Дагъыстанлы кочаплар – биринчилер


   Бугюнлерде СССР-ни спортуну ат къазангъан устасы, Европаны ва дюньяны, олай да Олимпия оюнланы эки керен чемпиону Иван Ярыгинни савгъатларына ес болмакъ учун тутушуп ябушувдан гезикли ярышлар тамамланды.



Ачыкълашдырып айтгъанда, январ айны 24-нден 27-сине ерли, янгыз бизин уьлкеден тюгюл, дагъы да 17 тыш пачалыкъдан гелген 188 кочап ябушув халчада тогъатартды. Белгили экени йимик, арасы бёлюнмейген кюйде гьар йыл Краснодар шагьарда оьтгерилеген шо ярышлагъа инг бажарывлу ва белгили кочаплар къуршала. Неге тюгюл, ярышланы алдынлыларына йылны боюнда оьр даражада оьтгерилеген халкъара турнирлерде ортакъчылыкъ этивюне ёл ача.



Гьар гезик шо ярышлар янгыз касбучуланы тюгюл, кёп санавдагъы къаравчуланы да тергевюн тарта. Бу гезик де шолай болуп чыкъды. «Универсиада – 2019» деген студент яшёрюмлени арасында ювукъда оьтгерилежек ярышлагъа янгыртылып, ярашдырылып онгарылгъан Иван Ярыгинни атындагъы спорткъаласында юрюлген шо ярышланы гьар тирети де къаравчуланы иштагьландыргъан. Эсгерилген ярышлар бу йыл 30-нчу керен оьтгерилегени де шогъар артыкъ таъсир этген болмагъа ярай.



Оьтгерилген ярышларда россиялы кочаплар етишген натижаланы гьакъында айтгъанда, бизин уьлкени жыйым командасына къуршалгъанлар ябушув халчада юрюлеген 10 да авурлукъда алдынлыкъ алгъанын айрыча эсгермеге тюше. Шондан къайры да, бизин кочаплар 4 гюмюш ва 8 бронза медальгъа ес болгъанына да макътавгъа лайыкълы уьстюнлюкге йимик янашмагъа ярай.



Къатынгишилени арасында да россиялы къызлар 3 алтын, 5 гюмюш, олай да 5 бронза медальгъа ес болгъан.



Дагъыстанлы кочаплар буса шо ярышларда 7 керен оьр канзисине гётерилген. Демек, Магьаммат­расул Идрисов (61 кило), Агьмат Чакаев (65 кило), Магьамматрасул Къазимагьамматов (70 кило), Агьмат Гьажимагьамматов (79 кило), Дурен Куруглиев (86 кило), Магьаммат Къурбанов (92 кило), Шамил Мусаев (97 кило) алтын медаллар къазангъан. Шону булан бирге, дагъыстанлы кочаплар Абасгьажи Магьамматов (57 кило) ва Магьаммат Рамазанов (79 кило) гюмюш медаллагъа ес болгъан. Рамазан Ферзалиев (61 кило), Гьажимурат Рашитов (65 кило), Разанбек Жамалов (70 кило) ва Магьаммат Къурбаналиев (74 кило) бронза медаллар алгъан.



Шолайлыкъда, дагъыстанлы кочаплар Иван Ярыгинни атындагъы турнирде гетген йыл етишген уьс­тюнлюгюн такрарламагъа бажаргъан. Шо буса ярышларда ортакъчылыкъ этген Россияны жыйым командасына къуршалгъанланы арасында инг де гёрмекли уьстюнлюк гьисаплана.



Н. БАЙБОЛАТОВ.

СУРАТДА: ярышларда ортакъчылыкъ этген Дагъыстанны жыйым командасы.



Авторизация
*
*
Регистрация
*
*
*
Согласны с условиями сайта?
Генерация пароля