Алмашынывланы якълай, шоланы асувлугъуна инана


Бизин республикада болуп гетген агьвалатлагъа байлавлу яшёрюмлени пикрулары, ойлары


Гьар ким де оьзю башдан гечирген гьаллардан, не де айланасында болуп гетген агьвалатлардан гьасил чыгъарып, тангаласын белгилей. Шону булан бирге, шо агьвалатлар савлай уьлкени оьсювюне некъадар таъсир этмеге болажагъы гьакъда ойлашмагъа борчлу бола. Торайып гелеген яш наслуну вакиллери де шо гьакъда ойлашмай тюгюл. Артдагъы вакътилерде бизин республикада болуп гетген агьвалатлагъа, яшавгъа чыгъарылагъан бир тюрлю сиптелеге, айрыча оьтгерилген «Мой Дагестан» деген къаравгъа байлавлу оьзлени янашывун ахтаргъанда, РФ-ни юстиция министерлигини Бютюнроссия пачалыкъ юстиция университетини Темиркъазыкъ Кавказ институтуну 2-нчи курсунда билим алагъан студентлер айтгъан пикрулар да шогъар шагьатлыкъ эте. Бизин булан ёлугъуп этген лакъырлашывну вакътисинде олар малим этген ойлар къысгъача язылып, гьали охувчуланы тергевюне бериле.


Гьабибат Къадырова:


– Оьмюр чагъыма гёре оьзюм яш адам болсам да, бизин уьлкени гележеги, сонг да тувулунгъан гьалланы асувлу кюйде некъадар алышдырмагъа тюшегени гьакъда кёп ойлашаман. Неге тюгюл де, политика агьвалатланы ва оьзге себеплени таъсиринден дюньядагъы гьаллар баргъан сайын бузукълаша. Шоланы барысын да гьисапгъа алгъанда, Россиягъа чалт оьсювню ёлларын ахтармагъа тюше. Шо чалт оьсювню болдурагъан аслу шарт гьисапда да, мен гьисап этеген кюйде, янгы къайдада ойлашагъан, оьзлени артына оьзгелер де тюшеген гьакимлик къуллукъларда асувлу кюйде чалышмагъа болагъан жагьил адамлагъа арагъа чыкъмагъа имканлыкълар яратмагъа тюше.



Нечик алай да, бизин уьлкени мердешге къалып, агъылып тургъан тарихи барышын алышдырмаса ярамайгъаны англашыла. Неге тюгюл, Россия табии маъданлары булан бай экенге де къарамайлы, бизин уьлкени ватандашларыны аслам пайы чарасыз гьалда яшайгъанын, урушбатчылыкъны даражасы артып турагъанын, шулай шартларда пенсиягъа чыгъагъанланы оьмюр чагъын алышдырылгъанын къабул этмеге бажарылмай.



Гьакимлик къурумларда, жаваплы къуллукъларда чалышагъанлар ишни аслусун артдырмагъа къарамайгъанлыкъгъа ахыр салынмагъа тарыкъ. Мен ойлашагъан кюйде, гьакимлик къуллукълагъа уьлкени ва республиканы оьлчевлеринде юрюлеген къаравланы барышында тангланагъанлыгъы шогъар ёл ачажакъ. Шону булан бирге, шо къаравлар ва ватандашланы сиптелери гьар тюрлю грантлар гёрсетилип якъланагъаны да шогъар болушлукъ этежегине мен гьакъ юрекден инанаман.


Камилла Гьабибуллаева:


– Бизин республикада артдагъы вакътилерде болгъан агьвалатлар, дейгеним, оьр гьакимлик къурумларда жаваплы къуллукъларда чалышып тургъанланы бирлери туснакъ этилгенлиги, бир де къопдурувсуз айтгъанда, савлай уьлкени титиретди. Белгили экени йимик, олар гьарамашарлыкъгъа, пачалыкъ, жамият малын урлавгъа, талавгъа ёл берегени саялы тутулгъан. Шо себепден, мен англайгъан кюйде, Дагъыс­танда жаваплы къуллукълагъа касбучуланы белгилевде бир тюрлю къувунлу гьал тувулунду.





Шолайлыкъда, ДР-ни Башчысы Владимир Васильев «Мой Дагестан» деген къаравну оьтгеривню гьакъында билдирди. Янгыз бизин республикадан тюгюл, уьлкени оьзге регионларындан гелген яш касбучулагъа да шону барышында ортакъчылыкъ этмеге имканлыкъ берилсе де, ерли касбучуланы бажарывлугъуна артыкъ тергев этилди. Бугюнлерде эсгерилген къаравда алдынлыкъ алгъанланы кёплери гьакимлик ва оьзге жаваплы къуллукълагъа белгиленип иш башлагъан.



Оьтгерилген шо къарав бизин респуб­ликаны ватандашлары Дагъыстан Рес­публиканы Гьукуматына инанагъанын исбатлады. Шону булан бирге, гьакимлик къуллукълагъа янгы белгиленгенлер оьзлени алдына салынгъан къуллукъ борчларын акъчагъа дамагькарлыкъ этмей, олай да ишде оьрленивню, гётериливню, абур ва уьстюнлюк къазанывну гьакъында ойлашмайлы, некъадар яшавгъа чыгъаражагъына байлавлу соравлар ачыкъ кюйде къала. Шону да, озокъда, заман гёрсетежек.



