Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsНовостиИнтервьюАнонс книгIn memoriamГод культуры безопасности Нацпроекты в РДПамятные датыТеатры и кино"Времена"ИнфоблокПолитикаИсторияКультураЛюди и время НаукаАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилМасхараларТеатрЯшланы дюньясы Спорт Единоборства Развитие спортаФК «Анжи» СоревнованияМедиасфераО газетеО сайтеСМИ БАННЕРЫ Наши партнерыНаши спонсорыСотрудникиАвторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)

Янгы тапшурув яшавгъа чыгъарыла

Янгы тапшурув яшавгъа чыгъарыла



Гетген йыл Дагъыстанны башчысы Владимир Васильевни сиптечилиги булан «100 школа» деген проект яшавгъа гирди. Йылны ахырындагъы жыйында, Владимир Абдуалиевич, ярашдырылгъан школаланы санаву юзден артып, 117 школа болгъанны айтды.


Охувчуланы эсине салайыкъ, эсгерилген проектге гёре, Дагъыстанны Гьукуматы проектге гирген школалагъа 2 миллион манат акъча гёрсете, тек ерли администрация бажарывлу адамлар табып, шолагъа да кёмек къолун узатма ихтияр бере. Олар да гёрсетилген акъчадан 15 процентден кем болмайгъан кюйде харж береген далапчылар, фирмаланы башчыларын тапма герек. Район администрациягъа буса, шо акъчадан 5 процентин тёлеме ихтияр бериле, тек районну депутатларыны къарарына гёре, нечакъы спонсорлар берсе, шонча акъчаны район администрацияны башчысы да бермек гёрсетиле.

 


Докладында В.Васильев айтгъан кюйде, Дагъыстандагъы билим берив тармакъда 1461 школа бар, оларда да 393,2 минг яш охуй. Шолардан янгыз 34 проценти гёрсетилген талаплагъа жавап бере. Дагъы да айтгъанда, Дагъыстанда 133 школа чёкме тура ва 131-сини гьалы да бузукъ. Демек, ярашдырма ва янгы школалар къурмакъны масъаласы арагъа чыкъгъанда, 546 школа гьисапгъа алынгъан. Барын да бир вакътини ичинде ярашдырма харж ёкъ саялы, «100 школа» деген проектни къабул этме тюше.


Шо проектни ишге салмакъ ва тергев ишлер юрютмек учун 5 министерликден таба комиссия да къурулгъан. Шо проектге гёре, 2018-нчи йыл 5-нчи июлгъа ерли Дагъыстандагъы школаланы ва олар берген документлени тергев ишлер юрюлген. Гетген йылны ахырында проект яшавгъа нечик чыкъгъанны гьакъында генгеш оьтгерилген. Оьтген йыл Дагъыстанны 37 районунда 117 школа ярашдырылгъан, шолардан кёбюсю – Магьачкъала шагьарда. Проектни яшавгъа чыгъармакъ учун 313 миллион 600 минг манат харжлангъан. Шондан 198,7 миллиону республиканы, 30,4 миллион манат ерли муниципал бюджетлеринден алынгъан, 84,5 миллион манатны буса спонсорлар берген. Аслу гьалда шо акъчагъа къалкъылары ярашдырылгъан, терезе-эшиклери алышдырылгъан, от тюшювге ва террорчулукъгъа къаршы ишлер юрюлген. Тек шо проект геч ишлеме башлады, шону учун да кёбюсю ишлер дарслар юрюлюп турагъан кюйде оьтгерилген. Школаны ярашдырмакъ учун спонсорлар кёп сююп харж гёрсетегенге гёре, 2019-нчу йылда шо проект «150 школа» деп къабул этилинген.         Шону учун да проектге деп бюджетден 300 миллион манат да гёрсетилген.


Бирдагъы яхшы яны – бу йыл буса шо ишге эртерек гиришилген. Бары да ишлер янгы охув йыл башлангъанча битме герек. «100 школа» деген проектге Хасавюрт райондан 2 школа гирген буса, 2019-нчу йылгъа 9 школа гирген.


Хасавюрт районну гезикли генгешинде шо масъалагъа да къаралды. Жыйындан сонг мен районну башчысыны шо проектлеге къарайгъан заместители Вагьит Къасымов булан ёлукъдум.




– Гетген йыл «100 школа» деген проектге школаланы башчылары айтардай тергев бермеген эди, - дей ол. – Сонг шо проектге гирген школаланы янгыртылгъандагъы гьалын гёрюп, бу йыл конкурсда ортакъчылыкъ этме сюегенлер артды ва 9-гъа етишди. Барысы да конкурсдан оьтдю.


