XML имеет неверный формат

"ЁЛДАШ" ГАЗЕТ



 
 




Девюр оланы сайлагъан

Девюр оланы сайлагъан

Къарабудагъгент район администрациясыны планына гёре Уллу Ватан давну ортакъчылары, Афгъан давну ортакъчылары булангъы ёлугъувлар, лакъырлашывлар оьтгерилип тура. Артдагъы гюнлерде «Бекенез» деген район телевидениесинде Афгъан давну ортакъчылары булан «Девюр бизин сайлады» деген ёлугъув-ла­къырлашыв оьтгерилди.

Афгъанистандан ахырынчы совет солдат чыкъгъанлы 26 йыл бите, тек давларда ортакъчылыкъ этгенлени онда оьтгерген гюнлери эсинден таймай. Ёлугъувгъа Къарабудагъгент районну Афгъан давда ортакъчылыкъ этгенлени жамият къурумуну ёлбашчысы Татав Алиев, шо давну гёрген Салимсолтан Алиев ва Магьамматбек Къагьруманов чакъырылгъан эдилер. Лакъырлашывну ортакъчылары оьзлени яшавуна гирген Афгъанистанны гьакъында эсделик­лерин айтып, онда гёрген гюнлерини гьакъында хабарладылар. Оланы хабарларында къоччакълыкъны ва игитликни уьлгюлери булан бирге, ондан къайтмай къалгъан ёлдашлары булан байлавлу къайгъы ва пашманлыкъ бар эди. 

Ёлугъувну вакътисинде Афгъан давну ялынлы, къайгъылы гюнлерини тарихи эсгерилди. Лакъырлашыв солдатланы Афгъанистанда чыкъгъан суратларындан этилинген гёрюнюшлер булан толумлашды.

Шо ёлугъувну ахырында Татав Алиевни гитара да согъуп Афгъан давну темасына багъышлангъан йырлары буса къаравчуланы айрыча тергевюн тартды. Оьтгерилген агьвалат бек таъсирли болду.

Эсделик чаралар янгыз ёлугъув булан тамамланып къалмай узатылды. Февраль айны 14-нде Къарабудагъгентде Афгъан давну ортакъчыларына салынгъан эсделикни алдында митинг оьтгерилди. Эсделик митингде Къарабудагъгент район администрациясыны ёлбашчысы Агьмат Гьажиев ва ону орунбасарлары, район администрациясыны яшёрюмлени ишлерине къарайгъан комитетини ёлбашчысы Гюлжанат Темирова, «Патриот центрны» директоруну орунбасары Тагьир Даязиев, Афгъан давну ветеранлары, олай да юрт школаланы муаллимлери ва охувчулары ортакъчылыкъ этди.

Афгъан давну ортакъчыларыны жанлы эсделиклери, давну агъусун сезгенлени сёзлери гьалиги наслугъа давну вагьшилиги гьакъында таъсирли кюйде чалынды. Шо эсге алывлар бары да халкъ бир болуп давгъа, гюч этивге къаршы турмагъа герекни англатды.

Бютюн Россия бугюнлерде Уллу Уьстюнлюкню 70 йыллыгъын оьтгермеге гьазирлене. Шулай гюнлерде бу даражада таъсирли оьтеген ёлугъувланы ва оьзге яшавгъа чыгъагъан чараланы оьсюп гелеген наслуну патриот ругьда тарбиялавда уллу агьамияты бар.

 

Р. МУСАЕВА.

Автор чыгъаргъан сурат.



Количество показов: 425
20.02.2015 14:47
|
Рейтинг ()

Возврат к списку

Неверный информационный блок

  







                 МЫ В СОЦИАЛЬНЫХ СЕТЯХ


       
        В Facebook
 


 В Instagram 




В контакте











         


AlfaSystems massmedia K3FN2SA