ИШЛЕР ГЕЗИГИ БУЛАН ЮРЮЛЕ

  

Пятница, 13.04.2018г. — «ЁЛДАШ.


яда Юрт хозяйствода язбашгъы гьаракат


Юрт хозяйствода ишлер сав йылны узагъында юрюле. Бу йылны къыш айлары бираз енгил болду. Шондан пайдаланып, Къаягент районда «Къаягент» деген пачалыкъ унитар предприятиени специалистлери, ишчилери юзюм ва емиш бавлардагъы, авлакълардагъы язбашгъы ишлени тез башладылар. Ишлени барышын билмек муратда биз де артдагъы гюнлерде эсгерилген хозяйствода болдукъ.

 


ЯЛ АЛМАГЪА ЧОЛА ЁКЪ

 



2018-нчи йылны язбашы янгурлу ва салкъын гюнлени алышдырып гелеген исси гюнлер булан оьз ихтиярларына гирди. Тизилеген, бузулагъан гьава шартларына да къарамайлы, хозяйствону авлакъларында ишлер бир де токътатылмай, къайнап турду. Оланы юрюшю гьакъда билмеге сююп, биз башлап «Къаягент» ГУП-ну баш агроному Илмутдин Шихалиев булан ёлукъдукъ.



– Юзюм бавларыбыз 481 гектарда ерлешген,– деп, башлады бизин булангъы лакъырын Илмутдин Алишихович. – Шоланы
348 гектары
тюшюм бере. Къалгъан
133 гектары – янгы орнатылгъан юзюм бавлар. Оланы къуллукъларын 4 бригаданы ишчилери кюте. Ишлени барышына разибиз, – деп сёзюн бёлдю баш агроном.







Гертиден де, юзюм ва емиш бавларда хыйлы ишлер этилген. Мисал учун, сув тартылгъан, оьзюне Дагьир Алавов ёлбашчылыкъ этеген 2 номерли юзюмчюлюк бригаданы ишчилери бегетилген
43 гектар ердеги юзюмлюклени сугъарып да битгенлер. Борла гесив ишлер 481 гектарда тамамлангъан. Буссагьатгъы вакътиде байлав ишлер къыставуллу юрюлюп тура.



Юзюм бавларда оьтгерилеген ишлени алдынлылары гьакъда айта туруп, оьзюне Сепият Жабрайылова ёлбашчылыкъ этеген бир номерли бригаданы юзюмчюлерини уьстюнлюклерин эсгермей болмайсан. Мунда гьар гюн 20 адам ишге чыгъа. Бригадагъа бегетилген
110 гектар юзюмлюклердеги бары да язбашгъы ишлер токъташдырылгъан графикге гёре сан яны булан оьтгерилген. Алдынлылардан уьлгю алып оьзлеге Мугьутдин Арсланбеков ва Магьамматнаби Шихалиев ёлбашчылыкъ этеген 3 ва 4 номерли юзюмчюлюк бригадаланы ишчилери де гьаракатын артдыра.



Бригадалагъа бёлюнюп ишлевден къайры, хозяйствода артдагъы йыллар юзюмчюлюкден оьр тюшюмлер къайтарывну янгы къайдалары, ёллары да даим ахтарылып тура. Топуракъда ишлемеге сюеген юртлулагъа оьз акъча маяларын, юрт хозяйство техникасын къоллап, хозяйствону юзюм бавларында яда эсгиленген юзюмлюклени тазалап, оланы орнуна янгы яш юзюмлюк­лени орнатывгъа байлавлу дыгъарлар байлап ишлемеге имканлыкъ бериле. Илмутдин Шихалиев айтагъан кюйде, шолай дыгъарлар байлагъан агьлюлени санаву 300-ден айлангъан.



Ишлени булай салыныву предприятиеге де, топуракъ булан ишлейгенлеге де пайдалы, эки де якъны умутларын яшавгъа чыгъара. Шолай къайданы къоллап иш гёрюв юзюм бавланы гьар гектарындан къайтарылагъан тюшюмлени хыйлы артдырма ёл ачгъан. Шо буса гьар агьлюню, хозяйствону экономикасын беклешдире. Натижада янгы къайдада ишлемеге сюеген юртлуланы санаву да йыл сайын арта.



