Р. Абдулатипов школаланы битдиргенлер булан ёлукъгъан

Дагъыстанны Башчысы бу йыл ЕГЭ экзаменлерде 100 балл алгъан охувчулар булан, оланы муаллимлери ва ата-аналары булан 30-нчу июнда ёлукъгъан.


Олар булан саламлашгъан сонг Р.Абдулатипов: «Мунда гелген муаллимлеригизни кёмеги де булан сиз алгъан оьр къыйматланы эсгерме сюемен. Сизин уьстюнлюклеригиз бизин ишибизни пайдалы юрюлегенин англата. Сиз де билеген кюйде, артдагъы йылларда бизин республикада билим берив гьаракатны янгыртыв юрюле. ЕГЭ-ни оьтгеривде де низам салма болдукъ.


Артдагъы 10 йылны ичинде яшлар бавлары, школалар кёп къурулгъан. Кризисге ва кёп тюрлю четим масъалалагъа да къарамайлы, муаллимлеге, тарбиялавчулагъа алапаны РФ-ни Президентини май айдагъы указларына гёре гётерме болдукъ. Аттестатсыз къалагъан охувчуланы санаву эки керенге аз болгъан. Бизин охувчулар уьлкени айтылгъан оьр охув ожакъларына тюше. Тек етишген уьстюнлюклер булан тамамланып къалма ярамай. Школаларда дарс беривню даражасын артдырмагъа, касбу танглавну камиллешдирмеге герек. Охувчуланы болгъан чакъы маданиятгъа тартма тарыкъ. Маданият–о бизин эсибиз, о бизин халкъны йыллар булан топлана гелген яшав сынаву. Маданият ва билим берив бир-биринден айрылма болмай. Олар даим бирче, бир-бирин толумлашдыра юрюй. Янгыз маданият лап яхшы идеология», – деп эсгерген Р.Абдулатипов.


«Биз яш наслу янгы, мекенли билим алсын учун бары да имканлыкъланы болдурма тарыкъбыз. Неге тюгюл, олар Дагъыстанны ва бизин уьлкебизни оьсювю учун бизин ишибизни узатагъан наслу», – деди Да­гъыстанны Башчысы.


Магьачкъаладагъы 38 номерли гимназияны битдирген ва 8 номерли школаны битдирген къумукъ къызлар Юлдуз Сейтекаева ва Асият Къарачаева оьзлер алгъан 100 балл муаллимлени де, клас ёлбашчыланы да, ата-аналаны да бирликдеги загьматы экенни ва оьзлер охувун узатып, касбулагъа ес болуп, бизин республиканы ва уьлкебизни пайдасы учун загьмат тёгежегини гьакъында айтгъан. Каспийскидеги гимназиядан Марат Сайитов, Магьачкъаладагъы 37 номерли гимназиядан Маликат Бургуева Дагъыстанны Башчысына соравлар берип, жаваплар да алгъан. Сонг Р.Абдулатипов охувчулар булан бирче Дослукъну уьюндеги музейде болгъан ва бирче эсделикге сурат да алдыргъан.


Бизин мухбирибиз.

Авторизация
*
*
Регистрация
*
*
*
Согласны с условиями сайта?
Генерация пароля