«Мой Дагестан» деген къарав бизин республикада гьакъыллы, пагьмулу ва оьзлени къылыкъ битимине гёре жагь хасиятлы кёп жагьил адамлар бар экенин гёрсетди. Оланы излемеге герек. Оланы касбу бажарывлугъун камиллешдиривню уьстюнде ишлемеге тюше. Олагъа тынгламагъа ва оланы якъламагъа тарыкъ. Неге тюгюл, гьалиги яш наслуну вакиллери кёп тюрлю пайдалы 
сиптелени яшавгъа чыгъармагъа бола. Эгер де Дагъыстанны оьр гьакимлик къурумларыны янындан олар якълав тапса, бизин республиканы мекенли кюйде оьсювге элтежек, алмашынывланы яшавгъа чыгъармагъа ёл ачылажакъ. Лап да аслусу, гьакимлик къуллукъчуланы арасында урушбатчылыкъгъа ахыр салынажакъ. Шо саялы да, шо ёрукъдагъы къаравланы янгыз республика оьлчевде тюгюл, муниципал районларда да оьтгермекни пайдалы гёремен.


Марат Сулейманов:


– Мен гьисабымда, «Мой Дагес­тан» деген къарав, умуми кюйде алгъанда, бизин республиканы яшавунда бек уллу агьамияты булангъы агьвалат болуп токътады. Шо къаравну барышында янгыз ёлбашчылыкъ бажарывлугъу булангъы касбучулар тангланып къалмады. Шогъар гёре де, бизин респуб­ликаны оьсювюню пайдасына чалышмагъа болагъан инсаплы, гьалал адамлар да арагъа чыкъды. Тек, шо къарав алданокъ белгиленген гесимлеге гёре оьтгерилежегине инанмайлы, кёплер шону барышында ортакъчылыкъ этмей де къойду.





Неге тюгюл де, бизин республикада кёпден берли касбучулар оланы гьакимлик къурумланы ёлбашчыларына берилгенлиги, дейгеним, аминлиги гьисапгъа алынып тангланып гелген. Сонг да, айрыча алгъанда, айыкъ кюйде дурус пикру яратмагъа болагъан гьар ким де, умуми кюйде алгъанда, савлай жамият да законлар яшавгъа чыгъагъанына инанмай. Гьакимлик ва аманлыкъ болдурагъан къурумларыны къуллукъчулары касбу борчларына немкъорай янашагъаны да бир мердешге айланып да битген.



«Мой Дагестан» деген къарав бажарывлу касбучуланы арагъа чыгъарывну, олай да оланы гьакимлик къуллукълагъа белгилевню масъаласын толу кюйде чечмейгени англашыла. Эсгерилген масъаланы чечмек учун касбучуланы билимлерини сан янын, касбу бажарывлу­гъун камиллешдирмеге болагъан кюйде ерлерде шартлар яратылгъандан къайры да, белгиленген болжалларда гьакимлик къурумланы жаваплы къуллукъчуларын алышдырывгъа элтеген сайлавланы ачыкъ кюйде юрютмеге тюше.



Шондан къайры да, оьр охув ожакъны лап яхшы къыйматлар булан битдирип чыкъгъанлар оьзлер ес болгъан касбулагъа гёре ишлемеге бакъдырыла болгъан буса, бизин уьлкени бары да регионларындан гелгенлени де къуршап, шу ёрукъдагъы къаравланы юрютмек гьажатлы да болмажакъ эди.



Не болуп къалса да, шо къаравну оьтгерив бизин республикада алгъа багъып абат алывну белгиси болуп токътай. Къаравну ортакъчылары айтагъангъа гёре, къарав ачыкъ кюйде юрюлюп, гьасиллер де чыгъарылгъан. Шону гьисапгъа алсакъ, билимлерини сан янын малим этмек учун да къаравда ортакъчылыкъ этмекни пайдасы бар. Гьакимлик ва ёлбашчылыкъ къуллукълагъа касбучуланы танглавгъа урушбатчылыкъ булан бирче бир-бир тухум-тайпаны, олай да дос-къардашны арасында пайлап къоймакълыкъны алдын алажакъ деп эсиме геле. Нечик алай да, бизин республикада мекенли алышынывланы девюрю гелген деп айтмагъа ярай.


Албина Сотавова:


– Бизин республикада ювукъда оьтгерилген «Мой Дагестан» деген къарав оьзгелени йимик мени де тергевюмню тартды. Чинкдеси, шону барышында бизин республиканы гележеги гьакъда ойлашагъан ва жавапчылыкъны гьис этеген гьар кимге де ортакъчылыкъ этмеге имканлыкъ берилгенлиги менде айрыча разиликни гьислерин тувдурду. Оьтгерилген къаравда, айры-айры тюгюл, бирлешип иш юрютювге айрыча тергев берилегени мени хошума гелди. Неге тюгюл де, бизин республикада тувулунгъан гьалны янгыз бирев алышдырмагъа болмай. Шогъар гёре де барыбызгъа да бирлешип гьаракат этмеге тюше.





Сонг да, шо къаравну ортакъчыларына оьзлени ёлбашчылыкъ бажарывлу­гъун малим этмеге шартлар яратылды. Ёлбашчы болуп буса бирев де тувмай. Мен гьисап этеген кюйде, билим алмагъа белсенген ва оьзюню къылыкъ-хасиятын камиллешдиривню ёлун танглагъан гьар ким де ёлбашчы къуллукъларда чалышмагъа бола. Тек ёлбашчылыкъ ва оьр гьакимлик къуллукъларда чалышмагъа умут этегенлер алгъа салынгъан борчланы яшавгъа чыгъармагъа бир башлап тувулунгъан гьаллардан тюз, дурус гьасил чыгъармагъа уьйренмеге тюше. Мени тенглилериме де оьзлени гележеги оьзлени къолунда экенин эсден салмайлы, бизин республикада тувулунгъан гьалланы гьисапгъа да алып, алгъа талпынмагъа тюше.



Авторизация
*
*
Регистрация
*
*
*
Согласны с условиями сайта?
Генерация пароля