Баш агрономну айтывуна гёре, бугюнлерде юзюмлюклени сыдыра араларында культивация ишлер тамамланма тура. Оланы арты булан чёп отлагъа къаршы гербицидлер къолланмагъа башланажакъ. Авлакъ ишлени оьтгеривге байлавлу юрт хозяйство техника, машинлер толу гьазир.


 

ГЮЗЛЮКЛЕР ГЁТЕРИЛЕ


 


Юзюмчюлер йимик авлакъчылар да бугюнлерде гьаракат этип чалышалар. Оланы ишлерин билмек учун ГУП-ну баш агроному бизге авлакъчылыкъ бригадагъа бармакъны таклиф этди. Айтылгъан сёзлени арив гёрюп, биз де таклиф булан тез разилешдик ва авлакъчыланы ягъына бармагъа онгарылдыкъ.



Апрелни 9-зу тилеп алгъандай арив гюн болуп чыкъды. Булутсуз ачыкъ гьава, юваш эшеген елге де къарамай, авлакъ ишлени юрютмеге яхшы шартлар яратды. Шондан пайдаланып, авлакъчылар эртенден тутуп ишге гиришгенлер. Биз мол тюшюмлер булан белгили «Таллыкъ» деген участкагъа гелгенде, тюш вакъти эди. Тек шогъар да къарамай, авлакъчылар бригадири Нажмутдин Магьамматгьажиевни башчылыгъы булан гётерилип гелеген гюзлюклеге гербицидлер сепмеге гьазирлене туруп къаршылашдылар. Арадан аз болжал гетип, МТЗ-82 трактор, раствордан толгъан бочканы да тагъып, авлакъгъа багъып талпынды.



Барагъан тракторну узата туруп, бригадир булан лакъырыбызгъа гиришдик. Гюч алгъан ва арив гётерилеген гюзлюклеге бурулуп:



– Нечик гёресиз оьсюмлюклени гьалын? –деп сорайбыз огъар.



–Бугюнге яман тюгюл, – деп жавап­лана Нажмутдин. – Гьава бек исси болмай къалса, оьр тюшюмлеге умут бар. Гьали оьсюмлюклени гюч алагъан вакътиси, – дей сынавлу касбучу. Сонг да, 178 гектардагъы гюзлюклеге зараллы жанлардан сакъламакъ муратда агъулу дарманлар себилген. Гербицидлер себилегени де – дёртюнчю гюн. Шо гюнлени ичинде ишлер
138 гектар участкаларда тамамлангъан. Ювукъ арада ишлер толу тамамланажакъ.



Яхшы ишлейгенлени гьакъында арагъа сёз чыкъгъанда, Н. Магьамматгьажиев тракторист Омар Магьамматовну атын биринчилей айтды. Гертиден де, Омар – сынавлу тракторист. Хозяйствода загьмат тёгегенли 40 йылдан айлангъан. Тек, пенсиягъа чыкъгъанына да къарамайлы, ол яш заманындан сююп танглагъан касбусундан айырылмай. Дарман себив ишлени оьтгерегени де биринчи гезик тюгюл. Бу йыл да ишлени асувлу ва сан яны булан кюте.



Бу йыл районда 486 гектаргъа язлыкъ оьсюмлюклер чачылгъан.
47 гектары – «Къаягент» деген пачалыкъ унитар предприятиени авлакълары. Шоланы барысына да «Омаха» деген сан янлы будайны урлукълары чачылгъан. Бу жаваплы ишлени де хозяйствону ёлбашчылары Омар Магьамматовгъа тапшургъан. Оьзюне тапшурулгъан ишлени Омар Магьамматов белгиленген болжалларда сан яны булан кютюп, этилген инанывну ер этмей, бирдагъы гезик гертилеген.



Гьаракат этип загьмат тёгеген «Къаягент» ГУП-ну ишчилерине, касбучуларына, ёлбашчыларына къыйыныгъызгъа гёре берекетигиз де артсын демеге сюебиз.



Авторизация
*
*
Регистрация
*
*
*
Согласны с условиями сайта?
Генерация пароля