Уллубийавуллу чемпион


   Артдагъы вакътилерде ябушувну гюнтувуш жураларына юреги авагъан уланланы санаву баргъан сайын артагъаны айрыча гьис этиле. Шолай, Басир Магьамматов – сыйлы умутлагъа байланып, оьзю иштагьланагъан ябушувну кунг-фу журасында оьр даражалагъа талпынагъан ва гёрмекли оьрлюклеге етишген уланланы бириси.



Ону уьстюнлюклеринден янгыз дос-къардашыны тюгюл, ата юртлуларыны– уллубийавуллуланы да оьктем болмагъа гьакъы бар. Неге тюгюл, бир де къопдурувсуз айтгъанда, Басир Магьамматов, яш чагъына да къарамайлы, ябушув халчада оьзю булан тогъатартгъанланы утуп уьйренген спортчу гьисапда белгили.



Басирни уллатасы Магьамматали Абдурагьманов бизин булангъы лакъырында билдиргени йимик, бугюнлерде ол оьзю ата юртундан йыракъда, Москва шагьардагъы ич ишлер къурумлары учун полицейскийлени гьазирлейген коллежинде билим алывун узата. Гьар гюн дегенлей арасын бир де бёлмеген кюйде спорт булан машгъул болмагъа да заман таба. Ябушув халчада къаттылыгъын да, къаныгъывлугъун да гёрсете, ярышдан-ярышгъа ону сынаву оьсе, бажарывлугъу арта. Чинкдеси, спортгъа бакъгъан якъдагъы ону гьасиретлиги бир де кемимей, ярышдан-ярышгъа сынаву да оьсе, гьюнери де арта.



Уллатасы оьзюню торунуну гьа­къында айтгъан сёзлени Басир Магьамматовну ябушув халчада етишген гёрмекли уьстюнлюклери де исбатлай. Ачыкълашдырып айтгъанда, ол кунг-фудан спортну устасы деген оьр атгъа лайыкълы болгъандан къайры да, 2017-нчи йылда Россияда алдынлыкъ алгъан, дюньяны кубогуна ес болгъан. Уьлкени оьлчевюнде оьтгерилеген чемпионатда гетген 2018-нчи йылда буса гюмюш медаль къазангъан ва Европаны чемпионатында да биринчиликни алып къайтмагъа бажаргъан.



Шону булан бирге, оьтген йылны ахырынчы гюнлеринде, ачыкълашдырып айтгъанда, декабр айны 28 – 30-нда Таиландда оьтгерилген дюньяны чемпионатында 15 – 16 йыллыкъ чагъындагъы яшёрюмлени арасында 55 кило авурлукъда дюньяны чемпиону болуп, лап оьр канзиге гётерилген. Шолайлыкъда, тенглилерини арасында ябушувну кунг-фу журасында дюнья оьлчевюнде де оьзюне гьеч ким тенг гелмейгенин гертилеген.



Бугюнлерде де ябушув халчада оьтгерилежек янгы гезикли тогъатартывлагъа гьазирлик гёреген яш спортчу Басир Магьамматовну биз де, етишген уьстюнлюклери булан къутлап, огъар гележекде де оьрлюклер ёрамагъа сюебиз.



Насрулла Байболатов

СУРАТДА: (онгдан экинчиси) Б. МАГЬАММАТОВ.



Авторизация
*
*
Регистрация
*
*
*
Согласны с условиями сайта?
Генерация пароля