Автошколаланы чалышывуна мекенли тергев этме герек


Ёлларда кёбюсю гьалда машин гьайдавчуланы айыбындан хатабалагьлар болагъаны йыл сайын арта бара десек, янгылыш болмас. Хатабалагьланы себеби де, озокъда, гьар заман тюрлю-тюрлю бола. Ичип эсирип гьайдап, ёлда гече юхлап яда гьатдан озуп бек гьайдайгъанлыкъдан да бола. Бир-бир гезиклерде буса, машин гьайдавда сынаву ёкълар машинге минип, ёл юрюшню низамын, машинни толу гьайдайгъан къайдаларын толу кюйде билмейгенликни натижасында хатабалагьлар тувулуна. Машин гьайдамагъа янгы уьйренгенлер кёбюсю гезиклерде ёлда машинни онгайсыз юрютегенликден четим гьаллар тувдура. Башгъа машинге уруп, зарал гелтиреген гезиклер де кёп бола.



Бизин регионда бир-бирде машин гьайдама ихтияр береген шагьатнаманы охумай, экзаменлер бермей, жагьиллер сатып алып къоягъанны билебиз. Шагьатнаманы сатып алгъан сонг айрыча гьакъгъа уьйретеген адамлар булан уьйренип, тез-тез машинге минмеге, ёлларда «учуруп» гьайдамагъа алгъасайлар.



Бизин республикада буса бугюнлерде иш гёреген 48 автошкола бар. Оланы да кёбюсю гьакъгъа шагьарларда машин гьайдамагъа уьйрете. Машин гьайдамагъа уьйренмек учун дарс алгъан адам мекенли кюйде уьйрендими яда уьйренмедими, олай гезиклерде ону гьайын этип айланагъанлар ёкъ. Мисал учун, Магьачкъалада инструкторну оьзюню машини булан бир сагьатны узагъында машин гьайдамагъа 500 манатгъа уьйрете буса, гиччи шагьарларда, Буйнакск, Къызылюрт, Избербаш ва башгъаларында, шолай дарсланы бир сагьатын 300 манатгъа алып бола. Дарслагъа бармай, ёл юрюшню низамларын, къайдаларын онда уьйренмейли, машинге минип, шагьарда машин гьайдавну вакътисинде машин гьайдав низамны, къайдаланы да уьйренмеге къарай. Озокъда, етдиринкли кюйде уьйренеми яда уьйренмеген гьалда машин гьайдамагъа башлап, ёлларда четимли, къоркъунчлу гьаллар тувдурамы – бу башгъа масъала.



Нечик алай да, бизин республикада иш гёреген автошколалагъа ДР-ни билим берив ва илмугъа къарайгъан министерлиги тергев этмеге башлагъан. Демек, алдагъы жумада ДР-ни Гьукуматыны Председателини борчларын заманлыкъгъа кютеген ДР-ни билимге ва илмугъа къарайгъан министри Уммупазил Омарованы ёлбашчылыгъы булан Дагъыстандагъы автошколаланы охутув гьаракатыны камиллешдиривюн артдырмакъны гьайында генгеш оьтгерилген. Генгешде Дагъыстан Республикада иш гёреген 33 автошколаны вакиллери ортакъчылыкъ этген.



Генгешде эсгерилген кюйде, ДР-ни билим беривге ва илмугъа къарайгъан министерлигини билим берив тармакъны тергев управлениесини къуллукъчулары оьтгерген мониторингге гёре автошколаларда гьар тюрлю кемчиликлер арагъа чыкъгъан. Уммупазил Омарова да эсгерген кюйде, автошколаланы чалышыву билим берив тармакъны законларыны талапларына къыйышывлусун, жавап берегенин ахтарагъан тергевлер оьтгерилежек. Тергевлеге гёре гёрсетилген талап­лагъа жавап бермей буса, автошколалар лицензияларындан магьрюм этилежек. Бугюнлерде Дагъыстанда чалышагъан 6 автошколаны лицензиялары гери алынгъан. Бу тергевлени аслу себеплерини бири – ёлларда кёп санавда адамлар оьлегенлиги.



Республикабызда чалышагъан автошколаланы охутув программаларыны сан янына, экзаменлени берилеген кююне де тергев этилежек. Машин гьайдавчуну шагьатнамалары да охуп чыгъагъанланы мекенли кюйде тергеген сонг берилежек.



Гертилей де, автошколаларда, оьрде де эсгергеним йимик, тергев етишмейгенлиги, охуса да, охумаса да яш да, уллу да машинлер гьайдайгъаны жамиятгъа зарал гелтире. Энниден сонг сама да автошколаланы чалышывуна мекенли кюйде тергев этмеге башласа, оланы чалышывун тергевню тюбюнде сакъласа, ёлларда болагъан хатабалагьлар аз болмасмы экен? Машин гьайдавгъа уьйретивде ва машин гьайдавчуну шагьатнамаларын тапшурувда автошколагъа къатты низам салмагъа заман кёпден гелген.




Авторизация
*
*
Регистрация
*
*
*
Согласны с условиями сайта?
Генерация пароля