Тепсиден ариге тебергенде…

   

Артдагъы вакътилерде республиканы гьакимият къурумларында болуп турагъан алышынывланы жамиятны аслам яны арив гёре ва якълай. Эл арада гьали сама яшав тюзелер, ёрукъгъа тюшер, йыллар булан топлана, тёшеле тургъан четим масъалалар чечилер деген умут бар. Белгили кюйде, Дагъыстан Россияда оьзюнден федерал центргъа лап да кёп арзалар гелеген регионланы бири гьисаплана эди.


Озокъда, республика алдагъы башчылардан къалгъан «варисликден» арчылма, тазаланма къарайгъанлыкъны къабул этмейгенлер де ёкъ тюгюл. Неге десе, тюрленивлер гьарам къазанчгъа уьйренген бир тайпаны бюджет деген тепсиден ариге тебере, халкъны гьисабына байынывну ёлларына тогъас сала. Тек къуллугъундан, гьакимлик шанжалындан пайдаланып гелгенлени не сюйсе болар бугъай деп, иннемей къол силлеп къойма хыялы ёкъгъа ошай. Мисал учун, Россияны президентин сайлавланы алдында Пенсия фондну Дагъыстан управлениеси адамлагъа да билдирмей, англатмай пенсияларын къыркъма башлагъанлыкъны янгы гьакимиятгъа къаршы этилеген чарагъа гьисаплайман.


Яда башгъа мисал. Кёбюгюз Дагъыстанны топуракъ ва мюлк министри Екатерина Толстикованы министерликни коллективи булангъы аралыкъларыны гьакъында эшитгенсиздир. 40-гъа ювукъ адам къол салып (оланы арасында министрни заместители де бар), республиканы Башчысыны борчларын заманлыкъгъа кютеген В.Васильевни атына бир уллу арза язгъан. Сайки, Е.Толстикова ишине гиришгени булан намаз къылагъан уьйню япдыргъан. Ондан къайры, эренлеге межитге жумагъа барма ихтияр бермей. Шогъар ачыкъдан разисизлик билдирген къуллукъчуну ишинден тайдыргъан. Министрни абурдан тюшюрмек учунгъу гьаракатгъа бир-бир электрон ва печат маълумат къураллар да къуршалгъан. Шоланы арасында айрокъда «Свободная республика» деген жумалыкъ газет бек белсенип айлана.


Прокуратурада билдиреген кюйде, Топуракъ ва мюлк министерлик –– инг де урушбатчылыкъгъа дёнген пачалыкъ къурумланы бириси. Шо гьакъда журналистлер булангъы ёлугъувда оьзю Е.Толстикова да айтды ва сёзлерин гертилемек учун, Къызлар райондан бир мисал гелтирди. ­Оьзюнден алда ишлеген министрни къарары булан Москвада турагъан дагъыстанлы далапчыгъа законсуз кюйде, районну лап дагьнили ерлеринден 3400 гектар топуракъ 49 йылгъа ижарагъа берилген болгъан. Шо къарарны Е.Толстиковагъа гери урмагъа тюшген.


Эсигизде бар буса, Р.Абдулатипов янгы Дагъыс­танны Башчысы этилип белгиленгенде журналистлени бириси огъар: «Рамазан Гьажимуратович, пенсиягъа чыкъгъанда не иш юрютежексиз?» – деп сорагъанда, ол иржайып: « Мени агъамны еслигинде тюз бойларда 100 гектар ери бар. Огъар гьайванлар сакълама кёмек этежекмен», – деген эди. Баш гьаким гележекдеги ишине байлавлу шолай жавап берип масхара эте эдими яда герти айта эдими, онча агьамиятлы тюгюл. Башгъа яны соравлар тувдура. Миналы юртлар топуракъ етишмей тыгъыслыкъгъа тарып турагъанда, бир адамгъа молундан 100 гектар ер бермек деген къараргъа ким къол салгъан экен? Дагъыстанда олай дагъы да нече-нече «агъалар», «инилер» бардыр?! Шоланы атларын аян этмек, топуракъланы герти есилерине къайтармакъ– Топуракъ ва мюлк министерликни биринчи борчу. Екатерина Толстикова шо масъаланы ахырына ерли чыгъармай къоймажакъман деп сёз берди ва ахырда намаз уьйге байлавлу хабар ялгъан экенин англатды.


Тюзюн айтгъанда, Е.Толстикова артыкъ талап­лы ёлбашчыгъа ошай. Балики, ол бизин халкъланы хасиятын да толу кюйде англап битмегендир. Амма гьалиги шартларда шолай тавакаллы, талаплы, бажарывлу, дос-къардаш, миллет-тухум деп къарамай, бел бюгюп чалышагъан, оьзгелени де ишлетип бажарагъан гьакимлер болмаса, биз дагъы да хыйлы заманлар тиленчи йимик къолун узатып юрюйген республика гьисапда къалып туражакъбыз.



Авторизация
*
*
Регистрация
*
*
*
Согласны с условиями сайта?
Генерация пароля