Къаравуллангъан уьстюнлюклер


Алдын да биз билдирген кюйде, август айны 3-ден 5-не ерли Москваны ювугъундагъы Одинцово шагьарда спортну тутушуп ябушув журасындан Россияны чемпионаты оьтгерилди. Бизин уьлкени инг сынавлу кочаплары ортакъчылыкъ этген шо ярышланы барышында ябушув халчада юрюлген тогъатартывларда дагъыстанлы спортчулар лап да яхшы натижалагъа етишгени гьакъында айтмагъа бажарыла.

 




Ачыкълашдырып айтгъанда, бизин республиканы жыйым командасына къуршалгъанлар эсгерилген чемпионатны гьасилллерине гёре 7 алтын, 2 гюмюш, олай да 7 бронза, умуми кюйде алгъанда, 16 медаль къазангъан. Олар барысы да Дагъыстангъа кочапланы эли деп айтылып гелегени негьакъ тюгюл экенин исбатлады.



Шо гьакъда айта туруп, гьар тюрлю авурлукъларда алтын медаллагъа лайыкълы болгъан Агьмат Гьажимагьамматовну, Магьамматрасул Къазимагьамматовну, Магьамматрасул Идрисовну, Абдулрашит Садулаевни, Завур Угуевни, Агьмат Чакаевни, Даурен Куруглиевни уьстюнлюклерин айрыча эсгермеге тюше.   



Алтын медаль алгъанланы арасында къумукъ кочап Завур Угуев де бар экени бизин барыбызны да айрыча ругьландырды. Ол ябушув халчада юрюлеген тогъатартывларда 57 кило авурлукъда бизин уьлкеде бугюнлерде оьзюне тенг гелеген кочап ёкъ экенин бирдагъы керен де гертиледи. Ол Россияны ва Европаны чемпионатларында ортакъчылыкъ этежек жыйым команданы топлайгъанда юрюлген бир ярышда да оьзю булан тогъатартмагъа чыкъгъанлагъа оьзюню сыртын ерге тийдирмеге имканлыкъ бермеген, бир де тюп болмагъан. Дейгенибиз, ол Иван Ярыгинни эсделигине юрюлген ярышларда ва Россияны чемпионатларында арты-арты булан эки керен алдынлыкъ алгъан кочап гьисаплана. Бир де къопдурувсуз айтгъанда, шолай уьстюнлюкге буссагьатгъы вакътиде Россияны жыйым командасына къуршалгъан бир кочап да етишмеге болмагъан.



Завур Угуев мухбирлеге берген баянлыгъында Россияны чемпионатыны алдында ол уьлкени оьлчевюнде юрюлеген агьамиятлы шо ярышлагъа мекенли кюйде гьазирленмек учун кёп гьаракат этгени гьакъда эсгерген. Шону булан бирге, Каспийскиде юрюлген Европаны чемпионатында уьстюнлюкге етишмеге болм­гъан сонг оьзюню ругьун жыйып, гезикли ярышлагъа гьазирлик башламагъа болмай тургъанын да яшырмагъан.



Халчада юрюлген тогъатартывланы гёзден гечирип, шоланы барышында йиберилген янгылышланы ва кемчиликлени гьисапгъа алып, арадан аз заманны да оьтмеге къоймай, уьлке оьлчевдеги ярышлагъа гьазирленмеге башлагъаны гьакъда айтгъан. Россияны жыйым командасына къуршалгъан кочапланы арасында инг де сынавлу ва лап да оьр даражаларда юрюлеген ярышларда алдынлыкъ алып гелеген кочапланы бириси гьисаплангъан сонг, оьзюне берилеген инамлыкъны гертилемей къалмагъа болмагъаны гьакъда эсгерген. Ювукъ вакътини ичинде спортну ябушув жураларындан Будапешт шагьарда октябр айны ахырынчы гюнлеринде оьтгерилежек дюньяны чемпионатына гьазирленивге бары да гючюн бакъдыражагъы ва бугюнлерде етишген уьстюнлюгюн къайтып такрарламагъа болажагъына инанагъаны гьакъда билдирген.  



Биз де ону Россияны чемпионатында етишген уьстюнлюк булан гьакъ юрекден къутлайбыз. Ярышдан-ярышгъа чы нечик де, ябушув халчада юрютген гьар тогъатартывдан сонг да усталыгъы артып турагъан, гьар даим де уьстюнлюклеге талпынагъан кочап Завур Угуевге гележекде оьрлюклер ёрайбыз. Бизин респуб­ликаны атын данггъа чыгъара­гъанда йимик, къумукъ халкъны оьктем этеген кюйде ябушув халчада гьар ёлугъувну оьзю гёзлеген кюйде оьтгермеге насип болсун деп де айтмагъа сюебиз.



Авторизация
*
*
Регистрация
*
*
*
Согласны с условиями сайта?
Генерация пароля