Бугюн, август айны 3-нде, Москваны ювугъундагъы Одинцово шагьарда тутушуп ябушувдан Россияны чемпионаты башлангъан. Бизин уьлкени инг бажарывлу кочаплары ортакъчылыкъ этеген шо чемпионатда ябушув халчада тогъатартмакъ учун 10 да авурлукъда дагъыстанлы 60 спортчу чыгъажакъ.
Дагъыстанны физкультурагъа ва спортгъа къарайгъан министерлигинден алынгъан маълуматлар исбат этегени йимик, чемпионатда ортакъчылыкъ этегенлени арасында лап оьр даражада юрюлеген ярышларда оьзлени къастлы гьаракаты ва усталыгъы булан алдынлы ерлеге ес болуп гелеген Завур Угуев, Исмайыл Гьажиев де бар. Озокъда, олар ябушув халчада юрютежек тогъатартывлар бизин инг алда иштагьландыражагъы ачыкъ. Шону булан бирге, оьзге дагъыстанлы кочапланы чыгъышлары да бизин республикада айрыча агьамият берилип гелеген спортну тутушуп ябушув журасына тергев берегенлени рази къалдыражагъына шеклик этмеге тюшмей. Олимпия оюнланы чемпиону Абдулрашит Садулаев де гьаман да йимик ябушув халчадагъы уьстюнлюклери булан къаравчуланы ругьландыражагъына да инанмагъа ярай.
Россияны чемпионатында ортакъчылыкъ этеген дагъыстанлы кочапланы барысына да биз уьстюнлюкню къолда этип къайтмакъны ёрайбыз. Къаттыгюн, август айны 5-не ерли юрюлежек тутушуп ябушувдан оьтгерилген Россияны гезикли чемпионатыны гьасиллери гьакъдагъы маълумат бизин газетни гелеген номеринде берилежек.
