натижасында болгъан хайырдан налогланы жыйымына ва шолай да районну социал-экономика якъдан оьсювюне лайыкълы къошум бола эди.



Амма гьалиги заманда къолдан чыгъарылгъан имканлыкъланы янгыдан яшавгъа къайтарывгъа районну юртларында бирни йимик тергев берилмей къалагъаны разисизликлени тувдурмай болмай. Муна шо саялы да, артдагъы вакътилерде район администрацияны сиптечилиги булан оьз заманында налоглар тёленмейгенликден топланагъан борчланы ёрукълашдырмакъ мурат булан налог къурумланы ва суд прис­тавланы ортакъчылыкъ этивю булан бирликде оьтгерилеген рейдлери тергевню тарта.



Шолайлыкъда, районну прес-къуллугъу аянлашдырагъаны йимик, белгиленген болжалларында налогланы тёлемей токътагъан борчлуланы атлары аян этилине. Демек, олар булан судлагъа чыкъмас учун, англатыв ишлер юрюле.



Шогъар да къарамайлы, налогланы жыйыв ишлени артдагъы натижалары малим этеген кююнде, Уцимиюртда, Тотаюртда, Хамаматюртда налоглар осал жыйыла. Яшырмагъа негер тарыкъ, муна шо саялы да юртлу ватандашланы талапларына гёре муниципал къурулувларында онгайлыкъланы болдурувда харжгъа бакъгъан якъда четимликлер тувулуна.



Авторизация
*
*
Регистрация
*
*
*
Согласны с условиями сайта?
Генерация пароля