Бугюнлерде шоларда, бирисинден къайрысында, барында да ишлер юрюлюп тура. Шо проектге Яхсайдагъы 1 номерли школа, Къурушдагъы эки де школа, сонг да Боташюрт, Покровское, Тотурбийкъала, Чагъаротар ва Сулевгент юртлардагъы школалар гирген. Шоларда бары да ярашдырыв ишлер тез заманны ичинде битме герек. Ботаюртдагъы школаны ярашдырма герек «Содействие» деген жамият къурум тарыкълы документлер гьазир этип болмады ва шонда янгыдан аукцион оьтгерилежек. Шонда школаны къалкъысын янгыртма герек эди, шо ишлер де охувгъа четим этмей юрюлежек.


Бу гезик Дагъыстанны Гьукуматы берген харж 2 миллион манат, спонсорлар ва район администрация береген харжлар да бир биринден гьасил бола. Мисал этип айтсам, Яхсай школагъа Дагъыстанны Гьукуматы 2 миллион манат берген, спонсор берген акъча 500 минг манат, район администрация буса – 400 минг берди. Натижада 2 миллион 900 минг манат бола. Шолай даражада харж Боташюрт, Тотурбийкъала, Чагъаротар, Покровская, Къуруш школалагъа да гёрсетилген. Ботаюрт школагъа – 3, 5 миллион, Сулевкентге – 3, 6 миллион бериле. Жамлашдырып айтгъанда, бу йыл районну школалары 27 миллион манатгъа ярашдырылажакъ. Шо проект дагъы да узатылса, райондагъы кёп школаланы янгыртма бола. Уьстевюне, биз янгылары къурулма герек школаланы шо проектге къошмайбыз…


– Къурулажакъ школаланы гьакъында айтсакъ, бизин районда нече школа къурулма гёз алгъа тутулгъан? Районну генгешинде Россияны Президенти В.Путинни май айдагъы Указына гёре иш нечик юрюлегенни гьакъында да кёп сёйлене…


– Хасавюрт районда бу йыл 7 школа къурмакъ гёз алгъа тутулгъан. Шоланы бирлери бу йыл башланып, гелеген йылгъа чыкъмакълыкъ да бар. Гьали бир гюн мен районну башчысы Ж.Салавов булан Теречное юртда болдум. Шонда 2 къабатлыкъ школа къурулуп бите тура. Къурулуш юрюлеген кюйню ушатдыкъ. Школа 1-нчи декабрге битме герек. «Жилье» деген къурулуш компанияны ёлбашчысы айтагъан кюйде, аслу бинасын 1-нчи сентябрге битдирме де болажакъ. Школаны 300 охувчу яшгъа ери, уллу спорт залы, сонг да 360 адам олтуруп болар йимик актовый залы, янгы къайдадагъы ашханасы ва шолай башгъа кабинетлери бар. Август айны башында Акъболатюртда 120 яшгъа ери булангъы школа къурулма башланды. 120 охувчу ери булангъы школа Кемсиюртда да къурулажакъ. Дагъы да, Къандауравулда ва Эндирейде 300, Янгы Кёстекде 400 охувчугъа ери булангъы школалар, Эндирейде 120 ва Къурушда 200 яшгъа ери булангъы яшлар баву да къурулажакъ. 2020-нчы йылда буса Хамавюртда да янгы школа къурулажакъ.


- «Оьсювню белгилери» деген проектлер ишлеме башлагъанмы? Шолагъа билим беривню янгы къайдадагъы центрлары деп де айтыла...


–Шо центрлар «Технология», «Информатика» ва оьзге дарслагъа деп гьазирлене. Россияны Президентини 2024-нчю йылгъа ерлиги тапшурувуна байлавлу да бизин районда бир нечакъы ишлер юрюлюп тура. Район администрацияны «Билим берив» деген проектине гёре гьалиги талаплагъа жавап береген центрланы къурмакъ учунгъу 184 номерли къарары 2019-нчу йылны 8-нчи майында чыкъды ва шоссагьат центрланы къурма харжлар да гёрсетилди. Шолай центрлар Эндирей, Петраковское, Нурадилово, Новогагатли, Къуруш ва Кёстек школаларда къурулажакъ. Тарыкълы кагъызлар Дагъыстанны билим берив министерлигине етишдирилип битген ва шоларда ишлежек 52 педагог ва къуллукъчу билимлерин камиллешдирип де битген. Шо центрлар къурулажакъ школаларда ярашдырыв ишлер 70–90 процентге кютюлме де кютюлген.


Август айны 15-ине шо центрларда охума сюеген яшлар да белгили болуп битген. Шону булан бизин район яшёрюмлер учун касбу сайлавгъа багъышлангъан чараланы республикада биринчилерден болуп кютежек.


 

Гебек КЪОНАКЪБИЕВ, оьз мухбирибиз.

Суратларда: Хасавюрт район администрацияны башчысыны заместители Вагьит Къасимов; Теречное юртда школа къурулуп бите тура.



Количество показов: 140
16.08.2019 17:30
Подписывайтесь на канал yoldash.ru в

Возврат к списку


Добавить комментарий









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта