XML имеет неверный формат

"ЁЛДАШ" ГАЗЕТ






Белгили суратчы-журналист

Белгили суратчы-журналист

Бу йыл январ айны 21-нде «Дагес­танская правда» газетни редакциясында республикабызны маълумат къуралларыны вакиллерини белгили рус суратчы Иван Козорезов булан гезикли ёлугъуву болду.
– Иван янгыз Россияда тюгюл, дюнья оьлчевюндеги суратчы-журналист, – деп башлады оьзюню гиришив сёзюн Моск­вадагъы Дагъыстанны толу ихтиярлы вакилини ойчусу Магьач Вагьабов. – Ол оьзю Непалда тувгъан. Демек, герти тав хасиятлары булан ясалгъан къоччакъ сапарчы-журналист гьисапда танывлу. Ол дюньяны хыйлы ерлеринде сапарларда болгъан. Шолайлыкъда, Иванны кёп-кёп сурат выставкалары да болгъан.
Оьзю Дагъыстангъа гелегени бу экинчи гезик. Оьтген йыл язда ол бизин республикабызда мердешли халкъ саниятлар булан машгъул болагъан Къубачи, Балхар, Гоцатли, Къуруш, Хив ва шолай да оьзге кёп юртларда болду. Шондан сонг ол сурат выставка ва кинофильм онгарып гёрсетме де бажарды. Бу гезик ол Дагъыстанны къорукълары булан ювукъдан таныш болмагъа токъташгъан.
Оьзюню Дагъыстангъа не мурат булан геливюне байлавлу къысгъаракъ маълумат берген сонг, Иван Козорезов дагъыстанлы журналистлени кёп къадардагъы соравларына жаваплар къайтарды.
Аян болгъан кююнде, ол Дагъыс­тангъа бу гезик Госкомприроданы ва шолай да, ДР-ни Москвадагъы вакиллик къурумуну таклифине гёре гелген ва аслу борчу ерли къорукъланы-заповедниклени гьакъында документли фильм гьазирлеме умут эте. Шону булан бирче ол Россияны карталарын янгыртывгъа да болушлукъ этегени гьакъда эсгерди.
– Иван, гертиден де, белгили ва пагьмулу журналист-суратчы, – деди ёлугъувда ортакъчылыкъ этген ДР-ни информация, печат ва маълумат министрини ойчусу Магьаммат Магьамматов. – Мен оьзюм де, эгер де имканлыкъ болса, чакъда-чакъда сапарларда болма муштарлыман. Озокъда, къышда Да­гъыстанны четим тав шартларында огъар борчларын толу кюйде яшавгъа чыгъарма тынч тюгюл ва бу йыл язбашда дагъы да сапарын узатма сюегени англашыла.
Ёлугъувну ахырында москвалы къонакъ-сапарчы ва суратчы да­гъыстанлы журналистлеге де алгъа салынгъан борч­ларын кютювде къайратлы гьаракат булан уьстюнлюк­лер ёрады.

Къ. Къараев.
Суратда: И. Козорезов
(онгдан биринчиси).

Количество показов: 403
24.01.2014 14:26
|
Рейтинг ()

Возврат к списку

Неверный информационный блок

  

























































AlfaSystems massmedia K3FN2SA