Абдусамат ГЬАМИТОВ: «Етимлени яшавлукъ уьйлер булан таъмин этме борчлубуз»

Арбагюн, июль айны 19-нда, Магьачкъала шагьарда Абдусамат Гьамитов Дагъыстан Республиканы Гьукуматыны генгешин оьтгерди. Шо генгешни барышында бир нече агьамиятлы масъалалар арагъа салынып ойлашылды.

______________________________________________________________



Абдусамат Гьамитов генгешни лап башында Дагъыстанны юрт хозяйство ва сурсат министрини къуллугъуна янгы белгилеген Керимхан Абасов булан жыйылгъанланы таныш этди. Премьер-министр оьзюню сёйлевюнде Керимхан Абасов АПК-ны тармагъында яхшы иш сынав топлагъан касбучу экенин айрыча эсгерди.


Шондан сонг, етим, олай да ата-анасыны янындан къаравсуз къалгъан яшланы яшавлукъ уьйлер булан таъмин этив масъласын ерли гьакимлик къурумлары некъадар яшавгъа чыгъарагъаны, сонг да шо тармакъда бу йыл не йимик борчлар алгъа салынгъаны гьакъда Дагъыстанны билим берив ва илму министри Шагьабас Шагьов чыгъып сёйледи.


Ол билдиргени йимик, етим, олай да ата-анасыны ягъындан къаравсуз къалгъан яшланы яшавлукъ уьйлер булан таъмин этив федерал ва республика оьлчевлерде къабул этилген законлагъа къыйышывлу юрюле.


Министр айтгъан кюйде, бугюнлеге ерли, муниципал къурулувланы администрациялары берген маълуматлагъа гёре, бу йыл яшавлукъ уьйлер булан таъмин этилмеге тюшеген етим, олай да ата-анасыны ягъындан къаравсуз къалгъан яшланы санаву 2 минг 709-гъа етише.


– РФ-ни билим берив ва илму министерлиги ва ДР-ни Гьукуматы къоллар салгъан разилешивге гёре, Дагъыстан Республиканы бюджетине бу йыл шо яшлагъа яшавлукъ уьйлер сатып алмакъ учун къошум акъча маялар гёрсетилежек. Шолай, федерал бюджетден бизин республикагъа къошум гьисапда 115, 85 миллион манат йиберилежек деп къаравуллана. Бизин республиканы бюджетинден шо масъаланы чечмек учун 150 миллион манат харжланажакъ деп гёз алгъа тутулгъан, – деди оьзюню сёйлевюнде министр. Шону булан бирге, ол билдирген кюйде, шо къадардагъы акъча маялар етим къалгъан 322 яшны яшавлукъ уьйлер булан таъмин этмек учун имканлыкъ бережек.


Шагьабас Шагьов оьзюню сёйлевюнде ерлерде етим, олай да ата-анасыны ягъындан къаравсуз къалгъан яшлагъа оьзлени ихтиярларын англатывгъа байлавлу иш тийишли даражада юрюлмейгенин айрыча эсгерди.


Абдусамат Гьамитов да шо масъаланы агьамиятлыгъы гьакъда айта туруп, етим, олай да ата-анасыны ягъындан къаравсуз къалгъан яшланы яшавлукъ уьйлер булан таъмин этмек учун мекенли иш юрютмейген муниципал къурулувларда бир жуманы ичинде яшавлукъ этмеге ярайгъан биналаны сатып алмакъ учун аукционлар билдирмеге ва шо гьакъдагъы билдиривлени оьзлени хас сайтларында ерлешдирмеге тюшегенин айтды.


– Биз артгъа салмайгъан кюйде етим, олай да ата-анасыны ягъындан къаравсуз къалгъан яшланы яшавлукъ уьйлер булан таъмин этмеге борчлубуз. Шо муратлагъа тарыкълы болагъан акъча маяланы болдурмагъа да тарыкъбыз, – деди премьер-министр.  


Бизин республикада муниципал ва пачалыкъ къуллукъларын электрон къайдада кютеген ватандашланы санавун артдырыв масъаласы гьакъда генгешде Дагъыстанны транспортгъа, энергетикагъа ва байлавлукъгъа къарайгъан министри Сайгитпаша Умаханов чыгъып сёйледи.


Генгешни оьлчевюнде бугюнлерде къурулушу юрюлеген билим берив идараланы биналарын артгъа салмай пайдаландырывгъа беривню масъаласы да арагъа салынып ойлашылды.


Абдусамат Гьамитов Дагъыстанны Гьукуматыны председателини заместителлерине ва муниципал къурумланы ёлбашчыларына къурулагъан билим берив идараларында некъадар иш юрюлегенине тергев этмекни тапшурду.



Бизин мухбирибиз.



Авторизация
*
*
Регистрация
*
*
*
Согласны с условиями сайта?
Генерация пароля