Аты данггъа чыкъды


Гёз алдынгда ойнакълап, чабып-чачырап барагъан гиччинев яшлар оьсюп, торайгъанын да эслемей къаласан. О да гьечдир, амма шо сен заман-заман бетге-бет урунагъан къатарбашланы бирлерини савлай дюньяны гьайран этме болагъан пагьмулары аян этилинсе, олардан нечик къуванмай, алгъышламай боласан дагъы?



Дюнья дёгерек деп уллулар негьакъ айтмагъан. Айтагъаным, мен де яхшы таныйгъан Магьаммат Къагьиров ментальный арифметикадан декабр айны 8-9-нда Малайзияда, Куала-Лумпуреде оьтгерилген 23-нчю халкъара ярышлардан 1-нчи ерни алгъан. Шонда 80 пачалыкъдан баргъан 12 минг яшгъа оьзлени билим даражасын сынама имканлыкъ болгъан.



Россиядан буса шо конкурсда гьар ерлерден баргъан 27 яш ортакъчылыкъ этген. 3-нчю ерни де бизден баргъан «Развитие» деген билим берив ожакъны охувчусу Асият Умарова алгъан. Шончакъы яшны арасындан 12 йыллыкъ Магьаммат 1-нчи ерни къазангъанлыгъы – кёп уллу уьстюнлюк.



Магьаммат Къагьировну анасы Гюлнараны, уллатасы Басир, улланасы Маржанат Гьажиевлени оланы там тийген кёп аявлу хоншусу Шейит-Ханумлагъа бара туруп, мен де яхшы таныгъан­ман. Магьаммат Къагьиров бек адилли дёргелили тухумдан чыкъгъан. Ону улланасы Маржанатны къызардашы «Акула» фирманы есиси, далапчы къатын Сакинат Магьмутованы да сизин кёплеригиз бек яхшы биле.



Шо гюн Малайзиядан къайтагъанда, оланы ожагъында айрыча шатлыкъ, иссилик, хошлукъ бар эди. Бары да дос-къардашы гьакъылтёбе уланпаву Магьамматны къулач яйып, ашы-суву, гёнгю булан къаршыладылар. Аэропортгъа буса ону алдына дос-къардашындан къайры, Дагъыс­танны билим берив министрини 1-нчи заместители Ширали Алиев де баргъан эди.



Магьаммат Къагьиров бек асил ожакъда тарбиялангъан. Анасы Гюлнара Гьажиева авлетлерин тюз ёлгъа салып, олар билимли-англавлу болуп оьссюн учун, янын салып ятмай десем де къопдурув тюгюл.



Магьаммат Магьачкъаладагъы 38 номерли школада лап яхшы къыйматлагъа охуй. Ол оьзю эсгерген кюйде, тарих, математика, география дарсланы айрыча оьтесиз кёп сюе. Ол конкурсларда, гьар тюрлю олимпиадаларда ортакъчылыкъ эте туруп, кёплени сюювюн тезокъ къазанып битген.



Гетген йыл ол Москвада Бютюнроссия ва Темиркъазыкъ-Кавказны Грозный шагьарында болгъан чемпионатларда да алтын медаль къазангъан. Мычыгъыш Республиканы Башчысы Рамзан Къадыров огъар тергев этип, ону оьрлюклеге дагъыдан да бек иштагьландырмакъ учун акъча савгъат тапшургъан.



–Мен 9 йылымдан тутуп, ментальный арифметикагъа агьамият берме башладым,–дей Магьаммат. – Шондан чемпионатлар оьтгерилегенни билгенде, шоларда ортакъчылыкъ этип, оьрлюкню алма къасткъылажакъман деген ой гелди. Бу Малайзиядагъы конкурсда Гран-при савгъатны алма 2 бал етишмей къалды. Дагъы гезик шону алмагъа да гьаракат этежекмен.



Магьамматны сав-саламат хасияты мени де бек тамашагъа къалдырды. Гертиден де, гьакъыллы, англавлу яш. Шогъар бирдагъы керен барыбыз да мюкюр болдукъ. Неге тюгюл, ол 8 минутну ичинде 198 мисалны чечме бажаргъан. Ол школадан сонг, военный врач болмагъа умут эте. Юрегиндеги бары да умутлагъа етишме Аллагь огъар кёмек этсин ва ёлун ачсын.



Авторизация
*
*
Регистрация
*
*
*
Согласны с условиями сайта?
Генерация пароля