Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности "Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИВнимание! Конкурсы!Наши партнерыНаши спонсорыСотрудникиАвторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)

Оьзюн аямай чалышагъан муаллим

Оьзюн аямай чалышагъан муаллим



   Муаллимни касбусу, яшланы янгыз охутуп къоймайлы, олар булан гьакъылын, сынавун къоллап, ишине бютюнлей берилмекни талап этеШолайланы бири, ишине гьакъ юрекден берилген муаллимлени бириси Умгьат (Илмурият) Абдуллаева да Къарабудагъгентдеги 3 номерли орта школада орус тил ва адабият дарсланы юрюте


Ол школада 1974-нчю йылдан берли ишлей. Оьзюню дарсын, ишин, орус тил ва адабият дарсланы юрютеген къайдаланы яхшы биле. Мен оьзюм школада охуйгъан йылларымда да ол эсгерилген дарслардан муаллимим эди. Ону охувчулар рагьмулугъу, адиллиги, ишин мекенли кютегени ва яшлагъа бакъгъан якъда талаплыгъы саялы айрыча сюе эди. Дарслар гьар заман къужурлу, пайдалы ва оьр даражада оьтгериле эди. Биз гьарибиз билимли, гьакъыллы болсун учун бары да къастын салып чалыша эди.


Ону алдында охуп чыкъгъан, макътавгъа лайыкълы, жамиятгъа пайдалы адамлар кёп бар. Ол – гьар йыл сайын касбу усталыгъын артдырып, башгъа муаллимлеге де уьлгю болардай чалыша­гъан муаллим. Яшлар булан да гьарисини юрегине айрыча ёл табып, барысына да бир йимик янашып ишлеген ва ишлей. Бир де къопдурмай айтгъанда, гьар охувчуну оьсювюне айрыча тергев бере ва шону учун бары да имканлыкъланы къоллай. Ондан къайры, насигьат, кёмек тарыкъ болса, охувчу яшны янында гьар заман табыла. Яшлагъа бир заманда да тавушун гётерип, яман тиеген сёз айтып гёрмегенбиз, гьар яшгъа исси ва илиякълы янашып юрюген. Шолай адамлыкъ хасиятлары учун да гьар охувчу яш огъар гьюрмет эте.


Мени къызым Аминагъа да оьзюмню сююмлю муаллимим Умгьат Мамасиевна дарс берди, оланы клас ёлбашчысы да дюр эди. Къызым охуйгъанда мен оланы дарсларына барагъан гезиклерим кёп болгъан. Гьар баргъан сайын дарслары биринден-бири къужурлу ва пайдалы оьтегени мени гьайран эте эди.


Гьалиги вакътиге дарслар бирлешген пачалыкъ билим берив къайдалагъа гёре оьтгериле. Гьар охувчу дарсда охутув гьаракатда ортакъчылыкъ эте. Ону ачыкъ дарсларыны гьакъында да айрыча айтмагъа ярай. Маъналы ва яратывчулукъ къайдада оьтгерилген дарсланы гьазирлемек учун оьзюню ишин гьакъ юрекден сюймеге, бютюнлей заманын ишине багъышламагъа герек.


Кёп йылланы узагъында ишлей буса да, Умгьат Мамасиевнаны гьали де яратывчулукъ гьаракаты, яшлагъа сюювю кемимеген. Ол школада ишлейгенли буса 45 йыл бола.


Дарсларында адабият игитлени уьлгюлерин охувчуларда ватанына сююв, намус ва рагьму йимик хасиятланы тарбияламакъ учун къоллай. Шонча терен маъналы, пайдалы ойланы, пикруланы къайдан ала деп ойлаша къалабыз. Озокъда, яшланы ва касбусун гьакъ юрекден сюегенлигинден. Биз ва ону алдында охугъан бизин яшларыбыз муаллимни яхшылыгъындан нечакъы яхшы ишлеге къол ялгъагъанбыз, къужурлу мюгьлетлени гечиргенбиз. Ол янгыз дарсланы этип, охувгъа тергев берип къоймай, яшланы сапарлагъа алып бара эди, авлакъгъа, олар булан бирге табиатны геземе чыгъа эди. Булай чараланы да уллу агьамияты бар, неге тюгюл олар охувчуланы сыкълашдыра, бири-бирине исиндире, даимге эсинде къала.


45 йылны узагъында школада яшланы алдында муаллимлик касбусунда чалыша туруп, ол кёп-кёп наслуланы сюювюн ва абурун къазанма бажаргъан. Шолай муаллимлени загьматына, ишине багьа берилегени де сююндюре. Умгьат Мамасиевнаны оьктем болмагъа гьакъы бар, неге тюгюл «РФ-ни умуми билим беривюню гьюрметли къуллукъчусу», «Дагъыс­тан Республиканы ат къазангъан муаллими», «ДР-ни халкъгъа билим беривюню отличниги» деген гьюрметли атлар булан савгъатлангъан. Шолай да, охувчуланы тарбиялавда этеген къошуму учун башгъа тюрлю кёп савгъатлагъа да лайыкълы болгъан.


            Ол юртлуланы арасында да абур, гьюрмет къазангъан. Агьлюсю Идрис булан Умгьат Абдуллаева 7 авлетни тарбиялагъан. Оьзюню 3 уланындан къайры, бир къызъяшны алып сакълагъан, бирдагъы 3 яшны опекуну гьисапда да оьсдюрген. Ону чомарт юреги, оьзюн аямай халкъгъа этеген къуллугъу ва гьайлы янашыву учун юртлулар огъар савунда эсделик салса да ярай деп айта болалар.


Оьзюню охувчуларына этген къуллугъу, берген билими, тарбиясы ва яшав дарслары учун Умгьат Мамасиевнагъа гьакъ юрекден баракаллабызны билдиребиз. Яхшы савлукъ, узакъ оьмюр, яратывчулукъ уьстюнлюклер, уьюнде татывлукъ ёрайман.


 

С. Пайзуллаева. Къарабудагъгент юрт.

суратда: У. Абдуллаева.



Количество показов: 19
Автор: YOLDASH.news
14.06.2019 16:10
Подписывайтесь на канал yoldash.ru в

Возврат к списку


Добавить комментарий









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта