Дюнья чемпионатда – экинчи

Боксдан 15-16 йыллыкъ яшланы арасында Украинаны тахшагьары Киевде оьтгерилген дюньяны чемпионатында къоркъмаскъалалы къумукъ улан, яшланы арасында Европаны эки керен чемпиону Сулейман Бамматов экинчи ерни къазанып къайтгъан.

Россияны жыйым командасы ярышларда уьч биринчи, беш экинчи ва эки уьчюнчю ерлени къазангъан. Умуми команда гьисапда биринчи ерни алгъан. Шо ярышларда Сулейманны беш ёлугъуву болгъан.


Ол 54 килода ярым финалда америкалы боксёр Девин Ганийни утуп, финалгъа чыкъгъан. Финалда Сулейман булан ябушма рингге кубалы Алан Боуде чыкъгъан.



Уьч де раундда къоркъмаскъалалы улан бек къаст этип, техника гёрсетип ябушгъан. Тек судьялар утушну 2:1 санав булан кубалы боксёргъа бергенлер. Ярышлагъа Сулейманны тренерлер агъа-ини Жалалутдин ва Муслим Биярслановлар гьазирлегенлер.



– Сулейман дюнья чемпионатда экинчи ерни алгъангъа разимен. Финалда ол нече де арив ва чалт ябушду. Утушну огъар берер деп умут да эте эдим. Бермедилер ва бизин яш гюмюш медальгъа ес болду. Беш де ёлугъувда огъар утушлар тынч болмады, – дей Жалалутдин Биярсланов.



– Интернетден таба ярышланы ачылывунда Россияны байрагъын Сулейман гётергенин гёрюп сююндюк.



– Россияны байрагъын бизин юртлу алып чыкъгъанын биз де арив гёрдюк. Шогъар бек сююндюк. Къоркъмаскъалалы яшлар Европаны ва дюнья чемпионатларында алда да уьстюнлюклеге етишгенни билебиз…



Алдын яшланы арасында Мурат Ибрагьимов Европаны чемпиону болду. Сулейман да эки керен Европаны чемпиону болгъан эди. Гьали юртубузда боксну залын ача турабыз. Аллагь буюрса, бизин юртну боксёрлары дагъы да уллу оьрлюклеге етишежеклер, – деди Жалалутдин Биярсланов.



Суратда: С. Бамматов

тренерлери булан.



Авторизация
*
*
Регистрация
*
*
*
Согласны с условиями сайта?
Генерация пароля