Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsВ ДагестанеВ РоссииВ миреНа КавказеГлава РДНародное СобраниеПравительствоМинистерства и ведомства Муниципалитеты In memoriamГод культуры безопасности Выборы - 2018ЧЕ-2018 Kaspeuro2018"ВРЕМЕНА"ИнфоблокИнтервьюПолитикаИсторияКультураЛюди и время НаукаНовые книгиБЛОГОСФЕРААналитикаЖАМИЯТПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорМАДАНИЯТАдабиятКультура ожакъларБилимИнчесаният Къумукъ тилКроссвордМасхараларТеатрЯнгы китапларЯшланы дюньясы СПОРТЕдиноборства Развитие спортаСоревнованияФК «Анжи» МЕДИАСФЕРАО газетеО сайтеСМИНаши авторыФото дняНаши партнерыНаши спонсорыСотрудникиАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)
Гечерми  бизден  яшлар?..

Гечерми бизден яшлар?..

   


Пятница, 30.03.2018г. - "ЁЛДАШ".



Кемерово шагьарда болгъан къайгъылы агьвалат бютюн уьлкени жамиятын титиретди. Оьзюбюзден кёп арекдеги агьвалат буса да, юрегинде бираз сама рагьмулукъ, языкъсыныв бар инсанны, гертиден де, жанын сызлатагъан, пашманлыкъгъа дёндюртеген, гётерме къыйын уллу балагь болду. Бир мюгьлетни ичинде отну оьртенинде янгы оьсюп, биринчи бутакъларын яйып гелеген, гёзел дюньясындан сююнюп битмеген, 41 яшны яшав тереги яллап кюлге айланып къалды.


Аллагьгъа уллу болуп бармасын, къутулмасдай от къапгъынгъа тюшген бир тигим яшланы кисе телефонларындан ата-анасына, ювукъ адамларына айтгъан ахырынчы сёзлени охугъанда, ичибизни гюйдюреген гьалеклик тамагъынга тююн болуп тыгъыла. Не этегенни билмей, бир бу якъгъа, бир о янгъа урунуп, биревлер сама къутгъарар бугъай деп терезелеге илинген яшланы гёргенде, ичинг- къарнынг айланып гете. Не амал, биревден де пайда болмагъан.


Гьаманда йимик, балагь къопгъан сонг гёзлерибиз бирден ачылгъандай, айланабыздагъы, гьар гюнлюк яшавубуздагъы терсликлени, низамсызлыкъны, пакарсызлыкъны эс этме башлайбыз. Оьтген янгурну артындан ямучу алып чабагъандай, бир тюрлю алгъасавлу чараланы, тергевлени оьтгерме урунабыз. Заман гетип, юрек сызлавлар солкъ болгъанда, гьамангъы айсенилик гьалыбызгъа къайтабыз.


Кёп ареклеге чыкъмай, бизин оьзюбюзню гиччи ватаныбызны алсакъ да, шо меселдеги агьвалатлар болмай къалмагъан. 14 йыл алъякъда Магьачкъалада осал эшитеген яшлар охуйгъан школа-интернатгъа от тюшюп яллагъанын ва шонда бишип гетген 31   къурбанын унутмагъансыздыр. Ерли гьакимият шонда янгы школа-интернат къурагъанны орнуна, бош болгъан ерлени бир тайпа тоймайгъан «ач бюрчелеге» сатып чыкъгъан эди. Гьали шо бойларда бир-бирине сыйынып тюкенлер токътагъан.


Яда лап артда болгъан къайгъылы агьвалатны эсигизге салайым. 2016-нчы йылны август айында Магьачкъалада законсуз къурулгъан ва ишлейген «Лейли» деген банкет залда газ балон атылып, 11 адам оьлген эди. Оьлгенлени арасында яшавда янгы биринчи абатларын алагъан мелте йимик къызъяшлар да бар эди. Шогъар байлавлу биревню сама такъсырлагъан, жавапгъа тартгъан, ишинден тайдыргъан деп эшитгенигиз бармы? Бир жума прокуратура ва оьзге тергевчю къурумлар чабып, гьаракат этип айландылар, сонг бары да зат къайтып кюй-кююне тюшдю.


Шулай гезиклерде ким-ким экени белгили болуп къала, адамны писти-пистиси ачыла. Кемеровода от тюшювден сонг айланадагъы яшавну аслу гьалда эркин кабинетлерини ва багьалы машинлерини терезелеринден гёреген бир тайпа гьакимлени оьзлени тутгъан кюю, айтгъан сёзлери бек къазапланыв-къарсалав гьислени тувдурду.


 Гьалекленген халкъны алдына чыгъып, гёнгюн алып, эбе-хырлы эки илиякълы сёз айтып болмайгъан гьакимден гьаким боламы?! Оланы орнуна, бары да ишин къоюп, алгъасавлу кюйде пачалыкъны Президентине Кемеровагъа гелип, ерли жамиятгъа оьзюню къайгъырышывларын билдирме тюшген. Шагьарны, бютюн областны ишине жавап береген гьаким буса, болгъан ишге байлавлу халкъдан гечмекни тилейгенни орнуна, Президентден тилей.


Алдындагъы гюн бютюн Россияда йимик, Магьачкъалада да Къурчакъ театрны къырыйында, уллу такътагъа «Кемерово» деген сёзлер язылгъан ерге адамлар гюл байламлар, къурчакълар гелтире эди, уллулар дуалар эте эди. Биз де олагъа къошулуп: «Аллагь рагьмат этсин!» – дейбиз. Яратгъаныбыз жанындан ачытып гетген гюнагьсыз яшланы оьзюню янына алып, женнетлени тёрюнде сакълажагъына инанабыз. Шону булан бирче яшланы оьлюмюне айып­лылар да тийишли такъсырын алажагъына бир де шекленмейбиз.


Гюл байламланы арасында уллуланы бириси ка­гъыз гесекге фломастер булан: «Гечигиз бизден, яшлар!» – деп язып къоюп гетген. Гечерми – огъар жавап берме къыйын. Савлай уьлкеде къайгъылы гюн билдирилгенде де тахшагьарыбызны гечеги ресторанларындан шатлы макъамлар чалына эди. «Асса», «Прибой» деген ва оьзге радиоканаллар сав гюн, сав гече эфирни накъыра-зурнай, «гьайт-гьуйт» булан толтуруп турду. Биревлеге – къайгъы-дерт, биревлеге – арты битмейген йыбав.



Количество показов: 68
Автор: Алав АЛИЕВ
30.03.2018 12:00

Возврат к списку









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта