Къумукъну нарт уланы


Къумукъ халкъны арасында кёп гючлю нарт адамлар чыкъгъан. Мисал учун, Ал-Кълыч, Али Къазбек, Сулейман Мурзабеков ва башгъалары.


 


Мен айтма сюеген улан Арсен Борагъанов Бабаюртда тёбенжюнгютейли Абсалютдин Гьасановични агьлюсюнде тувгъан. Ону атасы Абсалютдин Борагъанов авур атлетикадан Дагъыстанда айтылгъан тренери гьисапда танылгъан ва огъар яшланы лап яхшы тренери деген ат берилген. Ол СССР-ни, Россияны спортуну 15 устасын гьазирлеген. Арсенни анасы Бурлият Шарапудиновна да билим беривню ветераны, школа-интернатда муаллим болуп 50 йыл ишлеген. Бу агьлюде дагъы да эки гючлю спортчу тарбиялангъан. Уллу уланы Мурат – СССР-ни спортуну устасы, экинчиси Руслан – Дагъыстанны кёп керенлер чемпиону.



Арсен спортда етишген уьстюнлюклени мен айрыча эсгерме сюемен. Ол 2014-нчю йылда Грозный шагьарда оьтгерилген Россияны чемпионатында 77 кило авурлукъда 160 кило гётерип, биринчи ерни алгъан. Толчокда 185 кило гётерген. Россияны кубогуну ярышларында ол бронза медальгъа ес болгъан.



Арсен Темиркъазыкъ-Кавказ федерал округну чемпионатларында эки керен биринчи ерлени къазангъан. Дагъыстанны 12 керен чемпиону да дюр. Россияны студентлерини арасындагъы чемпионатда къумукъ улан гюмюш медальгъа ес болгъан.



Гьар тренировкада ол 10 тонгъа ювукъ авурлукъ гётере. Неге тюгюл де, уллу ярышларда уьстюнлюк къазанмакъ учун, яхшы гьазирлик гёрюлмесе бажарылмай. Шону учун Арсен тренировкаларда тонлар булан авурлукъ гётерип, кёп тер тёгюп медаллар къазангъан деп айтма сюемен.



Россияны чемпионатында медаллар къазангъан бабаюртлу нарт уланны Россияны жыйым командасына къошгъан. Команда Астана шагьарда оьтгерилежек дюнья чемпионатында ортакъчылыкъ этме герек болгъан. Тек къумукъ улангъа уллу дюнья оьлчевдеги ярышлагъа барма насип болмай. Себеби, ону аркъасы авуртуп, тренировкаланы къойма тюшген.



Бабаюрт районну тарихинде Россияны чемпионатында эки медаль къазангъан Арсен Бора­гъанов – биринчи атлет. Ону аты савлай Россиягъа белгили болгъан. Ол – къумукъну нарт уланы, атлети. Олай уланлар булан биз оьктем болма герекбиз.



Яшавда Арсен бек саламат, намуслу ва бек яхшы адам. Ону эки оьр билими бар. Дагъыстан пачалыкъ педагогика университетни ва юрт хозяйство институтну битдирген. Тек бугюн шолай оьр билими бар улангъа иш ёкъ.



–Мен авур атлетикада дагъы да уллу ярышларда ортакъчылыкъ этме сюе эдим. Тек аркъам авуртуп, спортну къойма тюшдю. Магъа Россияны белгили спортчулары булан гюч сынама тюшгенине сююнемен. Оланы арасында дюньяны ва Европаны чемпионатларында савгъатлар къазангъанлар да бар эди. Россия чемпионатда мен олардан оьрдеги канзиге оьрлендим, –дей Арсен.



Авторизация
*
*
Регистрация
*
*
*
Согласны с условиями сайта?
Генерация пароля